Ido echi òsisik me lek ijọn̄ Kenan
3
Ido kechi ìre ido Okumugwem otelebe ibe isik, inyi ọmọ môsa ema iroon̄ otutuuk ebi Ijeren, ebi kpetim-nu akọn̄ geege me Kenan ikpọ. 2 Okumugwem ìrọ inu yi, inyi ọmọ isa me ikeyi ijeen̄ ebi owot iman ebi Ijeren geelek ukot akọn̄, ògak ge, ebiba ebi kperarak itim akọn̄ me ugwem kiban̄. 3 Ido cha ìre: ido ebi ubọọn̄ Filisia go, mè otutuuk ebi Kenan, mè ebi Sidọn, mè ebi Ifi ìkiluk me inyọn̄ ogoon̄ echi òkup me Lebanọn, ibene me ogoon̄ Baali-Emọn mege isi igwook me utibi ogoon̄ Amat. 4 Okumugwem ìtele ibe ido chi isik, inyi mêsa me lek kiban̄ iroon̄ ebi Ijeren ikpọ mè ìre mêgwu ikom isi ikirọ ikọ Okumugwem otọbe inyi ebi nte nte kiban̄ inan̄a me otu kè Mosis.5 Mije keyi, ebi Ijeren eluluk me etete ebi Kenan, mè ebi Et, mè ebi Amọ, mè ebi Pereji, mè ebi Ifi, mè ebi Jebus. 6 Ema ekekido bọn ebibaan̄ ebi ife cha me lek nwa, mè ikisa bọn ebibaan̄ kiban̄ iche olom inyi ife cha, mè ikigọọk ife cha itọbọ ebum inyi awaji kiban̄.
Otinien îkana ogwu ibot oyerebet me Ijeren
7 Ebi Ijeren erọrọ ijo inu me chieen̄ Okumugwem, mè iwuuk Okumugwem Awaji kiban̄, mè ikana igọọk ikisi itọbọ ebum inyi ebi kè Baali mè ebi kè Asera. 8 Okumugwem onanaan̄ ejit enenen me lek ebi Ijeren, mè ikana ema itap me ubọk kè Kusan-Risatayim ogwu ubọọn̄ Aram Nayarayim.a Ogwu ubọọn̄ yi otitim ikpan̄ ebi Ijeren, ema eninin̄ usun̄ inyi ọmọ otuuk kè acha jeeta. 9 Ema enenikup me irak usun̄ ya ito ito igwen Okumugwem, Okumugwem onọnọ, mè inisan̄a enerieen̄ ge isibi me etete kiban̄, ogwu ònitaba ema isibi. Ogwu enerieen̄ ya ìre Otinien, gwun̄ kè Kenaji, ngwan̄ kè Kelep ogwu ijija. 10 Ekwukwu Okumugwem oneninin̄ emen kè Otinien, mè irọ inyi ọmọ ikana ogwu ibot oyerebet inyi ebi Ijeren. Otinien onenisa ebi Ijeren isi itim akọn̄ me lek kè Kusan-Risatayim, ogwu ubọọn̄ Aram ya. Okumugwem otatap ubọk inyi ọmọ, ititim ikpan̄ ogwu ubọọn̄ ya. 11 Esuuk okukup me lek ijọn̄ ya akọp acha ini, ire mgbọ Otinien gwun̄ kè Kenaji okwube.
Ewudu îkana ogwu ibot oyerebet me Ijeren
12 Ebi Ijeren enenikpọk ikirọ ijo inu me chieen̄ Okumugwem. Mije keyi, Okumugwem onyinyi Egulọn ogwu ubọọn̄ Mowabu unye, inyi itim akọn̄ ikpan̄ ebi Ijeren, mije ijo inu ya ema erọbe. 13 Egulọn osisi itọt melek ebi Amọn mè ebi Amalek, mè inisa ife cha igbaalek ijibi akọn̄ isi itim me lek ebi Ijeren, mè itim ikpan̄ ema, mè ibọkọ ama Jeriko, ama uti asaak ojotbe emen ya. 14 Ebi Ijeren enenikana usun̄ inyi Egulọn ogwu ubọọn̄ Mowabu otuuk kè akọp mè acha jeeta.
15 Ebi Ijeren ekukup me irek usun̄ kiban̄ ikpọk ito ito igwen Okumugwem. Okumugwem onọnọ, mè ininyi ema ofifi ogwu unyan̄a, òrere Ewudu gwun̄ kè Gera ogwu otoko kè Benjamin. Ewudu yi ìre ogwu ujit ubọk. Ebi Ijeren eneniria Ewudu ibe isa otitip mkpulu kiban̄ ijet Egulọn ogwu ubọọn̄ Mowabu. 16 Sabum Ewudu onisi ikwaan̄ yi, îrọ ubuja isi iba òrereke, mè ijọn̄ọ iso agbagba otubọk iba, inyi lek kan̄, mè iben ubuja ya ibọp ikam me owut-ukot kan̄ agan̄ ulom, mè itap ofọnti ichit. 17 Mgbọ îrebe ere ya me ido Mowabu, isasan̄a otitip mkpulu ya isibi isa inyi Egulọn ogwu ubọọn̄ Mowabu. Ogwu ubọọn̄ yi ìre enerieen̄ òmimin ufuk enenen. 18 Ewudu inyinyi ogwu ubọọn̄ otitip mkpulu ya isan̄a, ineniria ebirieen̄ ebi ìbebeme otitip cha isa igọọk ọmọ inu itap me oniin̄ ibe efon. 19 Mgbọ ema ejebe ire ere ekibum ewuuk me agba lek ama Giligan, Ewudu ogwugwu ikom isi lek ogwu ubọọn̄ ya, mè inisi itumu inyi ibe, “Me ulibi kwun̄, ogwu ubọọn̄, nkaan̄ nlelet etip ge mbalook owu.”
