4 Ìkafiin̄, ogwu òje isi akọn̄ ge ekigwen Golayat, ogwu ama Gat, oneninan̄a me orieen̄ akọn̄ ebi Filisia isibi inu inikeke. Ogwu enerieen̄ ya îjọn̄ọ iso ejit ge mè agbagba otubọk go. 5 Ogwu enerieen̄ ya îkwuun̄ okpibot akọn̄ eyi ekwe me ibot, mè itap ofọnti akọn̄ eyi ekwe òkup lek ikpọk irin̄ ikpọk irin̄. Ulobo ofọnti ekwe ya îso akọp kilo go mè jaaba. 6 Îkwaan̄ si ukwek-ukot eyi ekwe ichit isi ukot kan̄ iba, mè ijeen̄ otubọ eyi ekwe me oguga kan̄. 7 Ukut otunwa kan̄ ìmin kubọk uti ilọk-ekwut, okwukwut otu otunwa ya îlobo iso kilo jaaba. Ogwu òbeme agbọ kan̄ okekije me isi kan̄.

8 Golayat yi onenisibi ikeke, mè ikitaan̄ ukpo ikitumu inyi urum akọn̄ ebi Ijeren cha ibe, “Eyi enyi esibibe inititiin̄ me ere keyi, ìre ìkare akọn̄ ke enyi ebenitim me lek ebi Filisia? Ìre emi ǹkare ogwu Filisia ni? Enyi ebi usun̄ kè Sọọlu kechi! Ìgobo ene ge me etete kinyi, mè ikwala isibi inu-nu me lek n̄a. 9 Ire ikọt itim akọn̄ me lek n̄a, mè ikpan̄ emi, eji ebi Filisia mêkana ebi usun̄ inyi enyi. Ire, ire emi mkpan̄ ọmọ, enyi mênenikana ebi usun̄ inyi eji, mè ikisi ikwaan̄ inyi eji.” 10 Golayat ogwu òje isi akọn̄ ebi Filisia ya okekitumu ibe, “Ǹkitọtọ enyi otutuuk urum akọn̄ ebi Ijeren ubọk me isi cherekeyi! Ìnyi emi ene ge, inyi eji etim akọn̄!” 11 Mgbọ Sọọlu mè otutuuk ebi akọn̄ Ijeren enọbe ida kè Golayat ogwu Filisia ya, mbiribọ ogwogwook ichit ema lek, ukpook oninin̄ igak ema emen.

12 Debit ìre gwun̄ kè Jesi, ogwu Efarata ònan̄a me ama Beteleyem òkup me agan̄ ebi otoko kè Juda. Jesi ìkaan̄ ibot bọn ebirieen̄ jeeta. Me ukot mgbọ Sọọlu orebe ogwu ubọọn̄, Jesi îkan enenen me otu ifuk acha kan̄. 13 Bọn ebirieen̄ ita kè Jesi, ebi ìrere ugane ichit, mînan̄a igọọk Sọọlu isi akọn̄. Erieen̄ kiban̄ ìre Eliabu, òrere adasi gwun̄, mè Abinadap, òrere ogwu òso iba, mè Sama, òrere ogwu òso ita. 14 Debit ore ogwu uchit-owot. Ebi ugane ita cha mîgọọk Sọọlu, kpeyaka igwu ikom ika. 15 Ire, Debit ìkisi ikwaan̄ inyi agan̄ iba. Isikup me uwu kè Sọọlu ogwu ubọọn̄ isi ikwaan̄ sọnja mgbọ, îra iyaka igwu ikom ika inu Beteleyem inikpọ chieen̄ me lek arọọn̄ ogwu ute.

16 Golayat ogwu òje isi akọn̄ ebi Filisia ya okpọkpọ ikisibi inu ewelegwe mè ikakwun̄ inikigigam ebi akọn̄ ebi Ijeren otuuk kè akọp usen ini.

17 Usen ge, Jesi onenitumu inyi ogwu gwun̄ Debit ibe, “Nye lek na ben okwun akọp kilo akpa ekakala chi mè akọp owut fituru chi, mè gwat lek sa libi jet ebi ngwan̄ kwun̄ me orieen̄ akọn̄ kiban̄. 18 Mọnọ si akọp okpọkọ okpukpuk mun̄ ebe eriembuuk chi sa che nyi ogwu ibot urum akọn̄ kiban̄. Osire, si kpọ ebi ngwan̄ kwun̄, mè week riọọn̄ ubọk inu okije me lek kiban̄, mè sa etip kiban̄ na look emi.” 19 Me mgbọ ya, Sọọlu mè ebi ngwan̄ kè Debit mè otutuuk ebi akọn̄ Ijeren ekup me iteke ijọn̄ Ela, ere ema ekitim akọn̄ me lek ebi Filisia.

