3 Eya orọ, otutuuk ebi ugane Ijeren enunu me lek ogwu ubọọn̄ Debit me Eburọn, Debit onenikaan̄ mgbaan̄-nchieek melek kiban̄ me isi Okumugwem me Eburọn. Ema enenirọ Debit ubọọn̄ otutuuk Ijeren, igọọk me lek use Okumugwem ochieekbe inan̄a me otu kè Samien.

4 Debit mè otutuuk ebi Ijeren enanan̄a me ere ya igbaan̄ ije isi Jeruselem (eyi òrere Jebus). Ebi Jebus ebi ìkiluk me ere ya òwa si me ere ya mgbọ ya. 5 Ebi Jebus cha enenitumu inyi Debit ibe, “Owu òkponin̄ ama keyi.” Ire, Debit otitim akọn̄ ibọkọ ama mgban Sayọn ya. Enenikigwen ama ya Ama kè Debit.

6 Sabum mgbọ ya, Debit îwuuk lek ichieek use ibe, “Ikaan̄ ogwu òdadasi ijibi akọn̄ inin̄ lek ebi Jebus, ene ya obokana ogwu ibot otutuuk ebi akọn̄.” Jowabu, ogwu ogwu uga orebe Seruya onenidasi ijibi akọn̄ isi itim me lek ebi Jebus, mè inikana ogwu ibot otutuuk ebi akọn̄.

7 Debit oninin̄ emen ama mgban akọn̄ ya iluk, enenisa me ikeya ikigwen ama ya Ama kè Debit. 8 Debit onenikpọk ama ya inama, ibene me ere etọmbe ijọn̄ me agan̄ mbum-ura lek ogoon̄ ya, mè inama ikat ikana, Jowabu okekikpọ chieen̄ me lek ikwaan̄ inanama otutuuk ere geelek òsisik me lek ama ya. 9 Debit onenikimin, mè ikinye lek, mije, Okumugwem Ogwukaan̄ Inyọn̄ mè Ijọn̄ òwa melek kan̄.

10 Îkaan̄ ebi ibot ebi usọ akọn̄ ebi Debit okaan̄be, ebi ìkekeke inye melek kan̄ me mkpulu kan̄, ema melek otutuuk ebi Ijeren egbaan̄ irọ ọmọ ogwu ubọọn̄ otutuuk Ijeren, ike Okumugwem ochieekbe use. 11 Erieen̄ ebi ibot ebi usọ akọn̄ kè Debit cha ìre ikeyi:

Jasobeyam ogwu owot iman kè Akimoni, ogwu ibot Ikpele Ebi Usọ Akọn̄ Ita ìkup ọkpọkpọ.^a Ọmọ osa otunwa kan̄ itim akọn̄ me lek efit ebi akọn̄ ita, mè ikpan̄ ema isan̄a me efe edim ge.

12 Ogwu ògọgọọk ọmọ ìre Elieja gwun̄ kè Dodo ogwu Ayoyi, ene ge me lek Ikpele Ebi Usọ Akọn̄ Ita cha ìkup ọkpọkpọ. 13 Ọmọ melek Debit ekup me Pas Damim mgbọ ebi Filisia ejibibe akọn̄ inu me ere ya, me emen uko ge akpa balì ojotbe. Otutuuk ebi akọn̄ Ijeren elilim inan̄a me isi ebi Filisia. 14 Ire, ọmọ mè ebi melek kan̄ ekekeke inye me eden̄ uko ya, mè itim akọn̄ inyan̄a ijọn̄ ya isibi, mè ikpan̄ ebi Filisia igwook. Okumugwem onyinyi ebi Ijeren ikpele ntim-mkpan̄.

