Solomọn îbeek iriọọn̄-inu
3
Solomọn oneninin̄ unene melek kè ogwu Fero ogwu ubọọn̄ Ijipiti, mè imọnọ ogwu gwun̄ enenwaan̄ ge ido me lek nwa, mè isa ika inu ama kè Debit iniluk mege înamabe uwu ubọọn̄ kan̄, mè Uwu Mbuban Okumugwem isan̄a, mè inama si mgban ikana ama Jeruselem okokop. 2 Ubọk geelek si, me ike mgbọ ya, ebi ene ekigwa ngwugwa me inyọn̄ ntook ema enamabe me ere geelek, mije, kpenama-nu Uwu Mbuban ere ebekimin Erieen̄ Okumugwem. 3 Solomọn onenikaan̄ imumechieen̄ me lek Okumugwem, mè ikirọ otutuuk orọmijọn̄ Debit ogwu ute okirọ, gaalek ke ìkisi igwa ngwugwa mè ikiwọp nsensi me inyọn̄ ntook echi ema enamabe.4 Usen ge, ogwu ubọọn̄ onenisi Gibiọn ibosi igwa ngwugwa, mije, îre ere keya ore ere mbuban òmimin ichit. Solomọn ogwagwa obop ngwugwa ewọwọp iriọk me inyọn̄ ntook me ere ya. 5 Me Gibiọn ya, Okumugwem Awaji onenikana isibi me isi kè Solomọn me emen ilaak me eririeen̄, mè initumu inyi ọmọ ibe, “Beek inu geelek oweekbe ibe emi ǹrọ ǹnyi owu.”
6 Solomọn ofọfọọk ibe, “Owu okaan̄ atalek ikpele ata ejit me lek ogwu usun̄ kwun̄ Debit nte n̄a, mije îrọbe atikọ melek kwun̄, mè ire si ogwu ata irọrọ, mè itat si me ejit me isi kwun̄. Owu ojejeen̄ ikpele ata ejit òkup ikeyi me lek kan̄, mè inyi ọmọ gwun̄ enerieen̄ ogwu ònisiki ikweek me inyọn̄ ogboon̄ ubọọn̄ kan̄ cherekeyi.
7 “Mgbọ keyi, Okumugwem Awaji n̄a, owu onenimọnọ emi ogwu usun̄ kwun̄ isa irọ ubọọn̄ me irek kè Debit nte n̄a. Ire, kpọ ma, emi ìre gaalek sọntiik gwun̄, ǹkariọọn̄ ubọk ekirọ inu geege. 8 Kpọ emi ogwu usun̄ kwun̄ ire ogwu me etete ebi owu ogobobe inyi lek kwun̄, ife ìwawa enenen, ire lek kpebekọt ifuk otu ifuk kiban̄ iriọọn̄.
9 “Eya orọ nyi emi ogwu usun̄ kwun̄ ejit eyi iriọọn̄-inu, inyi mâkọtbe ikikpulu ebi kwun̄, inyi ǹkọt ǹkenriọọn̄ inu òrere ata mè eyi òrere ijo. Mije, ìre ekene ene ikike obokọt ikikpulu ikpele ido ebi kwun̄ ìwawa ijot ere ikeyi?”
10 Itotop Okaan̄-ene me lek ibe ke îre inu yi ke Solomọn odo. 11 Awaji onenitumu inyi ọmọ ibe, “Mije owu odobe inu yi, òkado ujọn̄ọ ugwem ìnyi lek kwun̄, òkado ibọbọọn̄ ubọọn̄, òkadodo si ibe emi m̀kpan̄ ebi ochicha kwun̄, ire, owu onenido ibe emi ǹnyi owu ejit ngobo-ntet eyi isasa ikiriọọn̄ unen inu mè nlilọ inu. 12 Eya orọ, m̀barọrọ inu odobe inyi owu. Kpọ, mânyi owu ejit iriọọn̄-inu mè ngobo-ntet, ire lek, kpunu ogwu òrarak ikup kubọk kwun̄ mgbọ òraraka, kpukpunu si ogwu òbokukup kubọk kwun̄ me mgbọ ònu me isi. 13 Ògak ge, mânyi owu inu okadoge si igbaalek. Mârọ owu òbọọn̄ ubọọn̄, mè inyi owu umin, ire lek, kpunu ene geege me etete ebi ubọọn̄ ogbo kwun̄, ogwu ebesa itọ me lek kwun̄ me otutuuk usen ugwem kwun̄. 14 Ire oje me oniin̄ n̄a, mè ikirọ orọmijọn̄ n̄a, mè ikirọ ikọ ntọbe kubọk Debit nte kwun̄ orọbe, mârọ ibe ugwem kwun̄ ijọn̄ọ.” 15 Solomọn obobolo chieen̄, mè iniriọọn̄ ibe ke îre ilaak ke ọmọ okimumun̄. Ineninan̄a inu Jeruselem, mè inikeke me isi Okop Inyan̄a-ibot Okumugwem, mè igwa ngwugwa ewọwọp iriọk melek ngwugwa esuuk, mè ito ijọk inyi otutuuk ebi ikwaan̄ uwu kan̄.
