Ebi Ubọọn̄
Eyi Òso Iba
Okumugwem îtip Ayajaya oyerebet
1
Mgbọ Eyabu okwube iraka, ebi Mowabu enenibene ikikpaka ibot inyi ebi Ijeren. 2 Usen ge Ayajaya onenikwala me agbagba otitop uwu inyọn̄ kan̄ me Sameria, mè inan̄a irọn̄ me ijọn̄, mè isak ikpele unan. Ineniria ebi ene ibe esi lek Baali-Jebup, awaji ebi Ekurọn, esi edo-nu eriọọn̄ mè ìre ọmọ mônan̄a ikeke me ijọn̄ orukan̄ ya me unye lek.3 Ire ogwu osat Okumugwem onenitumu inyi Ilaija ogwu Tisibe ibe, “Je si chichini ebi osat ogwu ubọọn̄ Sameria me oniin̄, mè do ema ibe, ‘Eyi enyi enan̄abe ije ibesi lek Baali-Jebup, awaji ebi Ekurọn, isi ido inu, ìre kpunu Awaji me Ijeren ni?’ 4 Eya orọ, Okumugwem ìtumu ibe ikeyi: ‘Owu òkponan̄a isibi me inyọn̄ mkpilaak ya olaakbe, ere ya ke owu obokup ikwu.’ ” Ilaija onanan̄a ije isi ilook etip ya.
5 Ebi osat cha egwugwu ikom inu me lek ogwu ubọọn̄, ogwu ubọọn̄ onenido ema ibe, “Keke orọ enyi egwube ikom ika?”
6 Ema efọfọọk ibe, “Ogwu enerieen̄ ge ochichini eji me oniin̄, mè itumu inyi eji ibe, ‘Ìgwu ìkom ìsi ìlook ogwu ubọọn̄ òraria enyi ikwaan̄ ibe ke Okumugwem ìtumu ibe ikeyi: “Eyi enyi enan̄abe ikije ibesi lek Baali-Jebup, awaji ebi Ekurọn, isi ido inu, ìre kpunu Awaji me Ijeren ni? Eya orọ, ke owu òkponan̄a isibi me inyọn̄ mkpilaak ya olaakbe, ke îre ere ya ke owu obokup ikwu.” ’ ”
7 Ogwu ubọọn̄ onenido ema ibe, “Ìre kpasi ene ore ene ya ogwu ònunu inichichini enyi, mè initumu ikọ chi inyi enyi?”
8 Ema enenifọọk ibe, “Ogwu enerieen̄ ya ìre ogwu inwọọn̄ lek, mè itobo fanti ikpa anam me ebon.”
Ogwu ubọọn̄ obebe, “Îre Ilaija ogwu Tisibe!”
9 Ogwu ubọọn̄ oneniria ogwu ibot akọn̄ ge òkikpulu akọp ebi akọn̄ go, ọmọ melek akọp ebi akọn̄ go kan̄, isi lek kè Ilaija. Ogwu ibot akọn̄ ya osisi imun̄ Ilaija osikibe ikweek irek me inyọn̄ ibot orioon̄ ge, mè itumu inyi ibe, “Ogwu ikwaan̄ Awaji, ogwu ubọọn̄ ìbe owu òsibi ònu.”
10 Ilaija ofọfọọk ogwu ibot akọn̄ ya ibe, “Ire emi ìre ogwu ikwaan̄ Awaji, kè ukan̄ Awaji inan̄a me isinyọn̄ inu initaka owu mè akọp ene go ebi melek kwun̄ ikpan̄!” Ukan̄ onanan̄a me isinyọn̄ inu, mè initaka ogwu ibot akọn̄ ya mè ebi melek kan̄ ikpan̄ isan̄a kpai.
11 Ogwu ubọọn̄ okpọkpọk iria ofifi ogwu ibot akọn̄ òkikpulu akọp ebi akọn̄ go, ọmọ melek akọp ebi akọn̄ go kan̄. Ogwu ibot akọn̄ ya onunu initumu inyi Ilaija ibe, “Ogwu ikwaan̄ Awaji, ogwu ubọọn̄ ìbe owu: ‘Gwat lek sibi ijọn̄ na mgbọ keyi!’ ”
12 Ilaija ofọfọọk ọmọ ibe, “Ire emi ìre ogwu ikwaan̄ Awaji, kè ukan̄ Awaji inan̄a me isinyọn̄ inu initaka owu mè akọp ene go ebi melek kwun̄ ikpan̄!” Ukan̄ onanan̄a me isinyọn̄ inu, mè initaka ogwu ibot akọn̄ ya mè ebi melek kan̄ ikpan̄ isan̄a kpai.
13 Ogwu ubọọn̄ oneniria òso ogwu ibot akọn̄ ita òkikpulu akọp ene go, ọmọ melek akọp ene go kan̄ ibe esi. Ogwu ibot akọn̄ ogwu òso ita ya onenene isi inyọn̄ orioon̄ ya, mè inigele igwook, mè itọbọ ekpe me isi kè Ilaija, mè ikibeek Ilaija ibe, “Ogwu ikwaan̄ Awaji, soso to eji nsan, emi melek akọp ebi ikwaan̄ kwun̄ go chi. Tele ibe eji eluk ugwem, mè ekakwaan̄! 14 Ukan̄ înan̄a me isinyọn̄ inu, mè initaka adasi ebi ibot akọn̄ iba ìkikpulu si akọp ene go ikpan̄, ema melek otutuuk ebi melek kiban̄. Eya orọ, mgbọ keyi, soso to emi nsan, mè tele ibe ǹgat ugwem!”
15 Ogwu osat Okumugwem onenibe Ilaija, “Sibi ijọn̄ gọọk je! Katet ukpook me lek kan̄!” Ilaija oneninan̄a isibi igọọk ogwu ibot akọn̄ ya ije isi imun̄ ogwu ubọọn̄.
16 Mgbọ Ilaija orebe isi ogwu ubọọn̄, itutumu inyi ogwu ubọọn̄ ibe, “Okumugwem ìtumu ibe ikeyi, ‘Ìre mije kpunube Awaji me Ijeren, ogwu enyi mêkọtbe isi lek isi ido inu iriọọn̄, orọ owu oriabe ebi ene ibe esi lek Baali-Jebup, awaji ebi Ekurọn, esi edo inu eriọọn̄? Mije inu keyi owu orọbe, owu òkponan̄a isibi me inyọn̄ mkpilaak ya olaakbe, ere yi ke owu obokup ikwu!’ ” 17 Ayajaya okwukwu ike Okumugwem otumube inan̄a me otu kè Ilaija.
Mije Ayajaya ikakaan̄ge gwun̄ enerieen̄ geege, Joram ogwu ngwan̄ onenikana ogwu ubọọn̄ Ijeren me irek kan̄, me òso acha iba me lek mkpulu kè Jiosefat ogwu ubọọn̄ Juda. 18 Otutuuk ofifi inu òrọrọ me ukot mkpulu kè Ayajaya, mè otutuuk inu geelek îrọbe, mîge otutuuk itap me emen ikpa mfufuk echi ebi ubọọn̄ Ijeren.