Mkpa kè Abusolọm
18
Debit onenidọmọ ebi akọn̄ kan̄ itap me irek, mè ito ebi ibot ìkikpulu obop obop ebi akọn̄, mè ebi ibot ìkikpulu efit efit ebi akọn̄. 2 Inenifele ebi akọn̄ kan̄ irek ita, mè iria ema isibi isi akọn̄. Irek ge ke îsa Jowabu ito me ibot, ofifi ke îsa Abisai, gwun̄ kè Seruya, òrere si ngwan̄ kè Jowabu, ito me ibot. Irek ge keyilọ ke îsa Itai ogwu Gat ito me ibot. Ogwu ubọọn̄ onenitumu inyi ebi akọn̄ cha ibe, “Emi me lek n̄a si, m̀bagọgọọk enyi isibi isi akọn̄ keyi, m̀kpabia me udun̄!”3 Ebi akọn̄ cha ebebe ọmọ, “In̄-in̄! Owu òkposi! Mije, ire akọn̄ inye igak eji, mè eji ilim inan̄a me isi akọn̄, eya ìkpore inu geege me lek kiban̄. Ikerere ìkike iba me otu ifuk kiji ekwaan̄ me akọn̄, eya ìkpore si inu geege me lek kiban̄. Ire, owu òkup kubọk akọp obop ene kiji. Eya orọ, mônwọn me lek kiji ibe owu òkup me emen ama òkotap eji efuuk me emen.”
4 Ogwu ubọọn̄ ofọfọọk ibe, “Inu geelek enyi emun̄be ibe ke înwọn, eya ke mbarọ.”
Ogwu ubọọn̄ onenikeke me agba otunchit ama ikikpọ ebi akọn̄ kan̄ ekiraka isibi me urum me urum, me efit me efit, me obop me obop. 5 Ogwu ubọọn̄ oneninyi Jowabu mè Abisai mè Itai ida ibe, “Mije n̄a, soso, ìrọ gwun̄ enerieen̄ ya, Abusolọm, inu me lek ususuk.” Otutuuk ebi akọn̄ cha enọnọ mgbọ ogwu ubọọn̄ okinyi ebi ibot akọn̄ cha ida ofolek kè Abusolọm.
6 Ebi akọn̄ kè Debit ejijibi akọn̄ isibi ibesi itim me lek ebi akọn̄ Ijeren. Etim akọn̄ ya me oron ido Iferem. 7 Me ere ya, ebi akọn̄ kè Debit etitim ikpan̄ ebi akọn̄ Ijeren, mè ikpan̄ ema jakajaka. Ebi Ijeren ìkwakwaan̄ usen ya ìre akọp obop ene iba. 8 Akọn̄ ya onenikpọk isan ichit otutuuk inyọn̄ ijọn̄ ya. Ebi oron gaalek osakbe me usen ya mîwa enenen igak ebi ìkwaan̄ me otu oge akọn̄.
9 Me ekakpọge chieen̄, Abusolọm onenichichini melek ebi akọn̄ kè Debit. Ìkikọp me inyọn̄ inyinya mgbidim ukot kan̄. Inyinya ya onenilibi isi inin̄ irak sanasana agọọk ikpele uti ilip ge, ibot kan̄ onwanwaan̄ me agbagba sanasana agọọk uti ya. Inyinya ya ọmọ okupbe me inyọn̄ olilibi iraka. Ọmọ ojejeen̄, mè ikididen̄, ukot kan̄ ìkare ijọn̄. 10 Ene ge me lek ebi akọn̄ kè Debit omumun̄ ọmọ, mè initumu inyi Jowabu ibe, “Mmun̄ Abusolọm ojeen̄be me lek agọọk uti ilip ge.”
11 Jowabu onenibe ogwu enerieen̄ òtutumu ikọ ya inyi ọmọ, “Ìre osa chieen̄ kwun̄ imun̄ ọmọ? Keke orọ òkagon ọmọ ito me ijọn̄ me ere ya mgbọ yaage? Mebe ke orọ, kè emi nsa akọp ikpoko alata okuket mè fanti ebi usọ akọn̄ ge m̀waak owu ubọk.”