Solomọn îsibi uyọt uyọt oyerebet
16 Usen ge, ebibaan̄ òje oyet iba esasa oyerebet inu me isi ogwu ubọọn̄ Solomọn, mè inikeke me isi kan̄. 17 Ene ge me lek kiban̄ onenibe, “Soso, ogwukaan̄ n̄a, emi melek ogwu enenwaan̄ yi egbaan̄ iluk me emen uwu ge. Ike eji ekigbaan̄ iluk, emi nneniman gwun̄. 18 Egwe ita iraraka me lek gwun̄ ya mmanbe, ọmọ oneniman si gwun̄ eyi kan̄. Eji gaalek ekup, kpunu ofifi ene me uwu ya, ilọ me lek kiji ene iba.
19 “Me eririeen̄, gwun̄ enerieen̄ ogwu enenwaan̄ yi omanbe okwukwu, mije îlaakbe ikeme ogwu gwun̄. 20 Me ejit eririeen̄, mgbọ ilaak obenbe emi ogwu usun̄ kwun̄, ogwu enenwaan̄ yi onwenween̄ lek iniben gwun̄ n̄a enerieen̄ isan̄a me isi n̄a isa isi imaan̄ me isi kan̄, mè iniben gwun̄ kan̄ òkwukwu inimaan̄ me isi n̄a. 21 Mgbọ egwe owelebe, mbolobe chieen̄ ibanyi gwun̄ n̄a ebe, ǹyaka inimun̄ ibe ke gwun̄ ya îkwu. Nnenigwuun̄ chieen̄ ikpọ gwun̄ ya me ewelegwe, mè imun̄ ibe ke ìkare gwun̄ n̄a enerieen̄ mmanbe.” 22 Ogwu enenwaan̄ keyilọ obebe, “In̄-in̄! Gwun̄ òkup me ugwem ore gwun̄ n̄a; eyi òkwukwu ìre eyi kwun̄.”
Ire, ogwu adasi ya obebe, “In̄-in̄! Eyi òkwukwu ore eyi kwun̄; eyi òkup me ugwem ìre eyi n̄a.” Ikeyi ke ebibaan̄ iba chi etet lek inye ikigbini ikọ yi me isi ogwu ubọọn̄.
23 Ogwu ubọọn̄ onenibe ema, “Ogwugwu ìbe, ‘Gwun̄ n̄a ore ogwu òkup me ugwem; gwun̄ kwun̄ ore ogwu òkwukwu,’ sà ogwulọ obe, ‘In̄-in̄! Gwun̄ kwun̄ ore ogwu òkwukwu; gwun̄ n̄a ore ogwu òkup me ugwem.’ ” 24 Ogwu ubọọn̄ onenibe, “Ìsa oge akọn̄ ìjet emi.” Esasa oge akọn̄ ijet ogwu ubọọn̄. 25 Ogwu ubọọn̄ onyinyi ida ibe, “Tọbọ gwun̄ ya òkup me ugwem bum iba, mè sa okpọkọ ge nyi ogwu enenwaan̄ keyi, mè sa okpọkọ ge nyi ogwu enenwaan̄ keyilọ.”
26 Ogwu enenwaan̄ òrere nga gwun̄ òkup me ugwem ya otataan̄ ukpo, mije njijin ogwu gwun̄ ogwookbe ọmọ me lek, mè itumu inyi ogwu ubọọn̄ ibe, “Soso, ogwukaan̄ n̄a, sa gwun̄ òkup me ugwem ya nyi ogwu enenwaan̄ ya! Kalululuk ìkpan̄!”
Ire, ogwu enenwaan̄ keyilọ obebe, “Ìkpore eyi n̄a, ìkporere si eyi kwun̄! Tọbọ bum iba!”
27 Ogwu ubọọn̄ onenifieek oyerebet ibe, “Sa gwun̄ òkup me ugwem ya nyi adasi ogwu enenwaan̄ ya, ke ọmọ ore ogwu uga. Kalululuk ìkpan̄.”
28 Otutuuk ebi ido Ijeren enọnọ otu oyerebet ya ogwu ubọọn̄ ofieekbe. Ukpook ogwu ubọọn̄ ya otetet ema enenen, mije, ema mîmun̄ ibe ke iriọọn̄-inu Awaji òwa me emen kan̄ isasa ikisibi unen oyerebet.