3 Ema enenije ikana Ijeren ikiweek gwun̄ enenwaan̄ òjajaan̄, mè inimun̄ Abisagi ogwu Sunem, mè inisa ika ijet ogwu ubọọn̄.

4 Gwun̄ enenwaan̄ ya îjaan̄ uja enenen. Inenigọọk ogwu ubọọn̄ ikup, mè ikikpọ chieen̄ me lek. Ire, ogwu ubọọn̄ ìkagọọk ọmọ ìlaak.

5 Adonija ogwu Agit omanbe inyi Debit onenisan̄a lek isibi, mè ibe, “Emi mbare ogwu ubọọn̄,” Inenititiin̄ uji akọn̄ mè inyinya akọn̄, mè ebi ìkikọp uji cha. Îgobo si akọp ebirieen̄ go ebi ìbekilibi me isi kan̄. 6 Ogwu ute ìkararak ìkan̄ inu ìnyi ọmọ mgbọ geege, mè ìdo ọmọ ìbe, “Ìre keke orọ okirọ inu chi okirọ?” Adonija îjaan̄ si uja enenen. Ọmọ ke eman igọọk Abusolọm.

7 Adonija onenisi igba ibot ichọk melek kè Jowabu, ogwu ogwu uga orebe Seruya, mè Abiata ogwu ngwugwa, ema ene iba echechieek inyi, mè igọọk ọmọ ikeke. 8 Ire, Jadọk ogwu ngwugwa, mè Benaya gwun̄ kè Jeyoyada, mè Netan ogwu nriran, mè Simei mè Reyi, mè ebi akọn̄ ìkibem Debit kpegọọk Adonija ikeke.

9 Adonija onenigwu owuwa arọọn̄, mè eriembuuk, mè bọn eriembuuk egwookbe imiin̄ ufuk isa igwa ngwugwa me lek ewuuk Joyelet òkup me agba lek ama En Rogen. Îgween̄ otutuuk ebi ngwan̄, bọn ebirieen̄ ogwu ubọọn̄, mè igween̄ si otutuuk ebi Juda ìrere ebi ibot ikwaan̄ ogwu ubọọn̄, igbaalek. 10 Ire, ìkagween̄ Netan ogwu nriran mè Benaya mè ebi akọn̄ ìkibem Debit, ìkagwegwen si Solomọn ogwu ngwan̄.

11 Netan onenido Batiseba nga kè Solomọn ibe, “Ìre òkanọ-nu ibe ke Adonija gwun̄ enerieen̄ Agit omanbe inyi Debit îkana ogwu ubọọn̄, me Debit ogwukaan̄ kiji ikariọọn̄ge? 12 Eya orọ mgbọ keyi, na mè ǹteme owu ike oborọ mè inyan̄a ebek ugwem kwun̄ mè ebek ugwem kè Solomọn gwun̄ kwun̄. 13 Nin̄ gọọk ogwu ubọọn̄ Debit, mè si tumu nyi ibe, ‘Ogwukaan̄ n̄a ogwu ubọọn̄, ìre owu òkafat ìnyan̄a ibot ìnyi emi ogwu usun̄ kwun̄ ibe, me atikọ, ke îre Solomọn gwun̄ n̄a enerieen̄ obore ogwu ubọọn̄ me irek kwun̄, ke îre ọmọ si obosiki ikweek me inyọn̄ ogboon̄ ubọọn̄ kwun̄ ikikpulu? Ijeje inire ibe ke Adonija oyaka inikana ogwu ubọọn̄?’ 14 Me mgbọ owu môkupbe me ere ya ikitumu ikọ melek ogwu ubọọn̄, emi mânenikana inin̄ uwu ya, mè inirọ ikọ owu otumube inye.”

15 Batiseba oninin̄ isi imun̄ ogwu ubọọn̄ me emen agwut ya. Ogwu ubọọn̄ îkan enenen mgbọ ya. Abisagi ogwu Sunem okekikpọ ọmọ chieen̄ me lek. 16 Batiseba onenigele ikwuun̄, mè itọbọ ekpe me isi ogwu ubọọn̄. Ogwu ubọọn̄ onenido ọmọ ibe, “Keke ke oweek?”

