4 Mgbọ ogwu ubọọn̄ Jerobuwam onọbe ufieek-otu ya ogwu ikwaan̄ Awaji ofieekbe inyi ntook ya me Beten, ikukup me inyọn̄ ntook ya inyana ubọk ida ogwu ikwaan̄ Awaji ya, mè ibe, “Ìtet ene ya!” Ire, ubọk kan̄ ya înyanabe ida ogwu ikwaan̄ Awaji ya ochachiaak ikam ikeya, ìkayaka ìkọt ìtaba ìgba lek. 5 Ntook ngwugwa ya otọtọbọ ibum, ntọn̄ òkup me inyọn̄ ogbugbuku igwook me ijọn̄, igọọk me lek inu òriọọn̄ eyi ogwu ikwaan̄ Awaji ya onyibe, ike Okumugwem otumube.

6 Ogwu ubọọn̄ oneniriaak ogwu ikwaan̄ Awaji ya ibe, “Soso, beek Okumugwem Awaji kwun̄, mè riaak uriaak me ibot n̄a ibe ubọk n̄a iyaka ikup kubọk adasi mgbọ.” Ogwu ikwaan̄ Awaji onenibeek Okumugwem mbeek me ibot kan̄, ubọk ogwu ubọọn̄ olọlọkọ, mè iniyaka ikup kubọk adasi mgbọ.

7 Ogwu ubọọn̄ onenitumu inyi ogwu ikwaan̄ Awaji ya ibe, “Na, na gọọk emi si uwu n̄a si bọkọ sọn̄ inorie rie, inyi mâche sọntiik uche inyi owu.”

8 Ire, ogwu ikwaan̄ Awaji ya ofọfọọk ogwu ubọọn̄ ibe, “Ikerere òbonyi emi ìkike iba inu ubọọn̄ kwun̄, m̀kpagọọk owu isi uwu kwun̄, m̀kparie inorie geege, m̀kpanwọnwọ si mudim geege me ere keyi. 9 Mije, Okumugwem ìnyinyi emi ida ibe, ‘Kalululuk ìrie inorie geege, kanwọnwọ si mudim me ere ya, ikaan̄ oniin̄ ojebe isi ere ya, kaje oniin̄ keya ìka.’ ” 10 Ogwu ikwaan̄ Awaji ya onenije me ofifi oniin̄ ifo, ìkayaka ìje me oniin̄ îjebe inu Beten.

11 Me ike mgbọ ya, îkaan̄ ogwu nriran ge, ugane, òluk me Beten. Bọn ebirieen̄ kan̄ enunu iniben otutuuk inu cha ogwu ikwaan̄ Awaji ya orọbe me usen ya me Beten ikpa inyi. Mîkpa si inu ogwu ikwaan̄ Awaji ya otumube inyi ogwu ubọọn̄ inyi nte kiban̄. 12 Nte kiban̄ onenido ema ibe ìre oniin̄ agan̄ owa ke îje inin̄. Bọn ebirieen̄ kan̄ cha enenijeen̄ ọmọ oniin̄ ogwu ikwaan̄ Awaji ya ònan̄a me Juda ojebe inin̄. 13 Ogwu nriran ogwu ugane ya onenitumu inyi ebi bọn ibe, “Ìtoon̄ inu ikweek irek me inyọn̄ inyinya akpan ìnyi emi.” Etotoon̄ inu ikweek irek me inyọn̄ anam ya inyi, inenene, 14 mè ilibi igọọk ogwu ikwaan̄ Awaji ya, mè isi imun̄ ọmọ osikibe ikweek me irak ilip ge ikitap efuuk, mè inido ọmọ ibe, “Ìre owu ore ogwu ikwaan̄ Awaji ya ònan̄a me Juda inu?”

Ifọfọọk ibe, “Iin̄, îre emi.”

15 Ogwu nriran ya onenibe ọmọ, “Na, na gọọk emi si uwu, mè si bọkọ sọn̄ inorie rie.”

16 Ogwu ikwaan̄ Awaji ya onenibe, “M̀kpakọt igọọk owu igwu ikom ije, m̀kparie inorie geege, m̀kpanwọnwọ si mudim me ubọk kwun̄ me ere keyi, 17 mije, Okumugwem ìtutumu inyi emi ibe, ‘Kalululuk ìrie inorie geege, kanwọnwọ si mudim me ere ya, ikaan̄ oniin̄ ojebe isi, kaje oniin̄ yaage ìka.’ ”

18 Ogwu nriran ogwu ugane ya onenifọọk ọmọ ibe, “Emi si ìre ogwu nriran kubọk owu orebe. Îre ogwu osat onu initumu inyi emi, sa me ida Okumugwem, ibe, ‘Si sa ogwu enerieen̄ ya na me uwu kwun̄, inyi inirie inorie, mè inwọ mudim.’ ” Ire, ìfafiaan̄ ogwu enerieen̄ ya. 19 Ogwu ikwaan̄ Awaji ya onenigwu ikom igọọk ọmọ isi uwu kan̄, mè irie inorie mè inwọ mudim.

