2 Okumugwem onenifọọk ibe, “Juda obosi. Nra iwuuk lek ikana ijọn̄ yi itap ọmọ me ubọk.”

3 Ebi otoko kè Juda enenitumu inyi ebi otoko kè Simiọn, ebi ngwan̄ kiban̄, ibe, “Ìna ìnigọọk eji ìsi ìgbaan̄ ìtim akọn̄ me lek ebi Kenan ebi ìluk me lek okike ijọn̄ ìrot kiji, ke eji si mênu inigọọk enyi itim akọn̄ me lek ebi Kenan ebi ìluk me lek okike ijọn̄ ìrot kinyi.” Ebi otoko kè Simiọn echechieek, mè igọọk ema ije.

4 Ebi otoko kè Juda ejijibi akọn̄ isibi, Okumugwem onenikana ebi Kenan mè ebi Pereji itap ema me ubọk, ema ekpakpan̄ akọp obop ene me lek kiban̄ me Bejek. 5 Ema emumun̄ Adoni-Bejek me Bejek ya, mè itim ọmọ akọn̄ me lek, mè itim ikpan̄ ebi Kenan mè ebi Pereji cha. 6 Adoni-Bejek olilibi, ema egọgọọk, mè itet, mè isọp otubọk ile iba kan̄ melek otukot ile iba kan̄ isan̄a.

7 Adoni-Bejek otutumu ibe, “Akọp ebi ubọọn̄ jaaba, ebi esọpbe otubọk ile kiban̄ melek otukot ile kiban̄ isan̄a mîkup me irak ikasi inorie n̄a ikititen̄e ngigen̄e inorie irie. Inu ya nrọbe ebi ofifi ene, ọmọ si ire eyi Awaji osabe inikpe emi me useen̄.” Ema enenisa ọmọ ika inu Jeruselem, ere îkupbe mè ikwu.

8 Ebi otoko kè Juda enenijibi akọn̄ isi Jeruselem, mè ibọkọ, mè isa oge akọn̄ ikpan̄ ebi ene isan̄a me emen, mè itap ukan̄ iwọp ama ya.

9 Mgbọ eya orakabe, ebi otoko kè Juda enenijibi akọn̄ isi itim me lek ebi Kenan ìluk me agan̄ ijọn̄ ogoon̄ ogoon̄, mè ebi ìluk me emen èwê agan̄ osiki, mè ebi ìluk me inyọn̄ orioon̄ isi ogoon̄ agan̄ ichep-ura. 10 Ema mîjibi si akọn̄ isi itim me lek ebi Kenan ebi ìluk me Eburọn (eyi ekigwen Kiriat Ariba me adasi mgbọ), mè itim ikpan̄ Sesai, mè Ayiman, mè Talimai.

11 Ema enenisa akọn̄ ya ije ejit yaage isi lek ebi ìluk me Debiri (eyi ekigwen Kiriat Seferi me adasi mgbọ). 12 Mgbọ ema erebe ama keyi, Kelep onenitumu ibe, “Ogwu enerieen̄ geelek òkọkọt itim akọn̄ ibọkọ Kiriat Seferi, mâsa gwun̄ n̄a enenwaan̄, Akisa, iche olom inyi.” 13 Otinien gwun̄ kè Kenaji, òrere ngwan̄ kè Kelep ogwu ijija, otitim akọn̄ ibọkọ Kiriat Seferi. Kelep osasa Akisa, ogwu gwun̄ enenwaan̄, inyi ọmọ me lek nwa.

14 Mgbọ orirọ ido-nwa kiban̄ orakabe, Akisa onenitumu inyi Otinien ibe ido nte kan̄ ijọn̄ uko. Usen ge, Akisa osisi ibosi ikpọ ogwu ute. Mgbọ îkinan̄a me inyọn̄ inyinya akpan kan̄ isibi ijọn̄, Kelep ogwu ute onenido ọmọ ibe, “Ìre îkaan̄ inu òrọrọ?”

15 Akisa ofọfọọk ibe, “Soso, rọ ata inu ge nyi emi. Owu ora inyi emi ijọn̄ me èwê agan̄ osiki, nye lek nyi emi ogbuuruk mun̄ gbaalek si.” Kelep oneninyi ọmọ ogbuuruk mun̄ òkup me agan̄ inyọn̄ melek eyi òkup me agan̄ osiki.

16 Ebi owot iman nte nwa kè Mosis ogwu Keyin, eneninan̄a me ama uti asaak ojotbe emen, eyi òrere Jeriko, mè inigọọk ebi Juda ije, mè iniluk me etete kiban̄ me agba lek ama Aradi me emen èwê Juda òkup me èwê agan̄ osiki.

17 Ebi Juda enenigọọk ebi owot iman kè Simiọn, ebi ngwan̄ kiban̄, ijibi akọn̄ isi itim me lek ebi Kenan ìkiluk me Sefat, mè itim ikpan̄ ema, mè ijijaka ema isan̄a kubọk inu oniin̄ akọn̄, mè ininyi ama ya erieen̄, Oruma.^a 18 Ebi Juda mîbọkọ si ama Gaja melek otutuuk ijọn̄ kiban̄, mè Asikelọn melek otutuuk ijọn̄ kiban̄, mè Ekurọn melek otutuuk ijọn̄ kiban̄.

