2 Jonatan otutumu inyi Debit ibe, “Awaji gwak fiin̄! Owu òkabokwu! Kpunu inu geege nte n̄a oborọ, mè ìre ilile mè ìre sọntiik, eyi ìkpotumube inyi emi. Nte n̄a ìjeje inilet emi inu keyi me lek? Ikọ keyi ìkpokọt ire atikọ!”

3 Debit okpọkpọk inyan̄a ibot, mè itumu inyi Jonatan ibe, “Me atikọ, nte kwun̄ îriọọn̄ ibe ke owu oma emi enenen. Eya orọ ikaweekge ibe owu òriọọn̄, inyi owu okafieek ejit. Ire, kè lek ugwem Okumugwem, mè kè lek kwun̄, ǹkirọ inyi owu òriọọn̄ ibe ke îre otu udọn̄ mkpa ke nkup mgbọ keyi!”

4 Jonatan onenitumu inyi Debit ibe, “Ìre keke ke oweek ibe emi ǹrọ ǹnyi owu? Tumu, ke mârọ inyi owu!”

5 Debit onenitumu inyi Jonatan ibe, “Kpọ, ijọk Aya Onyan̄ ìbobene me iyakwut. Mgbọ ya ìre mgbọ nkigọọk nte kwun̄ ikup me lek ikasi irie inorie ijọk ya. Ire, mâsi iweek ere ilet me emen oron mege ire uban̄akwut. 6 Ire nte kwun̄ ido ibe sà emi ye, tumu nyi ibe ke m̀bọbọkọ unye me ubọk kwun̄, mè inan̄a ije isi igọọk igwa ngwugwa ibot acha eyi otutuuk ebi ototun̄ ukan̄ kiji me Beteleyem. 7 Ire nte kwun̄ ifọọk ibe ke înwọn, ìsibi ibe ke emi ogwu usun̄ mâkup me esuuk. Ire, ire nte kwun inaan̄ ejit enenen, kpọkpọ riọọn̄ ibe ke nte kwun̄ îben me ejit ikpakpan̄ emi. 8 Soso, kaan̄ ejit nsan me lek n̄a, mije, owu onyan̄a ibot melek n̄a me erieen̄ Okumugwem. Ire owu omun̄ ibe ke îkaan̄ inu nrọbe ilọ, owu sa ubọk kwun̄ gaalek kpan̄ emi. Kasa emi ìnyi nte kwun̄ ikpan̄.”

9 Jonatan onenifọọk Debit ibe, “Awaji gwak ifiin̄! Emi m̀kpakọt iriọọn̄ ibe ke nte n̄a òkitọt ijo inu ibak owu, mè itele itutumu inyi owu.”

10 Debit oyayaka inido Jonatan ibe, “Ire nte kwun̄ ifọọk owu otu uyọt uyọt, ìre ekene obonitumu inyi emi?”

11 Jonatan onenitumu inyi Debit ibe, “Na-nu, inyi eji eneje enin̄ otu oron.” Ema ene iba egbagbaan̄ inan̄a isibi ije inin̄ otu oron.

12 Jonatan onenitumu inyi Debit ibe, “Kpọ, ǹkisa erieen̄ Okumugwem, Awaji ebi Ijeren inyan̄a ibot inyi owu, ibe, ike mgbọ keyi me uban̄akwut mâweek iriọọn̄ inu nte n̄a okitọt ibak owu. Ire ikaan̄ ata ekiket ibak owu, m̀kpalọlọ iraria etip ijet owu, inyi owu òriọọn̄. 13 Ire, ire mweek iriọọn̄ ibe ke îre ijo otitọt ke nte n̄a okitọt ibak owu, m̀kpalọlọ si iraria etip ijet owu, inyi owu òsa ata mgbọ òlibi òweek agan̄ ebek ugwem kwun̄, mè òfo me esuuk. Ire ǹkarọ use yi ìso, Okumugwem isulu emi osusut ubọk geelek òneme ọmọ. Okumugwem ikup melek kwun̄ ubọk îkupbe melek kè nte n̄a. 14 Ire, katele ikakaan̄ ejit nsan Okumugwem me lek n̄a, mè ìre ǹkukup me ugwem, mè ìyaka ire ǹkwukwu. 15 Mege isi ire mgbọ geelek, katele ikakaan̄ ata ejit me lek ebi uwu n̄a, ikerere mgbọ Okumugwem môfieekbe ugwem otutuuk ebi ochicha kwun̄ isan̄a me otutuuk linyọn̄.”

