2 Josuwa onenitumu inyi otutuuk ebi Ijeren cha ibe ke Okumugwem, Awaji ebi Ijeren ìtumu ibe ikeyi, “Me ujọn̄ọ ujọn̄ọ mgbọ òraraka, ebi nte nte kinyi eluk me usaba okwaan̄ Yuferetis, mè ikiriaak ofifi awaji. Ene ge me lek kiban̄ ìre Tera nte kè Ebereyam, mè nte kè Nayọ. 3 Emi nnenimọnọ nte kinyi Ebereyam me usaba okwaan̄ Yuferetis ya, mè inisa ọmọ ijijen̄e ikana otutuuk lek ijọn̄ Kenan, mè irọ owot iman kan̄ imumana, mè inyi ọmọ Ajiki. 4 Nnenisa Isọ mè Jekọp inyi Ajiki, mè ininyi Isọ inyọn̄ ogoon̄ Seya ibe ire eyi kan̄. Ire, Jekọp mè ebi bọn efofon Ijipiti.

5 “Nneniria Mosis melek Erọn isi lek ebi Ijipiti, mè isulu ebi Ijipiti ikpele osusut sa me lek inu nrọbe me etete kiban̄. Òta kan̄, nsasan̄a enyi isibi. 6 Mgbọ nsan̄abe ebi nte nte kinyi isibi me Ijipiti, enyi enenire lek okwaan̄ Anyiaan̄. Ebi Ijipiti esasa uji akọn̄ echi inyinya okitaba, mè ebi akọn̄ inyọn̄ inyinya, igọọk ema inire lek okwaan̄ Anyiaan̄ ya. 7 Ema etataan̄ ukpo igwen emi Okumugwem, emi nsasa udun itap me etete kiban̄ melek ebi Ijipiti, mè irọ mun̄ okwaan̄ ikana ichit ebi Ijipiti cha, mè irie ema isan̄a. Enyi mîsa chieen̄ kinyi imun̄ inu nrọbe ebi Ijipiti. Enyi eneniluk me emen èwê owuwa acha.

8 “Emi nnenisa enyi inire lek ijọn̄ ebi Amọ, ebi ìluk me usaba okwaan̄ Jodan. Ema etitim enyi akọn̄ me lek. Ire, emi nyayaka ema itap enyi me ubọk, mè ijijaka ema isan̄a inyi enyi. Enyi ebọbọkọ ijọn̄ kiban̄ isak. 9 Balak gwun̄ kè Jipọ, òre ogwu ubọọn̄ ebi Mowabu obebem lek ititim ebi Ijeren akọn̄ me lek, mè iniria ikwaan̄ igwen Balam gwun̄ kè Beyọ, ibe inifieek otu inyi enyi. 10 Ire, ǹkachieek igbagban̄ utọn̄ me lek ikọ kan̄. Eya orọ, ọmọ okpọkpọ enyi ikigbana. Nsasa me ikeya inyan̄a enyi isibi me ubọk kè Balak.

11 “Enyi enenisaba okwaan̄ Jodan, mè inire ama Jeriko. Ebi ama Jeriko ebebene enyi akọn̄ me lek. Ikeya si ke ebi Amọ, mè ebi Pereji, mè ebi Kenan, mè ebi Et, mè ebi Girigas, mè ebi Ifi, mè ebi Jebus eben si akọn̄ inu enyi lek. Ire, emi nkakana ema itap enyi me ubọk. 12 Uwuson ke nria ijet ema sabum enyi enire. Irerieen̄ ebi ubọọn̄ iba ebi Amọ cha isan̄a sabum enyi enirere. Ìkare oge akọn̄ kinyi, ìkarere si ogbaan̄ mè oraan̄ kinyi ke enyi esa irieen̄ ema isan̄a. 13 Sa me ikeya ke emi nnyi enyi ijọn̄ eyi enyi kpebọkọ kwulukwulu geege me lek, mè inyi enyi ama echi ikarege enyi enama, enyi eluluk me ama cha, mè ikirie mfut uko gerep mè mfut uti olifu echi ikarege enyi ewop.”

14 Josuwa onenitumu inyi ema ibe, “Eya orọ, mgbọ keyi, ìtet ukpook me lek Okumugwem, mè ìkitọbọ ebum ìnyi ọmọ me otutuuk ejit kinyi mè atikọ. Awaji cha, echi ebi nte nte kinyi etọbọbe ebum inyi me usaba okwaan̄ Yuferetis mè Ijipiti, ìkpulu ìtọọn̄ ìfiin̄. 15 Ire, ire itọtọbọ ebum inyi Okumugwem ire ijo inu me chieen̄ kinyi, cherekeyi, ìgobo ìnyi lek kinyi ogwu enyi ebetọbọ ebum inyi. Mè ìre awaji cha echi ebi nte nte kinyi etọbọbe ebum inyi me usaba okwaan̄ Yuferetis, mè ìre awaji echi ebi Amọ, ebi enyi ekiluk me lek ijọn̄ kiban̄. Ire emi mè ebi uwu n̄a, eji ebetọbọ ebum inyi Okumugwem.”

