Ikpa Ebi ubọọn̄ eyi adasi ìre adasi okpọkọ me lek ikpa Ebi Ubọọn̄ ge gaalek egebe. Eche ikpa yi irek iba, Ebi Ubọọn̄ eyi adasi mè Ebi Ubọọn̄ eyi òso iba, mije, mfufuk cha îjọn̄ọ iraka inu òbokọt inin̄ me lek ikpa ekakat ge. Ikpa chi iba ìkikpa mfufuk ido Ijeren, eyi òbene me ikpa Samien eyi adasi mè eyi òso iba, inyi isi.

Ikpa Ebi Ubọọn̄ eyi adasi yi ìkup irek ita: Adasi irek (ibot 1-2), ìkitumu ikọ ofolek òta mgbọ me ugwem ogwu ubọọn̄ Debit. Òso irek iba (ibot 3-11), ìkitumu ikọ ofolek ogwu ubọọn̄ Solomọn, mè ubọk înamabe Uwu Mbuban, mè igbana. Òso irek ita (ibot 12-22), ìkitumu ikọ ofolek inu òrọrọ mgbọ Solomọn okwube iraka, ògak ge, ubọk ido Ijeren ochebe irek iba: ido agan̄ osiki, eyi ekigwen ido Juda, òrere ebi otoko kè Juda, mè ebi otoko kè Benjamin gaalek; mè ido agan̄ inyọn̄, eyi ekigwen ido Ijeren, òrere ebi akọp otoko kechilọ.

Otitọ esabe ikitọ ogwu ubọọn̄ geelek ìre, mè ìre îsiki ibot inyi Awaji melek Ikan Awaji, mè ìre ìkasiki. Owuwa me lek ebi ubọọn̄ ebi ido agan̄ osiki mîsiki ibot inyi Awaji igọọk me ubọk Debit nte nte kiban̄ orọbe. Esasa me ikeya igwen ema ata ebi ubọọn̄. Ire, otutuuk ebi ubọọn̄ ido agan̄ inyọn̄, kubọk ene ge ikeyi me lek kiban̄ ìkasiki ibot ìnyi Awaji melek Ikan kan̄. Îre mije keya ke egwen ema ijo ebi ubọọn̄.

Me emen ikpa Ebi Ubọọn̄ eyi adasi yi, mîge inu ofolek ebi nriran Okumugwem, ebi ìkakat ejit ikitumu ikọ otu Okumugwem isa ikitaba ubọk me utọn̄ ebi ene mè ebi ubọọn̄, ibe ekatọbọ ebum ìnyi mkpọmfaka, mè ekakpaka ibot ìnyi Awaji. Ogwu òmimin ichit me etete kiban̄ ìre ogwu nriran Ilaija. Inu òmimin ichit eyi Ilaija orọbe ìre ifan̄a îwutbe melek ebi nriran Baali me inyọn̄ ogoon̄ Kamen (ibot 18).