16 Jonatan oneninyan̄a ibot inyi ebi uwu kè Debit ibe mè Okumugwem ido useen̄ me ubọk ebi ochicha kè Debit. 17 Jonatan okpọkpọk inyan̄a ibot melek kè Debit mije imumechieen̄ îkaan̄be me lek kè Debit. Mije, Jonatan îma Debit kubọk îmabe lek kan̄.

18 Jonatan onenitumu inyi Debit ibe, “Iyakwut ìre ijọk Aya Onyan̄. Ebi ene mêdido owu me irek ijọk ya, mije, irek kwun̄ me lek ikasi ijọk ya ìbolaak ukpọk. 19 Me uban̄akwut, libi kwala sibi jọn̄ọ ere enenen, mè si kup me ere oletbe mgbọ keyilọ ya, mè kup me agba lek ewuuk ekigwen Ejen. 20 Emi mâsook oraan̄ ita itap me agan̄ ya kubọk ke îkaan̄ inu nkikpọ me lek isook. 21 Nsisook isan̄a, mânenitumu inyi ogwu ikwaan̄ n̄a ibe isi iweek oraan̄ cha. Ire ntumu inyi ogwu ikwaan̄ ya ibe, ‘Kpọ oraan̄ cha ire echa me agba lek kwun̄, teen̄ sa na,’ owu nan̄a sibi na, ke kpunu ufialek. Kè lek ugwem Okumugwem, kpunu unan geege òbosak owu me lek. 22 Ire, ire ntumu inyi gwun̄ nsabọn irieen̄ ya ibe, ‘Kpọ oraan̄ cha ìkup me ntut agan̄ isi kwun̄, je fo isi sọnja,’ libi nan̄a, ke Okumugwem îsan̄a owu me emen unan. 23 Ire me lek inyan̄a-ibot eyi emi melek kwun̄ egbaan̄be inyan̄a, Okumugwem me lek kan̄ ore ogwu ata-ikọ inyi owu melek n̄a mege ire mgbọ geelek.”

24 Debit onenisi ilet me emen oron ere ya. Ijọk Aya Onyan̄ ya orere. Ogwu ubọọn̄ omọmọnọ irek kan̄ me lek ikasi inorie ijọk ya. 25 Ogwu ubọọn̄ Sọọlu ìsiki ikweek me inyọn̄ ikasi kan̄ ere îkikweek iriaak me agba uwu, ikiyaka isi ikpọ Jonatan, sà Abina osiki ikweek me agba lek kan̄. Ire, irek kè Debit olalaak ukpọk. 26 Sọọlu ìkasan̄a amọn geege òfo me lek kè Debit, mije, ìkeek me ejit kan̄ ibe, usini mgbọ ke Debit îra ichaka mbuban, ke mbuban me lek, ke îre eya orọ inyi ikanu. 27 Me òso usen iba eyi ijọk ya, ere kè Debit olalaak si ukpọk. Sọọlu ogwegwen Jonatan ogwu gwun̄ ido ibe, “Ìre keke orọ gwun̄ kè Jesi ìkanu ìnigọok ìrie inorie iyakwut mè cherekeyi?”

28 Jonatan onenifọọk Sọọlu ibe, “Debit ìnunu iniriaak emi ibe emi ǹtele inyi ọmọ isi Beteleyem, 29 mè itumu inyi emi ibe ke îkaan̄ ngwugwa ebi ototun̄ ukan̄ kiban̄ ebegwa me ama kiban̄, ke ngwan̄ kan̄ îria ikwaan̄ ibe ọmọ inu. Eya orọ, ire emi mma ọmọ, mè emi ǹtele inyi ọmọ ilibi-nu isi ichieek ogwen ebi ngwan̄ kan̄ egwenbe ọmọ. Îre eya orọ Debit ìkakup me lek ikasi ijọk ogwu ubọọn̄.”

