Mgbọ Josuwa okwube iraka, ebi Ijeren mîkup owuwa acha, kpekaan̄ ogwu ibot. Me emen mgbọ ya, kubọk egebe me ikpa yi me ibot 21:25, “ene geelek ìkirọ inu òneme ọmọ.” Ebi Ijeren ekpọkpọ ikijit Okumugwem Awaji kiban̄ itele, mè ikisi itọbọ ebum inyi mkpọmfaka ebi lek ijọn̄ cha. Ema isirọ ikeya, Awaji îra isa ebi lek ijọn̄ ya initim akọn̄ ijijaka ema igwook. Ema mîra igwu ikom inu me lek Awaji initọbọ ebum inyi, mè ibeek ntap-ubọk me ubọk kan̄. Awaji îra igobo ene ge me etete kiban̄, mè onyi ene ya unye òsibi esese. Ogwa îra itim akọn̄ ikpan̄ ebi ochicha kiban̄, ere îra ikup me esuuk sọnja mgbọ. Ema mîra ikigban̄ utọn̄ inyi Awaji otutuuk mgbọ ene ya okupbe me ugwem. Mije ebi ibot ìsibi esese chi ekikpulu si ema me mgbọ ya, ke ebak me lek ikigwen ebi ibot cha ebi oyerebet. Ikeya ke ikpa yi osa ikaan̄ erieen̄ kan̄.

Ikpele ikween̄-inu òkup me emen ikpa yi ìre ke ebi Ijeren isigban̄ utọn̄ inyi Awaji, inu îra ikije ijaan̄ ema me lek. Ema isikpaka ibot, ùrioon̄ îra ikeme ema. Eyi ògọgọọk me udun̄ keya ìre ke Awaji îkup me mbem lek ikpọkpọk ibọkọ ebi kan̄ itap mgbọ geelek ema egwube ikom me ijo kiban̄, mè ikpọk inu me lek kan̄.