2 Okumugwem onenitumu inyi Ilaija ibe: 3 “Nan̄a me ere yi, mè je kana fo agan̄ mbum-ura, mè si let me ibot odidim Kerit eyi òkup me agan̄ mbum-ura okwaan̄ Jodan. 4 Owu môkinwọ mun̄ inan̄a me emen odidim ya. Nra inyi ida ibe ebi kè ùgọọk ekesa inorie enekpukpo owu me ere ya.”

5 Ilaija orọrọ ike Okumugwem obe ọmọ irọ, mè ije ifo agba lek odidim Kerit eyi òkup me agan̄ mbum-ura okwaan̄ Jodan isi ikweek. 6 Ebi kè ùgọọk ekekisa fituru mè anam ijet ọmọ ewelegwe geelek mè ikakwun̄ geelek. Ọmọ okekinwọ mun̄ inan̄a me emen odidim ya.

7 Sọn̄ mgbọ iraraka, odidim ya ochachiaak, mije, ibot ìkayaka ìkirep me otutuuk ido ya. 8 Okumugwem onenitumu inyi Ilaija ibe: 9 “Ngwa, nan̄a je fo Jerefat òkup me Sidọn si kup. Nra inyi nwakpa ge òkup me ama ya ida ibe ikpọ owu owot.” 10 Ilaija onanan̄a isi Jerefat. Mgbọ îjebe ire otunchit ama ya, nwakpa ge òwa me ere ya okititen̄e iye. Ilaija onenigwen ogwu enenwaan̄ ya itumu inyi ibe, “Soso, si sa gwun̄ ogbokot chibi sọn̄ mudim jet emi ǹnwọ.” 11 Mgbọ ogwu enenwaan̄ ya okije ibosi isa mudim ya inu, igwegwen si ogwu enenwaan̄ ya ibe inye lek isa si sọn̄ okpọkọ fituru igbaalek ijet ọmọ.

12 Ogwu enenwaan̄ ya ofọfọọk Ilaija ibe, “Kè lek ugwem Okumugwem Awaji kwun̄, ǹkakaan̄ fituru geege me uwu, ilọ me lek ubọk akpa ekọkọk ge òkup me emen ogbokot, melek sọn̄ aran̄ òkup me emen iko. Iye omun̄be nkititen̄e me ere yi, m̀basa isi isọk ukan̄ isa sọn̄ akpa melek aran̄ ya irọ sọn̄ inorie emi mè gwun̄ n̄a enerieen̄ eberie. Eji isirie isan̄a, eji mêkwakwaan̄.”

13 Ilaija onenibe ọmọ, “Kafieek owot. Fo, mè si rọ ike otumube. Ire, dasi sa sọntiik me lek rọ sọn̄ okpukpuk unin̄i fituru ge sa jet emi, mè si sa eyi òsisik rọ nyi lek kwun̄ melek gwun̄ kwun̄. 14 Mije, Okumugwem, Awaji ebi Ijeren ìbe ikeyi: ‘Akpa ekọkọk ìkpota me emen ogbokot, aran̄ ìkponan me emen iko aran̄, mege ire usen Okumugwem môrọbe ibe ibot ikpọk irep igwook me ijọn̄.’ ”

15 Ogwu nwakpa ya ojeje inan̄a, mè isi irọ ike Ilaija otumube. Ọmọ mè ototun̄ ukan̄ kan̄ melek Ilaija ekakaan̄ inorie ikirie egwe geelek. 16 Akpa ekọkọk ìkata me emen ogbokot, aran̄ ìkanan me emen iko aran̄, igọọk me lek ikọ Okumugwem otumube inan̄a me otu kè Ilaija.

17 Sọnja mgbọ iraraka, gwun̄ enerieen̄ ogwu nwakpa ogwukaan̄ uwu ya onenifiak orukan̄. Orukan̄ ya onyenye enenen, ire lek gwun̄ ya okwube. 18 Ogwu enenwaan̄ ya onenitumu inyi Ilaija ibe, “Ogwu ikwaan̄ Awaji, ìre keke ke orọ emi ikeyi? Ìre ònu inenikpọk mbum ijo inu n̄a, mè inisa me ikeya ikpan̄ gwun̄ n̄a?”

19 Ilaija obebe ọmọ, “Nyi emi gwun̄ ya.” Ibọbọkọ gwun̄ ya me ubọk ogwu enenwaan̄ ya, mè isa ije inene isi uwu agan̄ inyọn̄ ere îkiluk, mè iben imaan̄ me inyọn̄ mkpilaak kan̄, 20 mè itaan̄ ukpo igwen Okumugwem ibe, “Jei, Okumugwem Awaji n̄a, ìre owu môfat isa ùrioon̄ inikeme ogwu nwakpa yi ngọọkbe iluk si, mè irọ ibe ogwu gwun̄ ikwu?” 21 Inenilaak inyana me inyọn̄ nkwukwu gwun̄ ya mgbọ ita, mè itaan̄ ukpo igwen Okumugwem ibe, “Jei, Okumugwem Awaji n̄a, tele mè ugwem iyaka ikpọk inin̄ emen gwun̄ enerieen̄ yi!”

22 Okumugwem onọnọ ida kè Ilaija, mè iyaka ugwem initap me emen gwun̄ enerieen̄ ya, ikpọkpọk igat ugwem. 23 Ilaija oneniben gwun̄ ya, mè isa inan̄a me agwut agan̄ inyọn̄ isibi inu me emen uwu, mè isa inikana inyi ogwu uga, mè ibe, “Kpọ, gwun̄ kwun̄ me ògat ugwem!”

24 Ogwu enenwaan̄ ya obebe Ilaija, “Mgbọ keyi ke nriọọn̄ ibe ke owu ìre ogwu ikwaan̄ Awaji, ke ikọ Okumugwem okitumu inan̄a me otu kwun̄ ìre atikọ.”