Abusolọm îkpaka ibot
15
Ike mgbọ okije, Abusolọm onenikaan̄ uji akọn̄ ge, mè owuwa inyinya akọn̄, mè ikaan̄ akọp ebi akọn̄ go ebi ìbekilibi me isi kan̄. 2 Abusolọm ìkinan̄a ikeke me ilaak me ata otu ewelegwe usen geelek, mè ikije isi ikeke me agba oniin̄ ekije isi otunchit ama. Isimun̄ ene geelek òkaan̄ gọlọgọlọ ìbosa isi me isi ogwu ubọọn̄ ibe inen̄e isun̄, Abusolọm îra igwen igba agan̄, mè ibe, “Ònan̄a me kpasi ama?” Ene ya îra ifọọk ibe, “Ogwu usun̄ kwun̄ ìnan̄a me ge me lek otoko ebi Ijeren.” 3 Abusolọm îra itumu inyi ibe, “Kpọ ma, ikọ kwun̄ ìtatat isan̄a, mè inen. Ire, kpunu ogwu òbokup me otuchieen̄ ogwu ubọọn̄ igban̄ ikọ kwun̄ ike îgbebe.” 4 Îra itumu si ibe, “Mebe ìre emi ke eto kubọk ogwu oyerebet me ido kiji! Kè òre isi n̄a ke otutuuk ebi ìkakaan̄ gọlọgọlọ mekinu, inyi ǹsibi unen oyerebet ǹnyi ema.”5 Ofifi si, ogwu ije ikweek Abusolọm, mè ibonigele igwook itọp ọmọ amọn, Abusolọm îra inyana ubọk irak ene ya ibene, mè inyi ene ya ejit. 6 Ikeyi ke Abusolọm okirọ melek ebi Ijeren geelek ìweweek isasa gọlọgọlọ inu me lek ogwu ubọọn̄ ibe isibi oyerebet inyi ema, mè inisa me ikeya ileke ejit ebi Ijeren inu me lek kan̄.
7 Mgbọ acha inia osobe, Abusolọm onenisi itumu inyi ogwu ubọọn̄ ibe, “Soso, tele mè ǹsi Eburọn ǹsi ǹrọ inyan̄a-ibot nnyan̄abe inyi Okumugwem ǹso. 8 Mgbọ emi, ogwu usun̄ kwun̄, nkupbe me Gesuru me ido Aram, nnyan̄a ibot ibe, ‘Ire Okumugwem isa emi ika inu Jeruselem me atikọ, ke mâsi itọbọ ebum inyi ọmọ me Eburọn.’ ”
9 Ogwu ubọọn̄ ofọfọọk ọmọ ibe, “Înwọn ma! Je me esuuk.” Abusolọm onanan̄a ije isi Eburọn.
10 Abusolọm oneniria ebi ene isi otutuuk otoko ebi Ijeren ibe enween̄ lek esi elook ekana ibe, “Enyi isinọ ida otita okitaan̄, ìkitaan̄ ukpo ìbe, ‘Abusolọm ore ubọọn̄ me Eburọn.’ ” 11 Me usen ya, efit ebirieen̄ iba enan̄a me Jeruselem igọọk Abusolọm ije isi Eburọn kubọk ebi egwegwen me ijọk, kperiọọn̄ inu geege òkimọnọ irek. 12 Mgbọ Abusolọm okigwa ngwugwa me Eburọn, ineniria ibe esi egwen Ayitofen ogwu Gilo, ogwu nteme kè Debit, me Gilo ama kiban̄. Sa me ikeya, ijo otitọt kè Abusolọm ya okekeke inye. Ebi ìkekeke inyi Abusolọm ekpọkpọ ikiwa.