12 Ire, ogwu enerieen̄ ya onenifọọk ibe, “Ikerere òfufuk obop ikpoko alata okuket itap emi me akajit ubọk, m̀kpabene ubọk n̄a isa ikpan̄ gwun̄ ogwu ubọọn̄. Mije, eji mîsa utọn̄ kiji inọ mgbọ ogwu ubọọn̄ onyibe owu mè Abisai mè Itai ida ibe, ‘Ikachieek ibe unan geege isak me lek gwun̄ enerieen̄ ya, Abusolọm, mije n̄a.’ 13 Ire makpaka ibot, mè ilet ikpan̄ Abusolọm, ogwu ubọọn̄ kè ònọ, mije, kpunu inu geege òkilet me lek ogwu ubọọn̄. Mgbọ ya, kè owu olibi òtele emi.”
14 Jowabu onenibe ene ya, “Emi m̀kpakọt ikup ikifiat mgbọ ikeyi melek kwun̄.” Inenimọnọ otunwa ita ikaan̄ me ubọk isa isi ere Abusolọm ojeen̄be me agbagba agọọk uti ilip ya, mè ikididen̄, mè isa otunwa cha ichiin̄ inwaan̄ Abusolọm me ejit. Mgbọ ya, Abusolọm òwa si me ugwem, ìkakwu. 15 Akọp ebi ìkiben nroon̄ akọn̄ kè Jowabu egbagban ikana Abusolọm, mè igoon̄ ikpan̄.
16 Jowabu oneniwut otita isa inyi ida ibe ebi akọn̄ egwu ekom, mè ekayaka ìgọọk ebi Ijeren. Ema egwugwu ikom, ike Jowabu onyibe ida. 17 Ema eneniben nkwukwu kè Abusolọm itọp itap me emen udọn̄ ilile ge me oron ya, mè itọọn̄ ewuuk ilile itoon̄ ibene ichit udọn̄ ya. Otutuuk ebi Ijeren elilim ifon uwu kiban̄ isan̄a.
18 Me ògat ugwem kan̄, Abusolọm îsa ewuuk inama inu ǹkeek ge inyi lek kan̄ me iteke Ogwu Ubọọn̄, mije ikakaan̄ge gwun̄ enerieen̄ òbonichieek erieen̄ kan̄, ogwu ebesa me lek ikikeek erieen̄ kan̄. Abusolọm osasa erieen̄ kan̄ igwen ewuuk ya. Ikeya si ke ekigwen ewuuk ya, Ewuuk kè Abusolọm, mege inire cherekeyi.
Debit îfieek ejit inyi Abusolọm
19 Ayimaji gwun̄ kè Jadọk onenibe, “Mânisa etip isi ilook ogwu ubọọn̄ ibe ke Okumugwem înyan̄a ọmọ isibi me ubọk ebi ochicha kan̄.”
20 Jowabu onenibe ọmọ, “Ìkare owu obosa etip keyi ije cherekeyi. Owu môkọt isa etip ije ofifi usen. Ire, cherekeyi, owu òkposa etip keyi ije, mije, gwun̄ ogwu ubọọn̄ îkwu.”
21 Jowabu onenitumu inyi ogwu Kus ge ibe, “Owu sa inu chi òrọrọ si kpa nyi ogwu ubọọn̄, ike omun̄be.” Ogwu Kus ya ogegele igwook inyi Jowabu, mè inan̄a ilibi ije.
22 Ayimaji gwun̄ kè Jadọk onenikpọk ibe Jowabu, “Ubọk geelek îrebe, nye lek tele mè ǹlibi ǹgọọk ogwu Kus ya me udun̄.”
Ire, Jowabu ofọfọọk ọmọ ibe, “Gwun̄ n̄a, keke orọ okiweek isisi? Owu òkakaan̄ etip geege eyi mêsabe me lek iwaak owu ubọk.”
23 Ayimaji okpọkpọ itet lek inye ikitumu ibe, “Ubọk geelek ikukup, mweek si ililibi isi ilook etip yi.”
Jowabu onenifọọk ọmọ ibe, “Ire ikeya, libi ma!” Ayimaji onanan̄a ilibi me agan̄ iteke Jodan, mè isi ilibi iraka ogwu Kus ya.
