2 Sọọlu onanan̄a ije ikwala isi emen èwê Jifu, ọmọ melek obop ebirieen̄ ita ìrọriọọn̄ ukot akọn̄ me Ijeren ebi îgobobe. Ema esisi ikiweek Debit me emen èwê Jifu ya. 3 Sọọlu onenigwuun̄ uwu ọfọ me inyọn̄ orioon̄ òkup me Akila, eyi òkiyaka isi ikpọ Jesimọn me agba lek oniin̄. Debit okukup me emen èwê ya inọ ibe ke Sọọlu înu me emen èwê ya inikiweek ọmọ ikpakpan̄, 4 mè iniria ebi kan̄ ibe esi enun̄unun̄ esi eweek eriọọn̄ mè ìre Sọọlu înu me atikọ.

5 Debit onanan̄a ije isi ere Sọọlu ogwuun̄be uwu ọfọ, mè imun̄ ere Sọọlu mè ogwu ibot akọn̄ kan̄, Abina gwun̄ kè Neri, elaakbe. Sọọlu ìlaak me eden̄ orieen̄ akọn̄, sà ebi akọn̄ kan̄ elilam igban ikana ọmọ okokop. 6 Debit onenisi ido Ayimelek ogwu Et mè Abisai ngwan̄ kè Jowabu, ebi nga kiban̄ orebe Seruya, ibe, “Ìre ekene me etete kinyi obogọọk emi isi lek kè Sọọlu me ere îgwuun̄be uwu ọfọ?”

Abisai ofọfọọk ibe, “Emi mâgọọk owu isi!”

7 Debit mè Abisai enenije inu me lek kè Sọọlu mè ebi akọn̄ kan̄ me eririeen̄ ya. Me ike mgbọ ya, Sọọlu îlaak inwọnọ me eden̄ orieen̄ akọn̄ ya, mè otunwa kan̄ ogwuun̄be ibia me ijọn̄ me agba lek ibot kan̄. Sà Abina mè otutuuk ebi akọn̄ kechilọ elilam ikana Sọọlu me ijọn̄ okokop.

8 Abisai onenitumu inyi Debit ibe, “Awaji îkana ogwu ochicha kwun̄ itap owu me ubọk cherekeyi. Tele mè ǹsa otunwa n̄a yi ǹchim ọmọ ubọk ge gaalek ǹkam me ijọn̄. M̀kpachim iso mgbọ iba.”

9 Ire, Debit otutumu inyi Abisai ibe, “Kakpan̄! Mije, ìre ekene obochak ubọk me lek ogwu Okumugwem otọkọbe aran̄ me ibot, mè ije ifo ikike, me kpobọkọbe osusut? 10 Kè lek ugwem Okumugwem! Ire Okumugwem me lek kan̄ ìkasulu ọmọ ìto, môkọt ire ibe ke usen ugwem kan̄ môso, ikwukwu, mè ìyaka ire, ọmọ môsibi isi oyet akọn̄, akọn̄ môrerie ọmọ, môkwukwu. 11 Awaji ikachieek ibe emi ǹsa ubọk n̄a ǹchak me lek ogwu Okumugwem otọkọbe aran̄ me ibot. Owu, si jibi otunwa kan̄ yilọ ògwuun̄ me agba lek ibot kan̄ ya, mè ben si ogbokot mudim kan̄ gbaalek sa na, mè eji eneje efo.”

12 Sa me ikeyi ke Debit okpulu otunwa melek ogbokot mudim echi òkup me ijọn̄ me agba lek ibot kè Sọọlu isa inan̄a ifo. Kpunu ogwu òmumun̄, kpunu ogwu òrọriọọn̄, kpunu si ogwu òkọkọt ibolo chieen̄ imun̄ inu ya òrọrọ. Ema otutuuk ene elalaak idọk enenen, mije, Okumugwem îria uga ilaak inikeme ema otutuuk ene.

13 Debit onenisaba utibi orioon̄ ya ifo ofifi agan̄ isi ikeke me inyọn̄ ogoon̄ ge me ujọn̄ọ ere. Agbagba òkup me etete kiban̄ agan̄ iba îjọn̄ọ enenen. 14 Debit onenikup me ere ya itaan̄ ukpo ikigwen ebi akọn̄ kè Sọọlu, mè ikigwen si Abina gwun̄ kè Neri, mè ikibe ema, “Abina, ìre owu òkpofọọk emi otu?”