Debit îlibi ekot ugwem
13 Etip onenilook Debit ibe, “Kpọ, ebi Ijeren mîkana igọọk Abusolọm isan̄a.”
14 Debit onenigwen otutuuk ebi ikwaan̄ kan̄, ebi melek kan̄ ekupbe me Jeruselem, ititiin̄, mè itumu inyi ema ibe, “Ìna mè eji elibi eweek agan̄! Ire eji kpesa ata mgbọ ilibi inan̄a, kpunu ene geege me lek kiji òbonwọnọ me ubọk kè Abusolọm. Ìgwat lek, inyi Abusolọm ikanu mgbọ yaage ìnisoon̄ eji, mè ìto ùrioon̄ ìkeme eji, mè ìsa akọn̄ ìjijaka ama ìgwook.”
15 Ebi ikwaan̄ ogwu ubọọn̄ enenifọọk ibe, “Inu geelek owu ogwukaan̄ kiji ogwu ubọọn̄ ogobobe, eji ebi usun̄ kwun̄ mîbem lek irọrọ si ikeya.”
16 Ogwu ubọọn̄ onenibene ije inin̄ oniin̄, otutuuk ebi uwu kan̄ ekekigọọk ọmọ me udun̄. Ijujuuk akọp ebi ugan kan̄ itele, ibe ekup ekekpọ chieen̄ me lek uwu ogwu ubọọn̄. 17 Ogwu ubọọn̄ oneninan̄a isibi me Jeruselem, otutuuk ebi kan̄ ekekigọọk ọmọ me udun̄. Ema eneniyaka ikeke me agba lek òta uwu me ama ya. 18 Otutuuk ebi akọn̄ kan̄ ejeje iniraka ọmọ. Otutuuk kiban̄, ebi Keret, mè ebi Pelet, mè efit ene gweregwen ebi Gat, ebi ìnanan̄a me Gat inigọọk ọmọ ikup, ema otutuuk ekekije me isi ogwu ubọọn̄.
19 Ogwu ubọọn̄ onenitumu inyi Itai ogwu Gat ibe, “Keke orọ okigọọk eji ije? Gwu kom si kup melek ogwu ubọọn̄ Abusolọm, mije, owu ìre ogwu ichen. Mkpat akọn̄ osa owu isibi me ama kinyi. 20 Iyakwut gaalek ke owu onu, cherekeyi, owu onenibogọọk eji ikinyinya ikana. Emi me lek n̄a, ǹkariọọn̄ ere ije keyi oboben emi isi ire? Ìkanwọn! Gwu kom, mè sa ebi akọn̄ ido kinyi gbaalek. Okumugwem ikaan̄ ata ejit me lek kwun̄, mè igbe si utoon̄-ejit me lek kwun̄.”
21 Ire, Itai ofọfọọk ogwu ubọọn̄ ibe, “Kè lek ugwem Okumugwem, kè lek kwun̄ ogwukaan̄ n̄a, ogwu ubọọn̄! Ere geelek ogwukaan̄ n̄a, ogwu ubọọn̄ obokup, ere keya si ke emi ogwu usun̄ kwun̄ mbakup, mè ìre me mkpa, mè ìre me ugwem.”
22 Debit ofọfọọk Itai ibe, “Ire ikeya, gọọk je nyi isi!” Itai ogwu Gat melek otutuuk ebi akọn̄ ido kiban̄, mè otutuuk ototun̄ ukan̄ kiban̄ egọgọọk ije ifo isi.
23 Mgbọ ebi asabọn ama òkup me ere cha emun̄be ike ife cha ekije iraka, ema ekekitaan̄ ukpo ito ito enenen. Ogwu ubọọn̄ onenije isaba iteke Kidọrọn. Ikeya ke otutuuk ebi melek kan̄ egọọk ọmọ ikije me lek oniin̄ òkisi agan̄ emen èwê.
24 Jadọk mè Abiata òwa si melek ogwu ubọọn̄, mè otutuuk ebi otoko kè Libai melek okop inyan̄a-ibot Awaji me ubọk kiban̄. Ema eneniben okop inyan̄a-ibot Awaji iyik, Abiata onenikigwa ngwugwa, mege otutuuk kiban̄ esibibe isan̄a me emen ama.