17 Itutumu inyi ibe, “Ogwukaan̄ n̄a, îre owu gaalek osa me erieen̄ Okumugwem Awaji kwun̄ inyan̄a ibot inyi emi ogwu usun̄ kwun̄ ibe, ‘Solomọn gwun̄ kwun̄ enerieen̄ obore ogwu ubọọn̄ me irek n̄a, îre ọmọ obokup me inyọn̄ ogboon̄ ubọọn̄ n̄a ikikpulu.’ 18 Ire, mgbọ keyi, kpọ Adonija îkana ogwu ubọọn̄, me ere owu ogwu ubọọn̄ òkariọọn̄ inu ofolek. 19 Îsi igwu owuwa orie eriembuuk, mè eriembuuk echi egwookbe, mè ogbogbo arọọn̄ isa igwa ngwugwa, mè igween̄ otutuuk bọn ebirieen̄ ogwu ubọọn̄, mè Abiata ogwu ngwugwa, mè Jowabu ogwu ibot akọn̄ isa igbaalek. Ire, ìkagwen Solomọn ogwu usun̄ kwun̄. 20 Ogwukaan̄ n̄a ogwu ubọọn̄, chieen̄ otutuuk ebi Ijeren ìkup me lek kwun̄, inyi owu òtumu ònyi ema ogwu òbosiki ikweek me inyọn̄ ogboon̄ ubọọn̄ kwun̄, ogwukaan̄ n̄a ogwu ubọọn̄, ikikpulu mgbọ ukot kwun̄ môrakabe. 21 Ire owu ogwu ubọọn̄ òkadọmọ inu yi ìsun̄ me irek, osinan̄a ikwu ifo igọọk ebi nte nte kwun̄, emi mè Solomọn gwun̄ n̄a enerieen̄ mênenikana ebi ìlọ ijọn̄.”

22 Ogwu enenwaan̄ ya òkitumu ikọ ya me otu melek ogwu ubọọn̄, Netan ogwu nriran okakana inin̄ uwu. 23 Enenilook ogwu ubọọn̄ ibe ke Netan ogwu nriran înu. Netan oneniraka inu me isi ogwu ubọọn̄, mè igele igwook me ijọn̄, mè ikana isi ichit me ijọn̄.

24 Netan onenibe, “Ìre owu, ogwukaan̄ n̄a ogwu ubọọn̄, otumu ibe ke Adonija obonire ogwu ubọọn̄ me irek kwun̄, ke îre ọmọ obonisiki ikweek me inyọn̄ ogboon̄ ubọọn̄ kwun̄ ikikpulu? 25 Cherekeyi, Adonija ìgwegween̄ otutuuk bọn ebirieen̄ ogwu ubọọn̄, mè ebi ibot akọn̄, mè Abiata ogwu ngwugwa, igbaalek, mè isi igwu owuwa orie eriembuuk, mè eriembuuk echi egwookbe, igbaalek owuwa arọọn̄, isa igwa ngwugwa. Me mgbọ keyi, ema ire ebilọ mekirie, mè ikinwọ melek Adonija, mè ikibe, ‘Ogwu ubọọn̄ Adonija, luk ugwem jọn̄ọ!’ 26 Ire, ema kpegwen emi ogwu usun̄ kwun̄, mè Jadọk ogwu ngwugwa, mè Benaya gwun̄ kè Jeyoyada, mè Solomọn ogwu usun̄ kwun̄, igbaalek. 27 Ìre inu òkup ikeyi ke ogwukaan̄ n̄a ogwu ubọọn̄ ofat irọ me ikarọge ebi usun̄ kan̄ eriọọn̄ ogwu òbonisiki ikweek me inyọn̄ ogboon̄ ubọọn̄ ogwukaan̄ n̄a ogwu ubọọn̄ mgbọ ukot kan̄ isiraka?”