30 Sọọlu onanaan̄ ejit inyi Jonatan enenen, mè igana inyi ibe, “Owu gwun̄ ijo ogwu enenwaan̄ unye-ibot keyi! Òkikeek ibe emi ǹkariọọn̄ ibe ke owu ògọọk gwun̄ kè Jesi ikeke. Mîbum owu ukwu me isi, mè ibum si me isi uga òman owu. 31 Ìre owu òkariọọn̄ ibe, eyi gwun̄ kè Jesi okupbe me ògat ugwem me inyọn̄ ijọn̄ yi, ke isi kwun̄ ìkposibi, ke owu òkpokọt ikeke ubọọn̄? Mgbọ keyi, ria ikwaan̄ gwen ọmọ jet emi, ke mkpa okup inyi.”

32 Jonatan onenido ogwu ute Sọọlu ibe, “Mije keke ke ebekpan̄ Debit? Ìre keke ke îrọ?” 33 Sọọlu osasa otunwa itọbọ Jonatan ibochim ikpan̄. Sa me ikeya, Jonatan oneniriọọn̄ ibe ke ogwu ute îben me ejit ikpakpan̄ Debit.

34 Jonatan osasa me ikpele unaan̄-ejit inan̄a ikeke me lek ikasi ijọk ya. Ìkarie inorie ijọk ya me òso usen iba kan̄, mije ufieejit îkaan̄be me ibot kè Debit, melek esip ogwu ute otapbe ọmọ me isi.

35 Me ewelegwe ofit iwele kan̄, Jonatan onanan̄a ije inu otu oron ya, ike ọmọ melek kè Debit etumube ifieek, mè isa sọn̄ gwun̄ enerieen̄ ge igbaalek kan̄. 36 Mgbọ ema erebe ere ya, Jonatan onenibe gwun̄ ya ikilibi isi iweek oraan̄ ọmọ môsookbe. Gwun̄ ya okekilibi ije, Jonatan ososook oraan̄ isaba iraka gwun̄ ya itap me emen oron ya. 37 Mgbọ gwun̄ ya orebe ere oraan̄ ya orọn̄be, Jonatan otataan̄ ukpo itumu inyi gwun̄ ya ibe, “Kpọ oraan̄ ya ìkup me ntut agan̄ isi kwun̄, je nyi isi sọnja.” 38 Jonatan otataan̄ ukpo itumu inyi gwun̄ ya ibe, “Ngwa! Gwagwat lek! Kakeke!” Gwun̄ enerieen̄ ya omọmọnọ oraan̄ ya, mè isa ijet ogwu nte uwu kan̄. 39 Gwun̄ enerieen̄ ya ìkariọọn̄ inu geege òkije ifo isi. Gaalek Jonatan melek kè Debit eriọọn̄ inu òkimọnọ irek. 40 Jonatan onenikana ogbaan̄ melek oraan̄ kan̄ cha inyi gwun̄ enerieen̄ ya, mè iria ibe igwu ikom ifo emen ama.

41 Mgbọ yaage gwun̄ enerieen̄ ya onan̄abe, Debit onanan̄a ikeke me agan̄ osiki ewuuk ya, mè inan̄a me emen oron ya ije isibi, mè inirọn̄ ikana isi ichit me ijọn̄ me isi kè Jonatan, mè itọbọ ibot mgbọ ita inyi Jonatan. Ema ekakana lek kiban̄ ikat, ema ene iba ekekito ito. Debit ototo ito enenen enenen.

42 Jonatan onenitumu inyi Debit ibe, “Fo me esuuk! Eji ene iba mîra igbaan̄ inyan̄a ibot me erieen̄ Okumugwem ibe mè Okumugwem ire ogwu ata-ikọ inyi emi melek kwun̄, mè ire si ogwu ata-ikọ inyi owot iman n̄a mè owot iman kwun̄ ire mgbọ geelek.” Debit onenijuuk Jonatan itele, mè ije inan̄a. Jonatan onenigwu ikom ije inin̄ emen ama.