Ebi Ijeren mîtim ikpan̄ ebi ubọọn̄ go ebi Amọ
10
Adonisedek ogwu ubọọn̄ ama Jeruselem oneninọ ibe ke Josuwa îbọkọ Ai, mè ijijaka ama ya igwook isan̄a kpai, ke ike îrọbe Jeriko mè ogwu ubọọn̄ ama ya ke îrọ si Ai mè ogwu ubọọn̄ ama keya si. Ema mînọ si ibe ke ebi Gibiọn mîgọọk ebi Ijeren irọ esuuk, mè ikiluk me etete kiban̄. 2 Mgbọ Adonisedek mè ebi kan̄ enọbe inu chi, ukpook otetet ema enenen, mije, Gibiọn ìre ikpele ama. Îmin iso ama ebi ubọọn̄ ekikpulu, mè imin igak Ai. Ògak ge, otutuuk ebi ama Gibiọn ìre ebi unye me akọn̄. 3 Adonisedek ogwu ubọọn̄ Jeruselem oneniria osat ijet Oyam, ogwu ubọọn̄ ama Eburọn, mè Piram, ogwu ubọọn̄ ama Jarimut, mè Jafiya, ogwu ubọọn̄ ama Lakis, mè Debiri, ogwu ubọọn̄ ama Egulọn, ibe, 4 “Ìsibi ìna ìnitap ubọk ìnyi emi, inyi eji esi akọn̄ me lek ebi Gibiọn, mije, ema mîsi igọọk Josuwa mè ebi Ijeren irọ esuuk.” 5 Ema ebi ubọọn̄ go ebi Amọ cha, ìrere ogwu ubọọn̄ Jeruselem, mè ogwu ubọọn̄ Eburọn, mè ogwu ubọọn̄ Jarimut, mè ogwu ubọọn̄ Lakis, mè ogwu ubọọn̄ Egulọn, enenigbaan̄ urum akọn̄ kiban̄ itọbọ. Ema mè otutuuk urum akọn̄ kiban̄ enenijibi akọn̄ isi Gibiọn, mè ikpa mbin akọn̄ ikana ama ya, mè itim ama ya akọn̄ me lek.6 Ebi Gibiọn eraria osat isi lek kè Josuwa me Giligan, ere m̀gba-ǹgwele ukan̄ ebi Ijeren okupbe, isi ilook Josuwa ibe, “Soso, ikalibi ìtele eji ebi usun̄ kinyi. Ìgwat lek ìna ìnitap ubọk ìnyan̄a eji, ke otutuuk ebi ubọọn̄ ebi Amọ ebi ìluk me inyọn̄ ogoon̄ mîgbaan̄ urum akọn̄ kiban̄ itọbọ isa akọn̄ inu eji me lek.”
7 Mgbọ Josuwa obọkọbe etip ya, ọmọ mè otutuuk urum akọn̄ kan̄, melek otutuuk ebi unye akọn̄ kiban̄, enanan̄a me Giligan ijibi ije ikinene isi Gibiọn. 8 Sabum ema enibene ije, Okumugwem otutumu inyi Josuwa ibe, “Katet ukpook me lek ife cha. Ife cha ebechechieen̄ ita kpai me ubọk kwun̄. Kpunu ene geege me lek kiban̄ òbokọt ikeke ida owu.”
9 Josuwa mè ebi akọn̄ kan̄ esasa eririeen̄ ije inan̄a me Giligan isi ire Gibiọn, mè isi ichichini ebi Amọ me uwuuk-lek. 10 Okumugwem otatap ukpook ijot emen ebi Amọ, ema ebebene ikililiin̄ welewelewele me isi ebi Ijeren. Ebi Ijeren ekpakpan̄ ema nsebe nsebe me Gibiọn, mè ililaba ema, ema ekekililiin̄ me lek oniin̄ utibi ogoon̄ òkinene ifo ama Bet Oron. Ebi Ijeren ekpakpan̄ ema mege isi ire ama Ajeka, mè iraka isi igwook me ama Makeda. 11 Mgbọ ebi Amọ ekililiin̄ me isi ebi Ijeren ikikwala isiki me lek osiki ijọn̄ Bet Oron, Okumugwem okekisa ibot mgbọlọ òmimiin̄ ibot itọọn̄ ema ikpan̄ mege isi ire Ajeka. Ibot mgbọlọ ya okpakpan̄ ene me etete kiban̄ iwa igak ebi ìkwakwaan̄ me otu oge akọn̄ ebi Ijeren.
12 Me usen ya Okumugwem okanabe ebi Amọ itap me ubọk ebi Ijeren, Josuwa otutumu ikọ melek Okumugwem me isi otutuuk ebi Ijeren ibe,
“Ura, keke kam me isinyọn̄ me Gibiọn,
onyan̄, gwuun̄ kam me isinyọn̄ me iteke Ajalọn!”