Ogwu ubọọn̄ ya otutumu inyi ebi ikwaan̄ kan̄ ebi melek kan̄ ekupbe me ere ya ibe enyi ema irek-nu. Otutuuk ebi ikwaan̄ kan̄ cha esisibi itele ọmọ melek kè Ewudu gaalek.
20 Ogwu ubọọn̄ ya ìsiki ikweek ọmọ gaalek me agwut kan̄ òtọtọọk me uwu inyọn̄ kan̄. Ewudu ojeje inu me lek kan̄, mè initumu inyi ibe, “Nkaan̄ etip ònan̄a me ubọk Awaji, eyi mbanilook owu.” Mgbọ ogwu ubọọn̄ ya onan̄abe me inyọn̄ ikasi kan̄ ikeke, 21 Ewudu otatap ubọk agan̄ ujit kan̄ me emen ofọnti, mè iwọọk ubuja isi iba ya isibi me owut-ukot kan̄ agan̄ ulom, mè isa ichim inwaan̄ me owot ogwu ubọọn̄. 22 Ubuja isi iba ya ogwọgwọt inin̄ emen owot ogwu ubọọn̄ ya, mè ichep ita ire lek ibot inin̄ emen owot ogwu ubọọn̄ ya, okpọn̄ ogbọgbọọk ikana ichit ubuja ya. Ewudu ìkataba ubuja ya ìsibi me owot ogwu ubọọn̄ ya, ubuja ya otitibi isibi me agan̄ udun̄, me agbagba ukot kan̄.b 23 Ewudu ogwugwuk otutuuk afọn̄ òkup me lek uwu inyọn̄ ya, mè igon ema otutuuk, mè isaba isibi ikeke me agba oyet, mè isibi ifo.
24 Ewudu îsibi ifo isan̄a sabum ebi ikwaan̄ ogwu ubọọn̄ eninu, mè inimun̄ ibe ke egogon otutuuk afọn̄ uwu inyọn̄ ya. Ema enenikikeek ibe ke ogwu ubọọn̄ ìkinwun ukot me uwu inyọn̄ ya, ke îre eya orọ îgonbe otutuuk afọn̄. 25 Mgbọ ema ekekebe igak, kpemun̄ ubọk ogwu ubọọn̄ ogwukube isotu uwu inyọn̄ ya geege, ineniyọt ema me lek. Ema enenimọnọ atafi isa isi igwuku afọn̄, mè iraka inin̄ uwu, mè isi imun̄ nte uwu kiban̄ okwube ilaak inyana me ijọn̄.
26 Mgbọ ema ekupbe me ere ya ikikpọ ibe ogwu ubọọn̄ ichili isotu cha, Ewudu olilibi inwọnọ. Îraka ere ekibum ewuuk ya, mè ilibi ifo ama Seyira. 27 Mgbọ îrebe ama ya, ikukup me inyọn̄ ijọn̄ ogoon̄ ogoon̄ otoko kè Iferem ya, mè iwut otita akọn̄ isa igween̄ ebi Ijeren ititiin̄. Otutuuk ebi ene egbugbuku inan̄a me inyọn̄ orioon̄ geelek isibi igọọk ọmọ. Ọmọ okekije me isi kiban̄.
28 Inenibe ema, “Ìgọọk emi, mije ke Okumugwem îra ikana otutuuk ido Mowabu, ebi ochicha kinyi, itap enyi me ubọk.” Ema egbugbuku igọọk ọmọ ikwala isibi isi itim akọn̄ ya, mè ibọkọ otutuuk ere geelek ekije isaba okwaan̄ Jodan isi ido Mowabu. Kpetele ibe ogwu Mowabu geege isaba okwaan̄ ya. 29 Ema ekukup me ere ya ikpan̄ inu òsoso akọp obop ebi akọn̄ Mowabu ìrọriọọn̄ ukot akọn̄ ichit, mè inye lek, ogwu Mowabu geege ìkanwọnọ. 30 Bene me usen ya, ebi Mowabu eninin̄ usun̄ inyi ebi Ijeren. Esuuk okukup me lek ijọn̄ ya akọp acha jeeta.
Samiga îkana ogwu ibot oyerebet me Ijeren
31 Ofifi ogwu ibot oyerebet ògọgọọk Ewudu ìre Samiga, gwun̄ kè Anat. Îre ọmọ osa uti ekisa ichim eriembuuk, inyi ije ije, ikpan̄ efit ebi Filisia gweregwen. Ọmọ si me otu ifuk ebi ìtataba ebi Ijeren isibi mgbọ ufialek kiban̄.