Abina ofọfọọk ibe, “Ìre owu ìre ekene, ogwu òkitaan̄ ukpo igwen ogwu ubọọn̄?”

15 Debit otutumu inyi Abina ibe, “Ìre owu òkare enerieen̄? Ìre ekene obet lek kwun̄ me otutuuk Ijeren? Ìre keke orọ owu òkakọt ìbem nte uwu kwun̄ ogwu ubọọn̄? Kpọ, ene ge me lek ebi akọn̄ n̄a înu inenikpan̄ nte uwu kwun̄ ogwu ubọọn̄. 16 Inu yi owu orọbe ìkanwọn! Kè lek ugwem Okumugwem! Inu ògbegbe irọrọ owu melek ebi akọn̄ kinyi cha ìre ikpakpan̄ enyi, mije, enyi kpebem nte uwu kinyi, òrere ogwu Okumugwem otọkọbe aran̄ me ibot. Mgbọ keyi, raan̄ chieen̄ kana kpọ-nu, mọmọ otunwa ogwu ubọọn̄ melek ogbokot mudim òkup me agba lek ibot kan̄?”

17 Sọọlu orọriọọn̄ ibe ke îre ida kè Debit, mè inido ọmọ ibe, “Ìre ida kwun̄ ire eya, Debit gwun̄ n̄a?”

Debit ofọfọọk ọmọ ibe, “Iin̄, îre ida n̄a ke îre, ogwukaan̄ n̄a, ogwu ubọọn̄.” 18 Debit onenitumu inyi ogwu ubọọn̄ ibe, “Ìre keke orọ owu okpọkpọ ikililaba emi ogwu usun̄ kwun̄ ikana ere ikeyi? Ìre keke ke nrọ, sà ìre kpasi ijo inu ke nrọ owu? 19 Soso, ogwukaan̄ n̄a, ogwu ubọọn̄, nye lek gban̄ inu emi ogwu usun̄ kwun̄ mbatumu. Ire ke îre Okumugwem ogbo owu itap inyi emi, ọmọ ibọkọ ngwugwa esuuk, mè ikpukpa. Ire, ire ke îre ebilene egbo owu inyi emi, môfieek inyi ebi ife cha me isi Okumugwem. Mije, ema mîrieen̄ emi isibi me inyọn̄ ijọn̄ Okumugwem onyibe eji me ìrot, ema ekiweek ibe emi ǹsi ǹriaak ofifi awaji. 20 Kachieek ibe emi ǹkup me ofifi ido òjọjọn̄ọ ere me isi Okumugwem ǹkwu. Mije, kpọ-nu ubọk owu ogwu ubọọn̄ ebi Ijeren okinan̄a isibi inikiweek emi, ikap ge gaalek kpọi, kubọk ekiweek usun̄ me inyọn̄ ogoon̄!”

21 Sọọlu onenifọọk Debit ibe, “Emi nrọ ijo inu! Gwun̄ n̄a Debit, gwu kom ka na, ke m̀kpayaka irọ owu ijo inu, mije owu osabe ugwem n̄a igwen inu cherekeyi. Me atikọ, nrọ inu kubọk ogwu burubut, mè ije ilọ enenen.”

22 Debit onenitumu ibe, “Kpọ otunwa ogwu ubọọn̄ ire eyi! Ria ene ge me lek ebi akọn̄ kwun̄ ibe isaba inu inibọkọ. 23 Okumugwem ìkikpe ene geelek mkpukpe igọọk me lek ata irọrọ ene ya, mè ubọk ene ya ogbebe utoon̄-ejit. Okumugwem îkana owu itap emi me ubọk cherekeyi, ire, emi ǹkaweek isasa ubọk n̄a ikpan̄ ogwu Okumugwem otọkọbe aran̄ me ibot. 24 Ike emi nsabe ugwem kwun̄ igwen inu cherekeyi, ikeya si, Okumugwem isa si ugwem n̄a igwen inu, mè inyan̄a emi isibi me emen otutuuk ufialek!”

25 Sọọlu onenitumu inyi Debit ibe, “Ugbana ikup inyi owu, gwun̄ n̄a Debit! Inu geelek obenbe me ejit, owu môrọ! Me emen inu geelek, owu òbotitim ikpan̄!”

Debit ojeje inan̄a. Sọọlu onanan̄a ije ifo uwu kan̄.