13 Ura okeke ikam, onyan̄ ogwugwuun̄ ikam, mege ebi Ijeren etimbe ikpan̄ ebi ochicha kiban̄, mè irọ ema useen̄. Mîge si inu yi me emen Ikpa kè Jasa.
Ura okekeke ikam me eden̄ akpabin inyọn̄, mè ikikikene, ìkanim, mege iso otuuk kè egwe usen ge. 14 Usen geege òbet lek usen ya ìkararak ìkup, ìkabokukup si, usen Okumugwem ogban̄be ida gwun̄ ogwu ebilene. Me atikọ, Okumugwem îtim akọn̄ me ibot ebi Ijeren.
15 Mgbọ Josuwa mè otutuuk ebi melek kan̄ etimbe ikpan̄ ebi Amọ cha isan̄a, ema enenigwu ikom ifo ere m̀gba-ǹgwele ukan̄ kiban̄ me Giligan.
Mîtet ebi ubọọn̄ go ebi Amọ
16 Otutuuk mgbọ ekitim etim ya, ebi ubọọn̄ go ebi Amọ cha, elilibi isi ilet me emen ǹkororok ge me ama Makeda. 17 Ebi ìmumun̄ ema esasa ukpatu isi ilook Josuwa ibe ke ema mîmun̄ ebi ubọọn̄ go cha ekilet me emen ǹkororok ge òkup me Makeda. 18 Josuwa onenibe ema, “Ìkpukpọt ewuuk òmimiin̄ ìchit otu ǹkororok ya, mè ìto ene me ere ya, inyi ekebem ebi ubọọn̄ cha. 19 Enyi me lek kinyi, ikakup me ere ya, ìlilaba ebi ochicha kinyi, mè ìfieek ìkwek ema me agan̄ udun̄. Ikachieek ibe ema enin̄ emen ama kiban̄. Mije, Okumugwem Awaji kinyi îra ikana ema itap enyi me ubọk.”
20 Mgbọ Josuwa melek ebi Ijeren ekpan̄be ema ogbogbo, mè ikpan̄ agan̄ ilile me lek kiban̄ isan̄a, ene inen ìsisik eliliin̄ isi inin̄ ama mgban akọn̄ kiban̄ cha. 21 Otutuuk ebi Ijeren egwugwu ikom ika me esuuk inu me lek kè Josuwa me ere m̀gba-ǹgwele ukan̄ òkup me Makeda. Bene me mgbọ ya, kpunu ene geege me lek ijọn̄ ya òyayaka ikinye otu inyi ebi Ijeren.
22 Josuwa oneniria ene ibe esi echili otu ǹkororok ya, mè esan̄a ebi ubọọn̄ go cha ìkup me emen ejet ọmọ. 23 Ife cha esisi isan̄a ebi ubọọn̄ go cha isibi me ǹkororok ya isa ijet Josuwa. Ebi ubọọn̄ cha ìre ogwu ubọọn̄ Jeruselem, mè ogwu ubọọn̄ Eburọn, mè ogwu ubọọn̄ Jarimut, mè ogwu ubọọn̄ Lakis, mè ogwu ubọọn̄ Egulọn. 24 Mgbọ esabe ebi ubọọn̄ cha ijet Josuwa, Josuwa ogwegwen otutuuk ebi Ijeren ititiin̄, mè initumu inyi ebi ibot akọn̄ ebi ìgọgọọk ọmọ isi akọn̄ ya ibe eje egbet, mè ebene ukot kiban̄ etoon̄ me ebek ebi ubọọn̄ cha. Ebi ibot akọn̄ cha ejeje igbet, mè ibene ukot kiban̄ itoon̄ me ebek ebi ubọọn̄ cha.
25 Josuwa onenitumu inyi ebi ibot akọn̄ cha ibe, “Ikatet ukpook, ikasisik si ejit. Ìtet lek ìnye, mè ìkat ejit. Mije, îre ikeya ke Okumugwem oborọ otutuuk ebi ochicha kinyi, ebi enyi mêtimbe akọn̄ me lek.” 26 Josuwa onenikeen̄ ebi ubọọn̄ cha ikpan̄, mè ibe ekpat ema me otu uti go ejeen̄. Ekpakpat nkwukwu kiban̄ ijijen me otu uti cha, ema ejejeen̄ me otu uti ikeya mege ire ikakwun̄.
27 Mgbọ ura onimbe, Josuwa onyinyi ida, esisi isan̄a nkwukwu kiban̄ me otu uti cha, mè ikpulu isi itọọn̄ itap me emen ǹkororok ya ere mgbọ ema elileekbe me emen, mè ikpulu ikpele ewuuk igwook ichit otu ǹkororok ya. Ewuuk cha ọmọ òwa ire chereyi.
