Ikpa keyi ìre mfufuk ogwu enenwaan̄ Mowabu ge ekigwen Rufu, ogwu òbat ogwu enerieen̄ Ijeren. Mgbọ ogwu olom okwube, igọgọọk Nomi nga ogwu olom ika inu ido Ijeren, mije ikpele ulọk îkaan̄be me lek ogwu uga-olom, melek ikpele ulibi îkaan̄be inyi Awaji ebi Ijeren.

Mfufuk kè Rufu ìmọnọ irek me ukot mgbọ ebi Oyerebet ekikpulu me ido Ijeren, me mgbọ inu oyọtbe me Ijeren.

Ikpa yi îjeen̄ owuwa orọmijọn̄ ebi Ijeren. Îjeen̄ ubọk ebi uwu nlom kè Nomi esabe ibọkọ Nomi, òrere ugane nwakpa me Ijeren, itap me mgbọ ufialek osibibe inyi. Îjeen̄ ubọk ebi Ijeren ekikpọ chieen̄ me lek ebi ugbọọn̄ me mgbọ ekirọkọ mfut me uko. Îjeen̄ ubọk ogwu òrie àkpa (mè ìyaka ire, ogwu isi àkpa) me ototun̄ ukan̄ Ijeren okibọkọ nwakpa, mè ijeen̄ si inu òfo me lek ebi ìrere ebi ìrie àkpa.

Ikpa yi îjeen̄ si ibe ke kpunu inu geege, mè ìre unwọọn̄ mè ìre ufialek, eyi òbokọt ikput Awaji ibe ikarọ nkeek kan̄. Awaji môkọt isa ene geelek, mè ìre inu geelek òsisibi inyi ene, irọ ikpele ikwaan̄ me linyọn̄. Awaji îsa me lek ogwu Mowabu, ogwu ikarege ogwu Ijeren, isan̄a ogwu ubọọn̄ òmimin ichit isibi inyi ebi Ijeren. Îsa si mkpa nlom kè Rufu mè irek ugbọọri kan̄ itaba Rufu melek Bowaji iriaak, mè isa me ikeya isan̄a Debit isibi. Me mgburudun̄ mgbọ, inenisan̄a si gwun̄ kè Debit ogwu òmimin ichit, òrere Okaan̄-ene Jisọs Karais, isibi.