24 Ike Debit osikibe ikweek irek me etete otunchit eyi oyet mè eyi emen, ogwu mbem ge oneninene mgban ama ya isi ire inyọn̄ òtoon̄ uwu otunchit ya, mè inibene chieen̄ ikpọ, mè imun̄ ene ge okilibi ọmọ gaalek ikinu. 25 Ogwu mbem ya onenitaan̄ ukpo igwen ogwu ubọọn̄ itumu inu îmun̄be inyi.
Ogwu ubọọn̄ obebe ọmọ, “Ire ene ya ikilibi ọmọ gaalek inu, ìsibi ibe ke îkaan̄ ata etip ìbosa inilook eji.” Ogwu ene ya okekigbet ama sọnja sọnja.
26 Ogwu mbem ya onenimun̄ si ofifi ene okilibi inu ọmọ gaalek si, mè inigwen ogwu òkibem otunchit itumu inyi ibe, “Kpọ, mmun̄ si ofifi ene okilibi ọmọ gaalek inu!”
Ogwu ubọọn̄ onọnọ, mè ibe, “Ìkpolọlọ si ata etip ke îkisa inu.”
27 Ogwu mbem ya onenibe, “Ike nkimun̄, ogwu adasi ya ìkilibi ekot kubọk Ayimaji gwun̄ kè Jadọk.”
Ogwu ubọọn̄ obebe, “Ayimaji ìre ata ene, ìbore ata etip si ke îkisa inu.”
28 Ayimaji onenire, mè ikitaan̄ ukpo itumu inyi ogwu ubọọn̄ ibe, “Ogwu ubọọn̄, otutuuk inu îje ijaan̄!” Inenigele igwook me ijọn̄ me isi ogwu ubọọn̄, mè inibe, “Itọn̄ ikup inyi Okumugwem Awaji kwun̄ ogwu òdada ebi ìkirọ ikeme ogwukaan̄ n̄a, ogwu ubọọn̄, itap eji me ubọk.”
29 Ogwu ubọọn̄ onenido ọmọ ibe, “Ìre gwun̄ enerieen̄ ya, Abusolọm, ọmọ òwa me utelelek?”
Ayimaji ofọfọọk ibe, “Mgbọ Jowabu oboria ogwu ikwaan̄ kwun̄ melek n̄a ogwu usun̄ kwun̄, mmun̄ ike ikpele okput onin̄be etete ebi ene. Ire, ǹkariọọn̄ inu òkirọ me ere ya.”
30 Ogwu ubọọn̄ onenibe, “Da lek bọkọ si keke-nu me agan̄ keyilọ.” Idada lek ibọkọ isi ikeke me agan̄ ya.
31 Ikafiin̄, ogwu Kus ya onenire, mè inibe, “Ogwukaan̄ n̄a, ogwu ubọọn̄, nsa ata etip ijet owu! Cherekeyi, Okumugwem înyan̄a owu isibi me ubọk otutuuk ebi ìkitim akọn̄ ikeme owu.”
32 Ogwu ubọọn̄ onenido ogwu Kus ya ibe, “Ìre gwun̄ enerieen̄ ya, Abusolọm, ọmọ òwa me utelelek?”
Ogwu Kus ofọfọọk ibe, “Ogwukaan̄ n̄a, ogwu ubọọn̄, ike îfieekbe me lek gwun̄ enerieen̄ ya, ifieek si ikeya me lek otutuuk ebi ìkiweek ebek ugwem kwun̄.”
33 Ikọ ya osisisik ogwu ubọọn̄ lek enenen. Inanan̄a ikeke ije inene ifo emen agwut òkup me inyọn̄ otunchit ama, mè ikup me ere ya ikito ito. Mgbọ îkije, ikekito lek ibe, “Jei, gwun̄ n̄a Abusolọm! Gwun̄ n̄a, gwun̄ n̄a Abusolọm! Ìre keke orọ mkpa keyi ìkaben emi, mè ìtele owu, jei Abusolọm gwun̄ n̄a, gwun̄ n̄a!”