Ijọn̄ ebi otoko kè Simiọn
19
Nriroon̄ eyi òso iba onenirọn̄ inyi ebi otoko kè Simiọn me owot iman me owot iman. Ìrot kiban̄ ìkup me etete ijọn̄ ebi otoko kè Juda. 2 Ema ekaan̄ Bieseba, mè Sieba, mè Molada, 3 mè Asari Suwali, mè Bala, mè Esem, 4 mè Elitoladi, mè Betulu, mè Oruma, 5 mè Sikilagi, mè Bet Marakabot, mè Asari Susa, 6 mè Bet Lebayot, melek Saruyen. Otutuuk kechi orere akọp mè ama ile ita melek asabọn ama kiban̄. 7 Ema ekaan̄ si Ayin, mè Rimọn, mè Eteri, melek Asan. Otutuuk kechi orere ama ile ini melek asabọn ama kiban̄, 8 mè otutuuk asabọn ama òkakana ama ile cha me ijọn̄ isi igwook me Bayalat Bie mè Rama òkup me èwê agan̄ osiki. Eyiyi ore ìrot ebi otoko kè Simiọn me owot iman me owot iman. 9 Ìrot eyi ebi otoko kè Simiọn, ekpọkọ me lek eyi ebi otoko kè Juda, mije, ìrot eyi ebi otoko kè Juda îmin igak ema. Eya orọ, ebi otoko kè Simiọn ebọkọ ìrot eyi kiban̄ me etete ìrot ebi otoko kè Juda.Ijọn̄ ebi otoko kè Jebulọn
10 Nriroon̄ eyi òso ita onenirọn̄ inyi ebi otoko kè Jebulọn me owot iman me owot iman. Okike ijọn̄ enyibe ema me ìrot îje isi igwook me Saridi, 11 mè inene iraka ifo agan̄ ichep-ura isi ire Mareyala, mè ije ichak me lek Dabaset, mè inyana ire lek òkpuku mun̄ òkup iriaak ama Jokineyam me isi agan̄ mbum-ura. 12 Bene me Saridi, okike ijọn̄ ya okakana inin̄ agan̄ mbum-ura itat me isi ura, isi ire okike ijọn̄ Kisilot Tabọ, mè iraka isi ire Daberat, mè inene ifo Jafiya, 13 mè isa ikeya ije iraka me agan̄ mbum-ura me lek Gat Eferi inyi agan̄ Eti Kasin, mè inyana igwook me Rimọn, mè ikana isi Niya. 14 Okike ijọn̄ ya onenikana me agan̄ inyọn̄ ifo Anaton, mè isi ita me emen iteke Jifita Eli. 15 Ofifi ama òkukup si me emen okike ijọn̄ ya ìre Kata, mè Nayalan, mè Simiron, mè Idala melek Beteleyem. Otutuuk orere akọp mè ama ile iba melek asabọn ama kiban̄. 16 Ama ile kechi melek asabọn ama kiban̄ ore ìrot enyibe ebi otoko kè Jebulọn me owot iman me owot iman.
Ijọn̄ ebi otoko kè Isaka
17 Nriroon̄ eyi òso ini onenirọn̄ inyi ebi otoko kè Isaka me owot iman me owot iman. 18 Okike ijọn̄ kiban̄ ìje ire Jesereli, mè ikpulu Kesulot, mè Sunem, 19 mè Afarayim, mè Siyon, mè Anayarat, 20 mè Rabit, mè Kison, mè Abes, 21 mè Remet, mè En Ganim, mè En Ada, melek Bet Pases. 22 Okike ijọn̄ ya îje ire Tabọ, mè Sayajima, mè Bet Semes, mè isi ita me lek okwaan̄ Jodan. Otutuuk orere akọp mè ama ile gweregwen melek asabọn ama kiban̄. 23 Ama ile kechi melek asabọn ama kiban̄ ore ìrot ebi otoko kè Isaka me owot iman me owot iman.