20 Debit onanan̄a ikeke me ata otu ewelegwe ofit iwele kan̄, mè ijuuk arọọn̄ ogwu ute itele me ubọk ogwu òkpukpo arọọn̄, mè inan̄a ije ya kubọk ogwu ute Jesi onyibe ida ibe ọmọ irọ. Mgbọ Debit orebe orieen̄ akọn̄ ebi Ijeren, ìkpọkpọ inire mgbọ ya ke ebi akọn̄ Ijeren ekitiki akọn̄ ikisibi inu ibesi isi akọn̄. 21 Ebi akọn̄ Ijeren mè ebi akọn̄ Filisia enenikeke me isi akọn̄, kpa ogwu me agan̄ kan̄, agan̄ ge obene chieen̄ ikikpọ agan̄ ge. 22 Debit ojujuuk inorie cha îsabe inu itele me ubọk ogwu akọn̄ ogwu òkikpọ chieen̄ me lek inorie, mè ilibi ekot ekot ifo isi akọn̄ isi ichichini melek ebi ngwan̄ cha, mè ikido ema ubọk inu okupbe. 23 Debit òkitumu ikọ ya me otu, ogwu òje isi akọn̄ ya, Golayat ogwu Filisia, ogwu ama Gat, owọwọọk inan̄a me isi akọn̄ ebi Filisia isibi inikeke, mè ibene ikigigam ebi akọn̄ Ijeren ike îwuukbe lek ikirọ. Debit onọnọ. 24 Ebi akọn̄ Ijeren ibebene chieen̄ itoon̄ ene ya me lek, ukpook otetet ema enenen, otutuuk kiban̄ elilim ita kpai me isi kan̄.

25 Ebi akọn̄ Ijeren ekekitumu ibe, “Ke enyi mîmun̄ ene yilọ òkinene inu, ìkinu initọ ebi Ijeren ubọk me isi. Ene geelek òkọkọt ikpan̄ ene yi, ogwu ubọọn̄ môtap ene ya ikpele ubọọn̄, mè isa gwun̄ kan̄ enenwaan̄ inyi ene ya me lek nwa. Ebi uwu nte ene ya si kpebeyaka ikikpe otitip ido me otutuuk Ijeren, kpebekirọ si ikwaan̄ ido geege.”

26 Debit onenikido ebi akọn̄ ìkup me agba lek kan̄ me ere ya ibe, “Ogwu ikpan̄ ogwu Filisia yi, mè isan̄a itiik kechi me lek ebi Ijeren, ìre keke ke eberọ inyi ene ya? Ogwu Filisia yi ìre ekene mọnọ? Ìkpọ-nu ubọk ogwu kpefieek afi yi okinitọ ubọk me isi urum akọn̄ Awaji ogwu òkup me ugwem!”

27 Ebi ìkup me ere ya ebeben si ikọ ema ewuukbe lek ikitumu ya iyaka itumu si inyi Debit, mè ibe ke îre ikeya ke eberọ ene geelek òkọkọt ikpan̄ ogwu enerieen̄ ya. 28 Eliabu, ngwan̄ kè Debit ogwu ugane, okukup inọ ikọ ya Debit okitumu inyi ebi ife cha, mè inaan̄ ejit inyi Debit, mè ikigana inyi Debit ibe, “Eyi keyi ye? Ònu eke me ere keyi? Ìre òtele arọọn̄ inen mè inen cha òkup me oron inyi ekene? Owu gwun̄ sonson lek keyi! Emi nriọọn̄ inu ikpak òkup owu me ejit! Nriọọn̄ ibe ke owu ònu me ere yi inenikpọ ubọk ekitim akọn̄!”

29 Debit ofọfọọk ibe, “Keke ke nyaka irọ mgbọ keyi? Ìre ìkare ukpọk ukpọk lek ikọ gaalek ke ndo?” 30 Debit onanan̄a me ere ya ije isaba ifo ofifi agan̄, mè ikido si ebi ene chieen̄ ikọ yaage. Ebiba efọfọọk si ọmọ inu yaage kubọk ebilọ ewuukbe lek ifọọk. 31 Ebi ene enọnọ ikọ cha Debit okitumu, mè iben isi ikpa inyi Sọọlu. Sọọlu oraria etip ibe egwen Debit ejet ọmọ.

32 Debit onenitumu inyi Sọọlu ibe, “Ogwu ubọọn̄, ene geege ikafieek owot mije ogwu Filisia yilọ. Emi ogwu usun̄ kwun̄, mâsi itim akọn̄ me lek ogwu enerieen̄ ya, mè itim ikpan̄ ọmọ.”

