Ikpa Ebi Ubọọn̄ eyi òso iba ìre okpọkọ eyi òso iba me lek ikpa Ebi Ubọọn̄. Ikpa Ebi Ubọọn̄ eyi òso iba ìkikpa mfufuk ebi Ijeren mgbọ ema echebe lek ikana ido iba, ido Juda me agan̄ osiki, melek ido Ijeren me agan̄ inyọn̄.

Ikpa yi ìre irek iba. Adasi irek (ibot 1-17), ìkikpa mfufuk ido iba chi, mege ire mgbọ ebi Asiria etimbe akọn̄ ikpan̄ ebi Ijeren, òrere ebi ido agan̄ inyọn̄, mè ijijaka Sameria, ama ibot kiban̄, mè ikpulu ebi ido agan̄ inyọn̄ me usun̄ akọn̄ isa ifon ido Asiria. Òso irek iba (ibot 18-25), ìkikpa mfufuk ido Juda, mege ire mgbọ Nebukadineja, ogwu ubọọn̄ Babilọn, otimbe akọn̄ ikpan̄ ebi Juda, mè ijijaka Jeruselem, ama ibot kiban̄, igwook, mè ikpulu ebi Juda me usun̄ akọn̄ isa ifo Babilọn. Me òta ikpa yi, mîge inu ofolek kè Gedaliya ogwu ebi Babilọn etobe ibe ikikpulu ido Juda.

Ufialek chi ìnu inyi ebi Ijeren mè ebi Juda, mije, ema mè ebi ubọọn̄ kiban̄ kpegban̄ utọn̄ inyi Okumugwem, ubọk geelek Okumugwem oriabe owuwa ebi nriran, me mgbọ me mgbọ, ibe eneketaba ema ubọk me utọn̄. Ogwu nriran òmimin ichit me etete ebi nriran cha ìre ogwu nriran Ilaisia, ogwu òbọbọkọ ikwaan̄ me ubọk kè Ilaija.