Ijọn̄ ebi otoko kè Ase
24 Nriroon̄ eyi òso go onenirọn̄ inyi ebi otoko kè Ase me owot iman me owot iman. 25 Okike ijọn̄ kiban̄ îkpulu Elikat, mè Ali, mè Beten, mè Akisafu, 26 mè Alamelek, mè Amadi, melek Misali. Ijọn̄ ya îje ire lek ogoon̄ Kamen me agan̄ ichep-ura, mè ire Siyoru Libinat. 27 Inenikọnọ ifo agan̄ mbum-ura isi Bet Dagọn, mè ije ichak me lek otubọk ijọn̄ ebi otoko kè Jebulọn melek iteke Jifita Eli, mè ikana inin̄ agan̄ inyọn̄ ifo Bet Emek mè Neyien, mè iraka Kabun me agan̄ ujit, 28 mè igọbọ Abidọn, mè Reyobu, mè Amon, mè Kana, mè isi ire Sidọn ile. 29 Ere keya ke okike ijọn̄ ya ofiaka ikana isi ire Rama, mè iraka ifo Taya, ama mgban okanabe, mè iben ikana ifo Osa, mè inisibi me lek okwaan̄ ile Mediterenia me agan̄ ama Akijip. 30 Ama Uma, mè Afek, mè Reyobu me lek. Otutuuk orere akọp ama ile iba mè iba melek asabọn ama kiban̄. 31 Ama ile kechi melek asabọn ama kiban̄ ore ìrot ebi otoko kè Ase me owot iman me owot iman.
Ijọn̄ ebi otoko kè Nafitali
32 Nriroon̄ eyi òso gweregwen onenirọn̄ inyi ebi otoko kè Nafitali me owot iman me owot iman. 33 Okike ijọn̄ kiban̄ ìbene me Elefu, mè ikpulu otutuuk ijọn̄ òbene me lek uti ile me Sayananim iraka ire Adami Nekep, mè Jabinen isi ire Lakum, mè isi ita me lek okwaan̄ Jodan. 34 Me ere ya, okike ijọn̄ ya ogwagwaka inin̄ agan̄ ichep-ura isi ire Ajinot Tabọ, mè isa ikeya iraka ire Ukok, mè isi ichak me otubọk ijọn̄ ebi otoko kè Jebulọn me agan̄ osiki, mè ire si lek otubọk ijọn̄ ebi otoko kè Ase me agan̄ ichep-ura, mè inita me otubọk ijọn̄ ebi otoko kè Juda me lek okwaan̄ Jodan me agan̄ mbum-ura. 35 Ama mgban okanabe echi òninin̄ inyi ema ìre Sidim mè Seri, mè Amimat, mè Rakat, mè Kineret, 36 mè Adama, mè Rama, mè Asọru, 37 mè Kedes, mè Ederei, mè En Asọru, 38 mè Yiron, mè Migidan Eli, mè Orem, mè Bet Anat, mè Bet Semes. Otutuuk orere akọp mè ama ile onaan̄ge melek asabọn ama kiban̄. 39 Ama ile kechi melek asabọn ama kiban̄ ore ìrot ebi otoko kè Nafitali me owot iman me owot iman.
Ijọn̄ ebi otoko kè Dan
40 Nriroon̄ eyi òso jaaba onenirọn̄ inyi ebi otoko kè Dan me owot iman me owot iman. 41 Okike ijọn̄ enyibe ema me ìrot ìre Sora, mè Esitayon, mè Iri Semes, 42 mè Sayalabin, mè Ajalọn, mè Itila, 43 mè Elọn, mè Timina, mè Ekurọn, 44 mè Eliteke, mè Gibeton, mè Bayalat, 45 mè Jeyudu, mè Bene Berak, mè Gat-Rimọn, 46 mè Meyi Jarikọn, mè Rakon, melek ijọn̄ òkup iyaka isi ikpọ Jọpa.
47 Ijọn̄ ebi otoko kè Dan ìyaka me ere keya. Ebi otoko kè Dan, enenitim akọn̄ me lek ebi ama Lesem, mè ibọkọ ama ya. Ema ekpakpan̄ ebi ama ya isan̄a, mè iraka ama ya iluk, mè inwene ama Lesem erieen̄ ikigwen Dan, òrere erieen̄ nte nte kiban̄ ukot ikaan̄. 48 Ama ile kechi melek asabọn ama kiban̄ ore ìrot ebi otoko kè Dan me owot iman me owot iman.
Ijọn̄ enyibe Josuwa
49 Mgbọ ema edọmọbe ijọn̄ cha me okike me okike inyi me ìrot isan̄a, ebi Ijeren eneninyi Josuwa gwun̄ kè Nun ìrot eyi kan̄ me etete kiban̄. 50 Sa me ikọ Okumugwem otumube, ema enyi ọmọ ama eyi îdobe. Ama ya ìre Timinat Sera me inyọn̄ ijọn̄ ogoon̄ ogoon̄ ebi otoko kè Iferem. Josuwa onanama ama ya, mè iluk me emen.
51 Echichi ore ìrot echi Elieja ogwu ngwugwa, mè Josuwa gwun̄ kè Nun, mè ebi ibot otoko ebi Ijeren eroon̄be nriroon̄ isa iche me Silo me isi Okumugwem me isotu Atanga Chinichini. Ikeya ke ema eche ijọn̄ cha isan̄a.