Ebi otoko kè Ruben
5
Ruben ore adasi gwun̄ kè Ijeren. (Me atikọ, Ruben ore adasi gwun̄, ire, mgbọ îgọọkbe nwa ogwu ute ilaak, mè isa me ikeya ichaka inyọn̄ mkpilaak ogwu ute, enenisa ìrot kan̄ kubọk adasi gwun̄ ikana inyi bọn ebirieen̄ kè Josefu gwun̄ kè Ijeren. Eya orọ, kpege erieen̄ kan̄ me ikpa mfufuk owot iman kubọk adasi gwun̄, ike îgbebe. 2 Ubọk geelek Juda orebe si ogwu ònyenye lek ichit me etete ebi ngwan̄, melek si ogwu ogwu ubọọn̄ onan̄abe me owot iman kan̄ isibi, unen eyi irek adasi gwun̄ ìkare ọmọ lek, ìyaka inikana ire eyi kè Josefu.) 3 Bọn ebirieen̄ kè Ruben adasi gwun̄ kè Ijeren ìre:Anọk, mè Palu, mè Ejirọn, mè Kami.
4 Ebi owot iman kè Juwen:
Semaya gwun̄ kè Juwen, mè Gọgu gwun̄ kè Semaya,
mè Reyaya gwun̄ kè Maika, mè Baali gwun̄ kè Reyaya,
6 mè Beyera gwun̄ kè Baali. Beyera ìre ogwu ibot mkpulu ge me otoko kè Ruben. Ọmọ ke Tigilat-Pilesa ogwu ubọọn̄ Asiria otet me usun̄ akọn̄ isa ifo Asiria.
7 Ebi ngwan̄ kiban̄, ebi egebe erieen̄ kiban̄ me owot iman me owot iman ìre:
Jeyien, ogwu ibot, mè Jekaraya, 8 mè Bela gwun̄ kè Ajaji, gwun̄ kè Sema, gwun̄ kè Juwen. Ebi owot iman keyi eluk me oke ijọn̄ òbene me Aroweri isi ire Nebo mè Baali-Meyon. 9 Me agan̄ mbum-ura, ema eluk me inyọn̄ ijọn̄ ya isi ire otubọk èwê eyi ònyana isi ire okwaan̄ Yuferetis, mije, mgbọ ema elukbe me Giliadi, anam kiban̄ îmumana iwa enenen.
10 Me ukot mkpulu kè Sọọlu, ebi owot iman kè Ruben mîtim akọn̄ me lek ebi Aga, mè itim ikpan̄ ema, mè ibọkọ ijọn̄ kiban̄, mè ikana inin̄ uwu kiban̄ iluk mege ichit otutuuk inyọn̄ ijọn̄ agan̄ mbum-ura ido Giliadi.
Ebi otoko kè Gadi
11 Ebi owot iman kè Gadi eluk ibene me otubọk ijọn̄ ebi otoko kè Simiọn me Basan isi ire Saleka.
12 Me otoko kè Gadi me Basan, Juwen ore ogwu ibot, Safam ore òso iba, sabum Janai mè Safat enigọọk.
13 Ebi ngwan̄ kiban̄, me owot iman me owot iman, ìre:
Maiken, mè Mesulam, mè Sieba, mè Jorai, mè Jakan, mè Jiya, mè Eberi, ema otutuuk ìre owot iman jaaba.
14 Bọn ebirieen̄ kè Abiyali gwun̄ kè Uru, gwun̄ kè Jarowa, gwun̄ kè Giliadi, gwun̄ kè Maiken, gwun̄ kè Jesisai, gwun̄ kè Jado, gwun̄ kè Buju.
15 Ayi gwun̄ kè Abidien, gwun̄ kè Guni, ore ogwu ibot owot iman kiban̄.
16 Ebi otoko kè Gadi eluk me agan̄ Giliadi mè Basan, mè iluk me otutuuk asabọn ama òkukup ikana, mè iluk me otutuuk ijọn̄ urie anam me Sarọn, mè iraka isi igwook.
17 Ege erieen̄ ife chi itap me ikpa mfufuk owot iman me ukot mkpulu kè Jotam ogwu ubọọn̄ Juda mè Jerobuwam ogwu ubọọn̄ Ijeren.
18 Ebi otoko kè Ruben, mè ebi otoko kè Gadi, mè ìkike iba ebi otoko kè Manasi, ema akọp obop ebi akọn̄ ini mè obop ini, mè efit jaaba mè akọp gweregwen, ebirieen̄ ìnyenye lek, ekpukpobe me akọn̄, ebi ìkiben agbọ mè oge akọn̄, mè ikisook oraan̄, ebi ìriọọn̄ ukot akọn̄, 19 enenijibi akọn̄ isibi isi itim me lek ebi Aga, mè ebi Jetu, mè ebi Nafis, mè ebi Nodabu. 20 Me emen akọn̄ ya, ema mîtoon̄ ejit me lek Awaji, mè ito ito igwen ọmọ, inọnọ, mè itap ubọk inyi ema, mè ikana ebi Aga mè otutuuk ebi melek ebi Aga cha itap ema me ubọk, ema etitim ikpan̄ ife cha. 21 Ema ekpukpulu owuwa anam ebi Aga, akọp obop aligọ go, mè efit obop arọọn̄ iba mè akọp obop go, mè efit obop inyinya akpan iba. Ema mîkpulu si efit obop ene me usun̄ akọn̄. 22 Ebi ife cha mîkwaan̄ iwa enenen, mije, akọn̄ ya ìnan̄a me ubọk Awaji. Ema enenibọkọ ijọn̄ ya iluk mege ire mgbọ ekpulube ema me usun̄ akọn̄.
Ìkike iba otoko kè Manasi
23 Ìkike iba otoko kè Manasi mîwa enenen. Ema eluk me ijọn̄ ya ibene me Basan isi igwook me Baali Emọn, mè Seniri, mè ogoon̄ Emọn.
24 Ebi ibot owot iman kiban̄ ìre: Eferi, mè Isiyi, mè Elien, mè Ajirien, mè Jerimaya, mè Odabia, mè Jadien. Ema ìre ebi usọ akọn̄, ebi eriọọn̄be erieen̄, mè ire si ebi ibot me owot iman kiban̄. 25 Ire, ebi otoko kè Ruben, mè ebi otoko kè Gadi, mè ebi ìkike iba otoko kè Manasi kpegban̄ utọn̄ inyi Awaji ebi nte nte kiban̄. Kpan̄asi ikeya, eyaka isi ikitọbọ ebum inyi ofifi awaji echi ebi ido ìluk me inyọn̄ ijọn̄ ya, ife Awaji ojijakabe isan̄a inyi ema. 26 Awaji ebi Ijeren oneniria Pulu ogwu ubọọn̄ Asiria (ogwu egwenbe si Tigilat-Pilesa ogwu ubọọn̄ Asiria), isisi itim akọn̄ ikpan̄ ema, mè ikpulu ebi otoko kè Ruben, mè ebi otoko kè Gadi, mè ebi ìkike iba otoko kè Manasi me usun̄ akọn̄ isa ifo isi igwook me ido Asiria, me ama Ala, mè Aboru, mè Yara, mè agba okwaan̄ Gojan, ere ema elukbe mege inire chereyi.