19 Okumugwem okekeke inyi ebi Juda. Ema etitim akọn̄ ibọkọ otutuuk agan̄ ijọn̄ ogoon̄ ogoon̄ cha. Ire, ema kpekọt irieen̄ ebi ìluk me lek òla ijọn̄ ya isan̄a, mije, ife cha ekisa uji akọn̄ okwukwut itim akọn̄. 20 Enenisa ama Eburọn inyi Kelep igọọk me otu use kè Mosis. Kelep orerieen̄ bọn ebirieen̄ ita kè Anak isibi me lek ijọn̄ ya. 21 Ire, ebi otoko kè Benjamin kpekọt irieen̄ ebi Jebus ìkiluk me ama Jeruselem isibi. Mije keya, ebi Jebus melek ebi Benjamin ekigbagbaan̄ iluk me Jeruselem mege inire cherekeyi.

22 Ebi otoko kè Josefu enenijibi akọn̄ isi itim me lek ama Beten, Okumugwem okekeke inyi ema. 23 Mgbọ ema eriabe ebi ene ibe esi etaak chieen̄ ekpọ ike ama Beten okupbe (ekiwuuk lek igwen ama ya Luju), 24 ebi enun̄unun̄ cha emumun̄ enerieen̄ ge okinan̄a me ama ya isibi, mè inibe ene ya, “Nye lek jeen̄ eji ike eji ebesa ije inin̄ emen ama yi, ke eji mêrọ owu ijaan̄.” 25 Ogwu enerieen̄ ya onenijeen̄ ema, ema eninin̄, mè ibene akọn̄ me lek ama ya, mè isa oge akọn̄ kiban̄ ikpan̄ otutuuk ene isan̄a, ene geege ikeyi ìkasik, îtata ogwu enerieen̄ ya mè otutuuk ebi uwu kan̄ gaalek. 26 Ogwu enerieen̄ yi oneninan̄a itele agan̄ ya, mè ije isi agan̄ ebi Et ekiluk, mè isi ichili ama ge me ere ya, mè igwen ama ya Luju. Ikeya si ke ekigwen ama ya mege inire cherekeyi.

27 Ire, ebi owot iman kè Manasi kpekọt irieen̄ ebi ama Bet San melek asabọn ama òkukup ikana, mè Tayanak melek asabọn ama òkukup ikana, mè Doru melek asabọn ama òkukup ikana, mè Ibelam melek asabọn ama òkukup ikana, mè Megido melek asabọn ama òkukup ikana. Mije, ebi Kenan cha etetet lek inye, mè itumu ifieek ibe ke ema ebeluluk me inyọn̄ ijọn̄ ya. 28 Mgbọ ebi Ijeren ewabe me otu ifuk, mè inye lek, ema etetet ebi Kenan me òbọp itap me usun̄. Ire, kperieen̄ ema isibi inọọn̄ me inyọn̄ ijọn̄ ya. 29 Ebi otoko kè Iferem si kpekọt irieen̄ ebi Kenan ìkiluk me ama Gejeri isibi inọọn̄, ire, ebi Kenan eluluk ibia me etete kiban̄ me ama ya. 30 Ubọk yaage si, ebi otoko kè Jebulọn kpekọt irieen̄ ebi Kenan ìkiluk me ama Kitoron mè Nayalon isibi me lek ijọn̄ ya. Ebi Kenan chi eluluk me etete kiban̄, mè ikana usun̄ inyi ema me òbọp. 31 Ebi otoko kè Ase si kpekọt irieen̄ ebi Kenan ìkiluk me ama Ako, mè ebi ìkiluk me ama Sidọn, mè ebi ìkiluk me ama Ayilap, mè ebi ìkiluk me ama Akijip, mè ebi ìkiluk me ama Eliba, mè ebi ìkiluk me ama Afek, mè ebi ìkiluk me ama Reyobu. 32 Mije keyi, ebi otoko kè Ase ekekiluk me etete ebi Kenan ebi ìkiluk me lek ijọn̄ ya. 33 Ebi otoko kè Nafitali kpekọkọt irieen̄ si ebi ìkiluk me ama Bet Semes, mè ebi ìkiluk me ama Bet Anat isibi inọọn̄. Ire, ebi otoko kè Nafitali ekekiluk me etete ebi Kenan me lek ijọn̄ ya, mè itet ebi Kenan cha ìkiluk me Bet Semes, mè ebi Bet Anat me òbọp, inyi ekesi ikwaan̄ kubọk ebi usun̄ enyi ema. 34 Ebi Amọ echichichiki ebi otoko kè Dan isi inwaan̄ me agan̄ ijọn̄ ogoon̄ ogoon̄, kpenyi ema irek ibe enan̄a me inyọn̄ ogoon̄ esibi enu me lek òla ijọn̄. 35 Ebi Amọ etetet si lek inye, kpechieek inanan̄a itele inyọn̄ ogoon̄ Eres, mè Ajalọn, mè Sayalibim. Ire, mgbọ ebi otoko kè Josefu emumanabe iwa me otu ifuk, mè inye lek, etetet ebi Amọ me òbọp, inyi ekesi ikwaan̄ enyi ema kubọk ebi usun̄. 36 Okike ijọn̄ ebi Amọ ìbene me utibi ogoon̄ Akarabim,^b mè isa ikeya isi ire Sela, mè iraka si inyi isi.