16 Ebi Ijeren efọfọọk ọmọ ibe, “Awaji gwak fiin̄! Eji kpebekọt itele Okumugwem, mè iyaka ikisi itọbọ ebum inyi ofifi awaji. 17 Mije, îre Okumugwem Awaji kiji osan̄a eji melek ebi nte nte kiji isibi me ijọn̄ Ijipiti, isan̄a me uwu usun̄, mè irọ ikpele inu ijejeen̄ kechi echi eji esabe chieen̄ kiji imun̄, mè ibem eji me otutuuk oniin̄ ije kiji, mè emen ubọk otutuuk ebi ido cha eji ejebe itibi. 18 Okumugwem orieen̄ otutuuk ebi ido cha geelek isan̄a eji me isi, mè irieen̄ si ebi Amọ ebi mgbọ ìkiluk me lek ijọn̄ yi igbaalek, ike eji ekinin̄ inu. Eya orọ, eji si, eji ebetọbọ ebum inyi Okumugwem, mije, ọmọ ore Awaji kiji.”

19 Ire, Josuwa onenitumu inyi ema ibe, “Enyi kpebekọt itọbọ ebum inyi Okumugwem, mije, ọmọ ìre Awaji òkup me mbuban, mè ire Awaji mba-ejit. Ìkpotele nrọ-nlọ kinyi mè ijo inu kinyi. 20 Ire enyi itele itọtọbọ ebum inyi Okumugwem, mè isi itọbọ ebum inyi awaji ebi ofifi ife, Okumugwem môgwu ikom irọ enyi ijo inu, mè ijijaka enyi isan̄a, ubọk geelek îwuukbe lek ikirọ enyi ata inu.”

21 Ebi Ijeren etutumu inyi Josuwa ibe, “In̄-in̄, ìkpore ikeya. Mije îre Okumugwem ke eji ebetọbọ ebum inyi.”

22 Josuwa onenitumu inyi ebi Ijeren ibe, “Enyi gaalek me lek kinyi ere ebi ata-ikọ ikeme lek kinyi, ibe ke enyi mîgobo Okumugwem gaalek itọtọbọ ebum inyi.”

Ema echechieek ibe, “Iin̄, eji ìre ebi ata-ikọ.”

23 Josuwa onenitumu inyi ema ibe, “Me mgbọ keyi, ìkpulu awaji ebi ofifi ife cha echi òkup enyi me ubọk cha ìtọọn̄ ìfiin̄, mè ìsa ejit kinyi ìnyi Okumugwem, Awaji ebi Ijeren.”

24 Ema efọfọọk Josuwa ibe, “Okumugwem Awaji kiji ke eji ebetọbọ ebum inyi, ida kan̄ si ke eji ebekigban̄.”

25 Usen ya, Josuwa orọrọ inyan̄a-ibot inyi ebi Ijeren me Sekem, mè inyi ema orọmijọn̄ mè ikan eyi ema ebekigọọk. 26 Josuwa onenige ikọ chi itap me emen Ikpa Ikan Awaji. Eya itata, ibeben ikpele ewuuk ge igwuun̄ me ere ya me irak uti ilip òkup me agba lek Akpatan̄ Mbuban Okumugwem.

27 Josuwa onenitumu inyi otutuuk ebi Ijeren ibe, “Ìkpọ! Ewuuk keyi môre ata-ikọ ikeme eji. Mije, ewuuk yi înọ otutuuk ikọ eyi Okumugwem otumube inyi eji. Ọmọ môkeke ata-ikọ ikeme enyi, ire enyi ikan̄ ataak inyi Awaji kinyi.”

28 Mgbọ Josuwa orọbe inu chi isan̄a, ineniria otutuuk ebi Ijeren ifon. Ogwu ikup, ofo lek ijọn̄ ìrot kan̄.

29 Mgbọ otutuuk inu chi geelek orọbe iraka isan̄a kpai, Josuwa gwun̄ kè Nun, ogwu ikwaan̄ Okumugwem okwukwu mgbọ îsobe efit acha mè akọp. 30 Ebi Ijeren ebeben ọmọ ifuun̄ me lek ijọn̄ ìrot kan̄ me Timinat Sera, me inyọn̄ ijọn̄ ogoon̄ ogoon̄ otoko kè Iferem, me iraraka ogoon̄ Gayas ifo agan̄ inyọn̄.

31 Ebi Ijeren mîtọbọ ebum inyi Okumugwem me otutuuk ukot mgbọ Josuwa okupbe me ugwem, mè ikitọbọ si me ukot ebi ugane ebi Josuwa okwube itele, ebi ìrọriọọn̄ otutuuk ikwaan̄ Okumugwem orọbe inyi ebi Ijeren.

32 Ebi Ijeren enenifuun̄ ukwuuk kè Josefu me Sekem me lek ojijeek ijọn̄ eyi mgbọ Jekọp osabe efit mgbidim alata okuket ilep me ubọk bọn kè Amoru nte kè Sekem. Ema esasa ukwuuk kè Josefu cha ikaan̄ me ubọk inan̄a me Ijipiti inu. Ijọn̄ ya ere efuun̄be ukwuuk kè Josefu cha onenikana ìrot eyi bọn kè Josefu ekaan̄be.

33 Elieja gwun̄ kè Erọn onenikwu, efufuun̄ ọmọ me Gibiya me lek ijọn̄ enyibe Fineyas ogwu gwun̄, me inyọn̄ ijọn̄ ogoon̄ ogoon̄ otoko kè Iferem.