25 Ogwu ubọọn̄ onenitumu inyi Jadọk ibe, “Ben okop inyan̄a-ibot Awaji gwu kom si sun̄ me emen ama. Ire Okumugwem ikaan̄ ejit nsan me lek n̄a, môsa emi igwu ikom ika, mè irọ inyi ǹyaka ǹsa chieen̄ n̄a m̀mun̄ okop ya melek ere ọmọ okiluk yi si. 26 Ire, ire Okumugwem iyaka inibe ke ọmọ ìkayaka ìbele ejit me lek n̄a, emi mbem lek ibe irọ emi inu geelek ònwọnwọn me chieen̄ kan̄.”
27 Ogwu ubọọn̄ onenitumu inyi Jadọk ogwu ngwugwa ibe, “Ke owu ìre ogwu òmọọn̄ inu! Owu mè Abiata, ìgwu ìkom ìfo emen ama me esuuk, mè ìsa bọn ebirieen̄ iba kinyi, Ayimaji gwun̄ kwun̄, mè Jonatan gwun̄ kè Abiata ìgbaalek. 28 Emi mâkup me agba lek okolo yi me ere ijọn̄ ijọn̄ me emen èwê ikikpọ etip òbonan̄a me otu kinyi.” 29 Mije keya, Jadọk mè Abiata eneniben okop inyan̄a-ibot Awaji isa igbaalek igwu ikom ifo Jeruselem, mè ibia me ere ya.
30 Ire, Debit onenikije inene inyọn̄ ogoon̄ Olifu, òkije òkito, mè isa inu ichit ibot kan̄, mè ikije ukpọk ukot. Otutuuk ebi melek kan̄ si esasa inu ichit ibot, mè ikito ito, mè ikije si inene inyọn̄ ogoon̄ ya. 31 Etip onenire lek kè Debit ibe ke Ayitofen òwa me lek ebi ìtọtọt otitọt ijo mkpulu ya melek kè Abusolọm. Debit oneniriaak uriaak ibe, “Jei Okumugwem, soso rọ inyi nteme kè Ayitofen ikana burubut.”
32 Mgbọ Debit onenebe isi ire inyọn̄ ibot ogoon̄ Olifu, ere ebi ene ekinitọbọ ebum inyi Awaji, Usai ogwu Arak okekije ikweek ọmọ, mè ngwak ofọnti me lek, mè achiaan̄ me ibot. 33 Debit onenibe ọmọ, “Ire ogọọk emi ije, owu mônikana ufialek inyi emi. 34 Ire, gwu kom fo emen ama, mè si tumu nyi Abusolọm ibe, ‘Ogwu ubọọn̄, emi ìre ogwu ikwaan̄ kwun̄. Mgbọ òraraka, ǹkisi ikwaan̄ inyi nte kwun̄. Ire, mgbọ keyi, emi ìre ogwu ikwaan̄ kwun̄.’ Ire orọ ikeya, owu môsa irek kwun̄ ikiwuwọlọ nteme geelek Ayitofen mônyibe. Eya mônenire ntap-ubọk inyi emi. 35 Kpọ, Jadọk mè Abiata ebi ngwugwa òwa melek kwun̄ me emen ama ya. Otutuuk inu geelek onọbe me uwu ogwu ubọọn̄, ben si kpa nyi ema. 36 Bọn ebirieen̄ iba kiban̄, Ayimaji gwun̄ kè Jadọk mè Jonatan gwun̄ kè Abiata, òwa si melek kiban̄. Ikaan̄ inu geelek onọbe, ria ema ibe esa enekpa enyi emi.”
37 Usai, ogwu unene kè Debit onenije inin̄ emen Jeruselem. Mgbọ yaage si ke Abusolọm okije iraka inin̄ emen ama ya.