20 Mgbọ ema ekweekbe irek me lek ikasi ikirie inorie, Okumugwem onenitumu ikọ inyi ogwu nriran ogwu ugane ya, ogwu òsisi isa ogwu ene ya igwu ikom inu. 21 Inenitaan̄ ukpo itumu inyi ogwu ikwaan̄ Awaji ya ònan̄a me Juda ibe, “Okumugwem ìtumu ibe ikeyi, ‘Owu okpaka ibot inyi ida ikọ Okumugwem, òkagban̄ utọn̄ me lek ikọ Okumugwem Awaji kwun̄ otọbe inyi owu. 22 Owu ogwu ikom isi ere mbe owu okasi, mè irie inorie, mè inwọ mudim me ere mbe owu okarie inorie, mè okanwọ mudim. Eya orọ, kpebefuun̄ nkwukwu kwun̄ me udọn̄-ufuun̄ ere efuun̄be ebi nte nte kwun̄.’ ”

23 Mgbọ ogwu ikwaan̄ Awaji ya oriebe inorie mè inwọ mudim isan̄a, ogwu nriran ogwu ugane ya, ogwu òsasa ọmọ igwu ikom inu ya, onenitoon̄ inu ikweek irek me inyọn̄ inyinya akpan kan̄ inyi, inenene ikikọp. 24 Mgbọ îkilibi ije, egbe àtat ge onanan̄a isibi ikweek ọmọ, mè ikpan̄ ọmọ ito me lek oniin̄. Nkwukwu kan̄ olalaak inyana me eden̄ oniin̄. Inyinya ya melek egbe àtat ya ekekeke igba. 25 Ebi ene ejeje iraka, mè imun̄ nkwukwu ene ya onyanabe me eden̄ oniin̄, melek egbe àtat ya okekebe igba, mè iben isi ikpa inyi ebi ene me ama ere ogwu nriran ogwu ugane ya olukbe.

26 Mgbọ ogwu nriran òsisi isa ọmọ me oniin̄ igwu ikom inu ya onọbe inu ya orọrọ, inenibe, “Ogwu ikwaan̄ Awaji ya òkpakpaka ibot inyi ikọ Okumugwem ke îre. Okumugwem îria egbe àtat inyi inichim ọmọ ikpan̄ me oniin̄, ike Okumugwem owuukbe lek itumu inyi ọmọ.”

27 Ogwu nriran ya onenitumu inyi bọn ebirieen̄ kan̄ ibe etoon̄ inu ikweek irek me inyọn̄ inyinya kan̄ enyi ọmọ, etotoon̄ inyi. 28 Ililibi isi imun̄ nkwukwu ogwu ikwaan̄ Awaji ya olaakbe inyana me eden̄ oniin̄, mè imun̄ inyinya akpan ya melek egbe àtat ya ekekebe igba. Egbe àtat ya ìkataka nkwukwu ene ya, ìkayaka ìchichim si inyinya akpan ya ìkpan̄. 29 Ogwu nriran ogwu ugane ya oneniben nkwukwu ogwu ikwaan̄ Awaji ya itoon̄ me inyọn̄ inyinya akpan kan̄, mè isa igwu ikom ika inu ama kiban̄, efefieek ejit inyi, mè iben ifuun̄. 30 Efuun̄ ogwu ikwaan̄ Awaji ya me udọn̄-ufuun̄ ogwu nriran ogwu ugane ya, mè ifieek ejit inyi, mè ikito ito ibe, “Jei, ngwan̄ n̄a!”

31 Mgbọ îfuun̄be ogwu ikwaan̄ Awaji ya isan̄a, inenitumu inyi bọn ebirieen̄ kan̄ ibe, “Nsikwu, ìfuun̄ emi me emen udọn̄-ufuun̄ ere efuun̄be ogwu ikwaan̄ Awaji yi, ìmaan̄ ukwuuk n̄a me agba lek ukwuuk kan̄. 32 Mije, otutuuk inu cha îsabe me ida Okumugwem itumu ikeme ntook ngwugwa òkup me Beten, mè itumu si ikeme otutuuk isi-ijọn̄ òkup me ama geelek me Sameria ìborọrọ iso.”

33 Ubọk geelek inu chi orọbe, Jerobuwam ìkanwene ugwem kan̄. Ikpọkpọ ikigobo si ebi ikike isa ikirọ ebi ngwugwa, inyi ekesi ikwaan̄ me isi-ijọn̄ cha. Ogwu iweek irere ogwu ngwugwa, îra iken ene ya aran̄, mè ifaka ikwaan̄ itap me ubọk, inyi ikisi ikwaan̄ me isi-ijọn̄ cha. 34 Inu yi onenikana ikpele ijo inu me uwu kè Jerobuwam, mè ikpan̄ otutuuk ebi owot iman kan̄ isan̄a, mè itutuku erieen̄ kiban̄ isan̄a kpai me linyọn̄.