15 Usen ge, ene ita me etete Akọp Ebi Usọ Akọn̄ Ita kè Debit cha enunu me lek kè Debit me inyọn̄ ewuuk ge òkup me agba lek ǹkororok me Adulam. Me ike mgbọ ya, ebi Filisia mîrieen̄ akọn̄ me iteke Refayim. 16 Mgbọ ya, Debit ìkup me emen okwukwek akọn̄, ebi akọn̄ Filisia ekukup me Beteleyem. 17 Ulọk ama onenimin enenen me emen kè Debit, inenikinina lek ibe, “Jei, mudim ònan̄a me udọn̄ mun̄ òkup me agba lek otunchit ama Beteleyem ke manwọ mgbọ keyi isiki ebek!” 18 Ikpele Ebi Usọ Akọn̄ Ita cha esisi ibum itibi orieen̄ akọn̄ ebi Filisia ya, mè iraka isi ichibi mudim me udọn̄ mun̄ òkup me agba lek otunchit ama Beteleyem, mè iben isa ika ijet Debit. Ire, Debit ìkachieek inwọnwọ. Kpan̄asi ikeya, ibeben igwook me ijọn̄ inyi Okumugwem, kubọk ngwugwa miin̄ egwogwook, 19 mè itumu ibe, “Awaji n̄a gwak fiin̄! Kachieek ibe emi ǹrọ ojelek inu òkup ikeya! Emi m̀kpakọt inwọ mbet lek mudim keyi! Eyi ìre eje ebi ife chi ebi ìchechieek mkpa isi ichibi mudim yi!” Me atikọ, ife cha echechieek mkpa isi ichibi mun̄ ya isa inu. Eya orọ, Debit ìkachieek inwọnwọ mudim ya.

Uyeke uyeke inu òkup ikechi ke Ikpele Ebi Usọ Akọn̄ Ita chi ekirọ.

20 Abisai ngwan̄ kè Jowabu ore ogwu ibot me etete Ikpele Ebi Usọ Akọn̄ Ita cha. Ọmọ osa otunwa kan̄ itim akọn̄ me lek efit ebi akọn̄ ita, mè ikpan̄ ema isan̄a, mè isa me ikeya ikaan̄ erieen̄ òtataan̄ etip kubọk Ikpele Ebi Usọ Akọn̄ Ita cha. 21 Ọmọ ke enyi umin igak otutuuk Ikpele Ebi Usọ Akọn̄ Ita cha. Inenikana ogwu ibot inyi ema. Ire, ìkakup me otu ifuk Ikpele Ebi Usọ Akọn̄ Ita cha.

22 Benaya gwun̄ kè Jeyoyada, ogwu Kabijen, ìre ikpele ogwu usọ akọn̄, ogwu òrọrọ owuwa inu òtataan̄ etip me isi akọn̄. Îre ọmọ okpan̄ ebi akọn̄ Mowabu iba eriọọn̄be erieen̄. Ofifi si, usen ge ibot awo okirep, igọgọọk egbe àtat ge inin̄ emen udọn̄, mè ikpan̄ egbe àtat ya. 23 Ofifi kan̄, îkpan̄ ogwu Ijipiti ge òjọjọn̄ọ iso ejit ge mè agbagba otubọk iba. Ogwu Ijipiti ya îkaan̄ otunwa eyi ukut kan̄ ominbe ikup kubọk uti ilọk-ekwut me ubọk. Ire, Benaya okakaan̄ m̀gbele gaalek me ubọk isa ije inin̄ ọmọ lek, mè itet otunwa kan̄ ya ibọkọ, mè isa ikpan̄ ọmọ. 24 Îre inu òsibi esese òkup ikechi ke Benaya gwun̄ kè Jeyoyada orọ me ugwem kan̄, mè inikana ogwu òkitaan̄ etip kubọk Ikpele Ebi Usọ Akọn̄ Ita cha. 25 Sa me ikeya, ikakaan̄ umin enenen igak otutuuk Akọp Ebi Usọ Akọn̄ Ita cha. Ire, kpefuk ọmọ itap me otu ifuk Ikpele Ebi Usọ Akọn̄ Ita cha. Debit onenisa ọmọ ito me ibot ebi akọn̄ ìkibem ọmọ.