3 Mgbọ Sọọlu ojebe ire ere ge ekisun̄ arọọn̄, òkup iriaak ǹkororok ge me ere ya, ijeje inin̄ emen ǹkororok ya ibosi igen̄ lek. Ikpọkpọ inire ibe ke Debit ọmọ òwa si melek ebi kan̄ me emen ǹkororok yaage me agan̄ udun̄ udun̄ esikibe ikweek irek. 4 Ebi akọn̄ kè Debit enenitumu inyi Debit ibe, “Kpọ, cherekeyi ore usen ya eyi Okumugwem otumube ikọ ofolek ibe, ‘Kpọ, emi me lek n̄a mâyaka ogwu ochicha kwun̄ itap me ubọk kwun̄, inyi owu òrọ ọmọ inu geelek òneneme owu.’ ” Debit oneninween̄ lek inyiọọn̄ isi ire lek kè Sọọlu, mè inifieek otu utọn̄ ofọnti inyọn̄ kè Sọọlu agan̄ ge isan̄a.

5 Mgbọ yaage, ejit kè Debit obebene ikifieek Debit ikọ mije îkọọkbe otu utọn̄ ofọnti kè Sọọlu. 6 Debit onenitumu inyi ebi kan̄ ibe, “Jei, Okumugwem ikachieek ibe emi ǹrọ ijo inu òkup ikeyi me lek nte uwu n̄a, ogwu Okumugwem otọkọbe aran̄ me ibot! Okumugwem ikachieek ibe emi ǹsa ubọk n̄a m̀kpan̄ ọmọ, mije, ọmọ ìre ogwu Okumugwem otọkọbe aran̄ me ibot.” 7 Debit onenisa me ikọ chi igana ere inyi ebi kan̄. Ìkachieek ibe ema esi esak Sọọlu unan geege me lek. Sọọlu ogegen̄ lek isan̄a, mè inan̄a me emen ǹkororok ya isibi inin̄ oniin̄ ije kiban̄.

8 Debit oneninan̄a si me emen udọn̄ yaage isibi, mè ikitaan̄ ukpo ikigwen Sọọlu, mè itumu inyi ibe, “Ogwukaan̄ n̄a, ogwu ubọọn̄!” Sọọlu onọnọ, mè iyaka isi ikana me udun̄ ikpọ. Debit ogegele igwook me ijọn̄, mè itọbọ ibot inyi Sọọlu, 9 mè inido Sọọlu ibe, “Ìre keke orọ owu okigban̄ ikọ ebi ene ekinikpa inyi owu ibe ke emi ǹkiweek isasan̄a ugwem kwun̄? 10 Kpọ, me cherekeyi, owu gaalek osa chieen̄ kwun̄ imun̄ ibe ke Okumugwem îkana owu itap emi me ubọk me mgbọ owu okupbe me emen ǹkororok ya. Ebi n̄a mîbe emi m̀kpan̄ owu. Ire, emi nkakaan̄ ejit nsan me lek kwun̄, mè itumu ifieek ibe ke m̀kpasa ubọk n̄a ichak me lek ogwukaan̄ n̄a, mije, ke ogwu Okumugwem otọkọbe aran̄ me ibot ke owu ore. 11 Owu nte n̄a, kpọ-nu! Ke owu omun̄ okpọkọ otu utọn̄ ofọnti inyọn̄ kwun̄ yi òkup emi me ubọk! Mgbọ mfieekbe otu utọn̄ ofọnti inyọn̄ kwun̄ yi, kè m̀kpakpan̄ owu mgbọ ya. Ire, ǹkakpan̄ owu, mije, ǹkakaan̄ ijo ekiket geege me ejit, ǹkabeben si me ejit irọrọ owu ilọ. Ìkakaan̄ ijo inu geege nrọbe owu. Ire, owu okekiweek ebek ugwem n̄a kubọk ogwu ota okiweek anam me oron ikpakpan̄. 12 Kè Okumugwem me lek kan̄ isibi oyerebet keyi me etete kiji ene iba! Kè Okumugwem gaalek isa ubọk kan̄ ikpe owu useen̄ ijo inu geelek okirọ emi. Ire, emi m̀kpabene ubọk n̄a isa ichak owu me lek. 13 Owu oriọọn̄ si urọk ekito me oka mgbọ ibe, ‘Inu ikpak ìkinan̄a me ubọk ebi ikpak!’ Eya orọ, ubọk n̄a ìkabochak owu me lek.

14 “Ǹdo-nu owu! Ìre ekene ke owu ogwu ubọọn̄ ebi Ijeren onan̄a isibi ikirieen̄ ikana ere? Ìre kpasi ene ke owu okililaba ikana ikeyi? Ìre gaalek emi nkwukwu ibo yi, sà ìre ikap ge yi gaalek? 15 Okumugwem gaalek isibi oyerebet inyi emi melek kwun̄, mè itim akọn̄ me ibot n̄a, mè inyan̄a emi isibi me ubọk kwun̄.”

16 Mgbọ Debit otumube ikọ cha isan̄a, Sọọlu ododo ibe, “Ìre ida kwun̄ ire eya, gwun̄ n̄a Debit?” Ikọ ya itata Sọọlu me otu, itataan̄ ukpo ikito ito, 17 mè itumu inyi Debit ibe, “Me atikọ, owu ìre ogwu ata irọrọ igak emi. Mije, owu osa ata inu ikpe emi, me ere emi nsabe ijo inu ikpe owu! 18 Owu otumu inyi emi chereyi ubọk owu osabe irọ emi ata inu. Mije, Okumugwem îkana emi itap me ubọk kwun̄, ire, owu òkakpan̄ emi. 19 Ìre ene môtet ogwu ochicha kan̄ ire ubọk, mè itele ibe ije ifo me esuuk? Kè Okumugwem isa ata inu ikpe owu mije ata inu eyi owu orọbe inyi emi cherekeyi. 20 Îbook emi chieen̄ mgbọ keyi ibe ke owu obore ogwu ubọọn̄ ebi Ijeren, ke mkpulu kwun̄ me Ijeren ìbokekeke inye. 21 Eya orọ, nyan̄a ibot nyi emi me erieen̄ Okumugwem ibe ke owu òkpojijaka ebi uwu n̄a isan̄a kpai, ke owu òkpochọk erieen̄ n̄a ichit me uwu nte n̄a.”

22 Debit onyanyan̄a ibot inyi Sọọlu. Sọọlu onanan̄a me ere ya ije ifo uwu kan̄. Debit mè ebi kan̄ enanan̄a ije inene ifo ere òkaan̄ okwukwek akọn̄ ya isi ikweek.