28 Ogwu ubọọn̄ Debit onenibe, “Ìgwen Batiseba ibe inin̄ inu.” Batiseba oninin̄ inu, mè inisi ikeke me isi ogwu ubọọn̄.

29 Ogwu ubọọn̄ oneninyan̄a ibot ibe, “Kè lek ugwem Okumugwem, ogwu ònyanyan̄a emi me otutuuk ufialek n̄a. 30 Inyan̄a-ibot ya nsabe me erieen̄ Okumugwem, Awaji ebi Ijeren, inyan̄a inyi owu ibe ke Solomọn gwun̄ kwun̄ enerieen̄ obore ogwu ubọọn̄ me irek n̄a, ke ọmọ si obosiki ikweek me inyọn̄ ogboon̄ ubọọn̄ n̄a, me irek n̄a ikikpulu, cherekeyi ke emi mbarọ inyan̄a-ibot ya iso.”

31 Batiseba onenigele igwook, mè ikana isi ichit me ijọn̄, mè inigwuun̄ akpatukot me ijọn̄ me isi ogwu ubọọn̄, mè inibe, “Ogwukaan̄ n̄a ogwu ubọọn̄ Debit, luk ujọn̄ọ ugwem!”

32 Ogwu ubọọn̄ Debit onenibe, “Ìgwen Jadọk ogwu ngwugwa, mè Netan ogwu nriran, mè Benaya gwun̄ kè Jeyoyada ibe enu me isi ogwu ubọọn̄.” 33 Mgbọ ema enube, ogwu ubọọn̄ onenibe ema, “Ìsa ebi ikwaan̄ ogwukaan̄ kinyi ìgbaalek kinyi ìje, mè ìben Solomọn gwun̄ n̄a enerieen̄ ìtoon̄ me inyọn̄ inyinya mgbidim ukot eyi òkup ọkpọkpọ inyi emi, mè ìsa ọmọ ìkọp ìsi otu mun̄ Giyọn. 34 Enyi isire ere ya, Jadọk ogwu ngwugwa mè Netan ogwu nriran etọkọ ọmọ aran̄ me ibot, mè esa ọmọ erọ ogwu ubọọn̄ ebi Ijeren. Ìkiwut otita, mè ìkitaan̄ ukpo ìtumu ibe, ‘Ogwu ubọọn̄ Solomọn, luk ugwem jọn̄ọ!’ 35 Enyi isirọ ikeya isan̄a, ìgọọk ọmọ ìgwu ìkom ìna me ere keyi, inyi inisiki ikweek me inyọn̄ ogboon̄ ubọọn̄ n̄a, mè ikikpulu me irek n̄a. Ọmọ ke nnyi unye ibe inire ogwu ubọọn̄ òbokikpulu Ijeren mè Juda.”

36 Benaya gwun̄ kè Jeyoyada ofọfọọk ogwu ubọọn̄ ibe, “Ikup ikeya! Kè Okumugwem, Awaji ogwukaan̄ n̄a ogwu ubọọn̄, irọ si inye ikeya. 37 Ike Okumugwem okekebe melek ogwukaan̄ n̄a ogwu ubọọn̄ me ukot mgbọ kan̄, ikeke si ikeya melek kè Solomọn, mè irọ inyi irek ubọọn̄ kan̄ imin igak irek ubọọn̄ ogwukaan̄ n̄a ogwu ubọọn̄ Debit!”

38 Jadọk ogwu ngwugwa, mè Netan ogwu nriran, mè Benaya gwun̄ kè Jeyoyada, mè ebi Keret, mè ebi Pelet ebi ìkibem ogwu ubọọn̄ enanan̄a ije, mè iben Solomọn itoon̄ me inyọn̄ inyinya mgbidim ukot òkup ọkpọkpọ inyi ogwu ubọọn̄ Debit, mè isa ọmọ ije ikwala isibi isi ire Giyọn. 39 Jadọk ogwu ngwugwa îsa ifu aran̄ inan̄a me uwu ọfọ òkup mbuban ikaan̄ me ubọk inu, mè inisa aran̄ ya itọkọ Solomọn me ibot. Ema enenikiwut otita, otutuuk ene ekekitaan̄ ukpo itumu ibe, “Ogwu ubọọn̄ Solomọn, luk ugwem jọn̄ọ!” 40 Otutuuk ebi ene egbọgbọọk isibi ikigọọk Solomọn me udun̄, mè ikiwut òja, mè ikibele ejit enenen. Ida okput kiban̄ osisisik ijọn̄.