33 Sọọlu otutumu inyi Debit ibe, “Owu òkpokọt ije inin̄ lek ogwu Filisia yilọ isi itim akọn̄ me lek, mije, owu ìre sọntiik gwun̄. Ire, ogwu enerieen̄ yi ìre ogwu usọ akọn̄ òtitim akọn̄ karake ijija kan̄.”

34 Debit otutumu inyi Sọọlu ibe, “Emi ogwu usun̄ kwun̄ ǹkikup me oron ikikpukpo arọọn̄ kè nte n̄a. Egbe àtat mè ìre ibo nriọk isinu initet arọọn̄ me etete urum arọọn̄ cha, 35 emi nra isibi igọọk, mè isulu, mè ibọkọ arọọn̄ ya isan̄a me otu kan̄. Ijo anam ya isigwu ikom ibumu chieen̄ inin̄ emi lek, nra itet ọmọ me lek inwọọn̄ kan̄ ya, mè isulu ikpan̄. 36 Emi ogwu usun̄ kwun̄ nra ikpan̄ egbe àtat, mè ikpan̄ ibo nriọk. Ogwu Filisia yi ìbokup kubọk ge me etete chieen̄ anam iba chi, mije, ìkitọ ubọk me isi urum akọn̄ Awaji ogwu òkup me ugwem. 37 Okumugwem ogwu ònyanyan̄a emi isibi me otu egbe àtat mè otu ibo nriọk mônyan̄a emi isibi si me ubọk ogwu Filisia yi.”

Sọọlu otutumu inyi Debit ibe, “Je! Okumugwem ikup melek kwun̄!”

38 Sọọlu onenikpulu àwurukù irak itap Debit, mè ikwuun̄ ọmọ okpibot akọn̄ esabe ekwe irom, mè iniben ulobo ofọnti akọn̄ òkup lek ikpọk irin̄ ikpọk irin̄ ikwaan̄ Debit me lek. 39 Debit onenimọnọ òge akọn̄ kè Sọọlu melek fanti itobo me inyọn̄ àwurukù irak ya, mè iniroon̄ lek isasa ulobo nroon̄ akọn̄ cha me lek ije. Ire, ìkafet, mije, ìkawuuk lek ìkitap ojelek nroon̄ akọn̄ cha.

Itutumu inyi Sọọlu ibe ke ọmọ ìkpokọt isa nroon̄ akọn̄ cha me lek ije ije, mije, ke ọmọ ìkararak ìtap ojelek nroon̄ akọn̄ kecha. Iwọwọọk nroon̄ akọn̄ cha isan̄a me lek kan̄, 40 mè ito ubọk imọnọ mkpat ogwu òkpukpo arọọn̄ kan̄ ikaan̄, mè ije isi emen odidim òkup me ere ya, mè iteen̄ asabọn ewuuk go òrọrọt lek itap me emen akpa ogwu òkpukpo arọọn̄ kan̄, mè imọnọ olik mgbọlọ kan̄ ikaan̄ me ubọk, mè ikije ikweek ogwu òje isi akọn̄ ebi Filisia ya.

41 Ogwu Filisia ya okekije itap me lek kè Debit, ogwu òbeme agbọ kan̄ okekije me isi kan̄. 42 Ogwu Filisia ya obebene chieen̄ ikpọ Debit, mè imun̄ ibe ke îre gaalek sọn̄ gwun̄, mè imun̄ si ibe ke înwọn lek mè ijaan̄ uja. Mije keya, ijọjọ ejit me lek kè Debit. 43 Ogwu Filisia ya otutumu inyi Debit ibe, “Eyi omọnọbe uti ikaan̄ me ubọk isa ikije inin̄ emi lek, ìre emi ìre ibo ni?” Ibebene ikisa erieen̄ awaji kiban̄ ikigbo Debit, 44 mè ikitumu inyi Debit ibe, “Je na, mè ǹsa ufuk akpalek kwun̄ ǹnyi ebi kè unọn òwulu me inyọn̄, mè ebi kè anam oron etaka!”