Ebi Ijeren mîbọkọ owuwa ama ebi Amọ
28 Me usen yaage, Josuwa melek ebi melek kan̄ esasa akọn̄ isi Makeda, mè ibọkọ ama ya, mè isa oge akọn̄ ikpan̄ ogwu ubọọn̄ ama ya, mè ichep ama ya isan̄a dìp dìp, mè ikpan̄ otutuuk ebi ama ya isan̄a kpai, ene ge ikeyi ìkasik. Josuwa orọrọ si ogwu ubọọn̄ Makeda kubọk îrọbe ogwu ubọọn̄ Jeriko.
29 Josuwa mè otutuuk ebi Ijeren enanan̄a me Makeda isi Libina isi itim akọn̄ me ama keya. 30 Okumugwem oyayaka si ama keya mè ogwu ubọọn̄ kiban̄ itap me ubọk ebi Ijeren. Ema ekpakpan̄ otutuuk ebi ìluk me emen ama Libina isan̄a kpai, ene geege ìkasik. Ema erọrọ si ogwu ubọọn̄ ama ya ike ema erọbe ogwu ubọọn̄ Jeriko.
31 Ebi Ijeren eneninan̄a me Libina iraka isi Lakis, mè isi ikpa mbin akọn̄ ikana ama ya, mè itim akọn̄ me lek ebi ama ya. 32 Okumugwem oyayaka Lakis itap ebi Ijeren me ubọk. Ema ebọbọkọ ama ya me òso usen iba, mè isa oge akọn̄ ikpan̄ otutuuk ebi ama ya isan̄a kpai, ubọk yaage ema erọbe ebi ama Libina. 33 Mgbọ ya, Yoram, ogwu ubọọn̄ Gejeri înu initap ubọk inyi ebi ama Lakis. Ire, Josuwa mè ebi akọn̄ kan̄ ekpakpan̄ ọmọ, mè ikpan̄ otutuuk urum akọn̄ kan̄ inọọn̄, ene geege ìkasik.
34 Josuwa mè otutuuk ebi Ijeren eneninan̄a me Lakis isi Egulọn, mè ikpa mbin akọn̄ ikana ama ya, mè itim akọn̄ me lek ebi ama ya, 35 mè ibọkọ ama ya usen yaage, mè isa oge akọn̄ ikpan̄ otutuuk ebi ama ya isan̄a kubọk ema erọbe ebi Lakis.
36 Josuwa mè otutuuk ebi Ijeren eneninan̄a me Egulọn ije inene isi Eburọn, mè isi itim akọn̄ me lek kiban̄, 37 mè ibọkọ ama ya, mè igwak otutuuk igwook, mè ikpan̄ ogwu ubọọn̄ kiban̄ mè otutuuk ebi ama ya, mè inin̄ asabọn ama kiban̄ cha, mè igwak igwook, mè ikpan̄ ene isan̄a me emen. Ema kpetele ene geege me ugwem. Ubọk ema erọbe Egulọn ke erọ Lakis, egwagwak isan̄a, mè ikpan̄ ene isan̄a me emen.
38 Eya itata, Josuwa mè otutuuk ebi Ijeren egwugwu ikom isi Debiri, mè isi itim akọn̄ me ama keya, 39 mè ibọkọ ama ya, mè otutuuk asabọn ama ife cha, mè itet ogwu ubọọn̄ ama ya, mè igwak ama ya, mè isa oge akọn̄ ikpan̄ otutuuk ebi ìkup me emen, kpesik kubọk ene ge. Ike ema erọbe Eburọn ke erọ Debiri mè ogwu ubọọn̄ kiban̄, kubọk erọbe si Libina mè ogwu ubọọn̄ kiban̄.
40 Sa me ikeya ke Josuwa otim akọn̄ ikpan̄ otutuuk lek ijọn̄ agan̄ ya, ibene me inyọn̄ ogoon̄ isi ire èwê agan̄ osiki, isi igwook me orioon̄ isi ogoon̄ agan̄ ichep-ura, mè isi ire lek ama òkup me ebon ogoon̄, melek otutuuk ebi ubọọn̄ kiban̄. Ene geege ìkasik me ugwem. Inu geelek òkifuuk efuuk, ekpakpan̄ isan̄a kpai, ike Okumugwem, Awaji ebi Ijeren onyibe ida ibe erọ. 41 Josuwa otitim ikpan̄ ebi ìluk me lek ijọn̄ ya, ibene me Kades Bania ire Gaja, mè otutuuk agan̄ Gosen, isi igwook me Gibiọn. 42 Otutuuk ebi ubọọn̄ chi melek ijọn̄ kiban̄ ke Josuwa obọkọ me ukot yaage, mije, îre Okumugwem, Awaji ebi Ijeren otim akọn̄ inyi ebi Ijeren. 43 Mgbọ Josuwa mè otutuuk ebi Ijeren etimbe akọn̄ cha ifieek, ema egwugwu ikom ika ere m̀gba-ǹgwele ukan̄ kiban̄ me Giligan.