41 Mgbọ Adonija mè otutuuk ebi ichen ebi îgween̄be cha ekikana ijọk kiban̄ igwook, ema enọnọ okput ya. Mgbọ Jowabu onọbe ida otita ya, idodo ibe, “Ìre kpasi okput okisisik ama ikilọ ni?”

42 Jowabu òkitumu ikọ ya me otu, Jonatan gwun̄ kè Abiata ogwu ngwugwa okakana isibi. Adonija obebe ọmọ, “Nin̄ na. Owu ìre atalek gwun̄ owot! Nchieek ibe ke owu òkisa ata etip inu.”

43 Jonatan ofọfọọk ibe, “Ìkare kubọk ge! Ogwukaan̄ kiji ogwu ubọọn̄ Debit îrọ Solomọn ubọọn̄. 44 Ogwu ubọọn̄ ìraria Jadọk ogwu ngwugwa, mè Netan ogwu nriran, mè Benaya gwun̄ kè Jeyoyada, mè ebi Keret, mè ebi Pelet ebi ìkibem ogwu ubọọn̄, ibe egọọk Solomọn esi. Ema eben ọmọ itoon̄ me inyọn̄ inyinya mgbidim ukot òkup ọkpọkpọ inyi ogwu ubọọn̄ isa ije. 45 Jadọk ogwu ngwugwa, mè Netan ogwu nriran etọtọkọ ọmọ aran̄ me ibot, mè irọ ọmọ ubọọn̄ me agba mun̄ Giyọn. Ema enenibene me ere ya ikibọn̄ okoko, mè ikinwọọn̄ uga unwọọn̄, ikije inin̄ emen ama, ama okekisisik. Eya ore ida okput ya enyi ekinọ. 46 Ògak ge, Solomọn îra isisi isi isiki ikweek irek me inyọn̄ ogboon̄ ubọọn̄ ido. 47 Ofifi si, ebi ikwaan̄ ogwu ubọọn̄ mînu initọn̄ ogwukaan̄ kiji ogwu ubọọn̄ Debit, mè ikibe ọmọ, ‘Kè Awaji kwun̄ irọ inyi erieen̄ kè Solomọn itaan̄ etip igak eyi kwun̄, mè ogboon̄ ubọọn̄ kan̄ imin si igak eyi kwun̄!’ Ogwu ubọọn̄ Debit okukup me inyọn̄ mkpilaak, mè igele ibot isiki itọbọ ebum, 48 mè itumu ibe, ‘Itọn̄ ikup inyi owu Okumugwem, Awaji ebi Ijeren, ogwu ògogobo ogwu òbonisiki ikweek me inyọn̄ ogboon̄ ubọọn̄ me irek n̄a cherekeyi, mè irọ ibe emi ǹsa chieen̄ n̄a m̀mun̄.’ ”

49 Otutuuk ebi ichen kè Adonija eririki mije ukpook, mè inan̄a ikeke, mè ikpọk iyat, ogwu ikup, ònin̄ oniin̄ kan̄. 50 Mije ukpook kè Solomọn, Adonija osisi ikana iko echi òkup me lek ntook ngwugwa igọbọ ikam. 51 Enenisi ikpa inyi Solomọn ibe, “Kpọ, Adonija îtet ukpook me lek ogwu ubọọn̄ Solomọn, mè isi igọbọ iko echi òkup me lek ntook ngwugwa ikam, mè ikibe, ‘Ogwu ubọọn̄ Solomọn inyan̄a ibot inyi emi cherekeyi ibe ke ọmọ ìkpokpan̄ emi ogwu usun̄ kan̄.’ ”

52 Solomọn ofọfọọk ibe, “Ire ijeen̄ ibe ke ọmọ îgbe utoon̄-ejit, kpunu ukut ijeek ge ikeyi òbojibi me ibot kan̄ irọn̄ me ijọn̄. Ire, ire ijo inu ikup me emen kan̄, ìbokwukwu.” 53 Ogwu ubọọn̄ Solomọn oraria ibe esi esa Adonija enu, esisi isan̄a ọmọ inan̄a me lek iko òkup me lek ntook ngwugwa, mè isa ọmọ inu. Inunu, mè inigele igwook me ijọn̄ inyi ogwu ubọọn̄ Solomọn. Solomọn onenibe ọmọ, “Je fo uwu kwun̄.”