45 Debit otutumu inyi ogwu Filisia ya ibe, “Eyi kwun̄, oge akọn̄ mè otunwa mè otubọ ke owu osa inu akọn̄ me lek n̄a. Ire, emi ǹnu akọn̄ me lek kwun̄ me erieen̄ Okumugwem Ogwukaan̄ Inyọn̄ mè Ijọn̄, òrere Awaji ebi urum akọn̄ ebi Ijeren ebi owu okitọ ubọk me isi. 46 Me cherekeyi, Okumugwem môyaka owu itap emi me ubọk. Cherekeyi, emi mâkpan̄ owu, mè ifieek ibot kwun̄ isan̄a me lek kwun̄, mè isa ufuk akpalek ebi urum akọn̄ ebi Filisia inyi ebi kè unọn òwulu me inyọn̄ mè ebi kè anam oron. Mgbọ ya otutuuk ebi linyọn̄ mêneniriọọn̄ ibe ke Awaji ọmọ òwa me Ijeren. 47 Otutuuk ebi ìtitiin̄ me ere yi me chereyi mêneniriọọn̄ ibe ke ìkare oge akọn̄ mè otunwa ke Okumugwem okisa inyan̄a ene, ke akọn̄ yi ìre eyi Okumugwem. Mije, Okumugwem môyaka enyi itap eji me ubọk.”

48 Ike ogwu òje isi akọn̄ ebi Filisia ya okije itap Debit me lek, Debit ogwagwat lek ilibi ekot ekot ifo isi akọn̄ ebi Filisia isi ikweek ọmọ, 49 mè itap ubọk me emen akpa kan̄, mè imọnọ gwun̄ ewuuk ge inwaan̄ me lek olik mgbọlọ kan̄, mè isa itọbọ ogwu isi akọn̄ ebi Filisia ya. Ewuuk ya ototoon̄ ogwu ibot ebi Filisia ya me inyọn̄ okwut isi, mè igwọt iraka inin̄ emen okwut isi ogwu ene ya. Ogwu Filisia ya ogbugbugbọ irọn̄, mè isa isi kan̄ ikana ichit me ijọn̄. 50 Sa me ikeyi ke Debit osa olik mgbọlọ mè ewuuk ikike gaalek itim ikpan̄ ogwu isi akọn̄ ebi Filisia ya, mè ikpan̄ ọmọ, me kpunube oge akọn̄ geege me ubọk kè Debit.

51 Debit olilibi inin̄ lek ogwu Filisia ya, mè ikeke igba, mè iwọọk oge akọn̄ ogwu ene ya isibi me ogan, mè isa ikpan̄ ọmọ, mè ifieek ọmọ ibot isan̄a me lek ekirikit. Mgbọ ebi akọn̄ Filisia emun̄be ibe ke ogwu òje isi akọn̄ kiban̄ îkwu, ema elililiin̄ iyiyala. 52 Ebi akọn̄ Ijeren mè ebi Juda ejijibi ibene, mè itiki akọn̄, mè ikigọọk ebi Filisia abayaage isi ire Gat,^a mè iraka isi igwook me otunchit ama Ekurọn. Ebi Filisia ekwakwaan̄, mè irurọn̄ọ ijot lek oniin̄, ibene me oniin̄ òkisi Seyarayim mege isi igwook me Gat mè Ekurọn. 53 Mgbọ ebi Ijeren elilababe ebi akọn̄ Filisia, mè ikpan̄ ema isan̄a, egwugwu ikom ika, mè ininin̄ mfum me emen orieen̄ akọn̄ ebi Filisia ya, mè ijijaka ere ya igwook. 54 Debit obeben ibot kè Golayat ogwu òje isi akọn̄ ebi Filisia ya, mè isa inu Jeruselem, mè ikpulu otutuuk nroon̄ akọn̄ kè Golayat isa initap me emen uwu ọfọ kan̄.

55 Mgbọ Sọọlu omun̄be Debit okije isibi ibosi ichichini Golayat ogwu òje isi akọn̄ ebi Filisia me isi akọn̄ ya, igwegwen Abina, ogwu ibot akọn̄ ebi Ijeren, mè ido ibe, “Abina, gwun̄ enerieen̄ yilọ ìre gwun̄ kè ekene?”

Abina ofọfọọk ọmọ ibe, “Ogwu ubọọn̄, kè lek kwun̄, emi ǹkariọọn̄ gwun̄ ogwu îrebe.”

56 Ogwu ubọọn̄ onenitumu inyi Abina ibe, “Si week riọọn̄ gwun̄ ogwu îrebe.”

57 Mgbọ Debit okinan̄a me isi akọn̄ ere îkpan̄be Golayat ogwu Filisia ikika, Abina osasa Debit, melek ibot kè Golayat ogwu Filisia ya me ubọk, inu me isi kè Sọọlu. 58 Sọọlu ododo Debit ibe, “Gwun̄ enerieen̄, ìre owu ìre gwun̄ kè ekene?”

Debit ofọfọọk ibe, “Emi ìre gwun̄ ogwu usun̄ kwun̄ Jesi, ogwu Beteleyem.”