2 “Me ukot òraraka, mgbọ Sọọlu orebe ogwu ubọọn̄ kiji otutuuk, îre owu okisa ebi Ijeren isibi isi itim akọn̄, mè ikije me isi akọn̄ inyi eji. Mgbọ ya si, Okumugwem îtumu inyi owu ibe, ‘Îre owu obokikpukpo ebi n̄a, ebi Ijeren, owu si obokana ogwu mkpulu kiban̄.’ ”

3 Otutuuk ebi ugane Ijeren enunu me lek ogwu ubọọn̄ Debit me Eburọn, ogwu ubọọn̄ onenigọọk ema ikaan̄ mgbaan̄-nchieek me Eburọn me isi Okumugwem, ema enenitọkọ Debit aran̄ me ibot isa irọ ọmọ ogwu ubọọn̄ ebi Ijeren.

4 Debit ìre akọp acha ita mgbọ erọbe ọmọ ubọọn̄, ikpukpulu me irek ubọọn̄ ya akọp acha ini. 5 Debit ìkup me Eburọn ikpulu otoko kè Juda acha jaaba mè onyan̄ gweregwen, mè inikup me Jeruselem ikpulu otutuuk Ijeren melek otoko kè Juda akọp acha ita mè ita.

6 Debit mè ebi akọn̄ kan̄ enenisi Jeruselem ibesi itim akọn̄ me lek ebi Jebus ìluluk me inyọn̄ ijọn̄ ya. Ebi ife cha ekekitumu inyi Debit ibe, “Owu òkpokọt inin̄ ere keyi. Ebi ǹnàan̄ mè ebi akọọk gaalek eberieen̄ owu igwu ikom.” 7 Ire, Debit obọbọkọ ama mgban akọn̄ Sayọn, òrere ama ile kè Debit.

8 Me usen ya, Debit ìtumu inyi ebi kan̄ ibe, “Otutuuk ebi ìbesi itim akọn̄ me lek ebi Jebus mêje itibi me emen udọn̄ mun̄ kiban̄ ya, mè isi ijijaka ebi akọọk cha mè ebi ǹnàan̄ cha ebi Debit ochabe.” Îre mije keyi ke ekitumu ibe, “Kpunu ogwu ǹnàan̄ mè ogwu akọọk obonin̄ Uwu Mbuban Okumugwem.”

9 Debit onenisi iluk me emen ama mgban akọn̄ ya, mè inyi ama ya erieen̄, Ama ile kè Debit, mè ininama ofifi mgban akọn̄ ikana ama ya. Ìbene me agba lek uwu-oket, agan̄ etọmbe ijọn̄ ibene me agan̄ mbum-ura orioon̄ ya, mè inama ikeya ifo agan̄ emen ama ya. 10 Debit okpọkpọ ikinye lek ifo isi, mije, Okumugwem Awaji Ogwu Òkaan̄ Unye Geelek okekebe inyi ọmọ.

11 Iram, ogwu ubọọn̄ Taya, oneniria osat inu me lek kè Debit, mè iria si owuwa uti olik, mè ebi usọ ikwaan̄ uti melek ebi usọ ikwaan̄ ewuuk igbaalek. Ife cha eneninama uwu ubọọn̄ inyi Debit. 12 Debit oneniriọọn̄ ibe ke Okumugwem îrọ ọmọ ubọọn̄ òbokikpulu Ijeren, mè irọ inyi mkpulu kan̄ inye, mè itaan̄ etip, mije ebi kan̄ Ijeren.

13 Mgbọ Debit otelebe Eburọn, mè inu iniluk me Jeruselem, inenititen̄e owuwa ofifi ugan mè nwa me Jeruselem. Ebibaan̄ chi enenimaan̄ ofifi owuwa bọn ebirieen̄ mè bọn ebibaan̄ inyi ọmọ. 14 Erieen̄ bọn ebi emaan̄be inyi Debit me Jeruselem ìre Samuwa, mè Sobabu, mè Netan, mè Solomọn, 15 mè Ibari, mè Elisuwa, mè Nefegi, mè Jafiya, 16 mè Elisama, mè Eliada mè Elifelet.

17 Mgbọ ebi Filisia enọbe ibe ke mîtọkọ Debit aran̄ me ibot isa irọ ubọọn̄ ebi Ijeren, ema ejijibi akọn̄ igbuku isibi inu ibenitet Debit. Ire, Debit onọnọ, mè inan̄a ifo ama mgban akọn̄ ya. 18 Ebi Filisia enenititiin̄ me iteke Refayim, mè ikpọk iwele ichit ere ya. 19 Debit onenido Okumugwem ibe, “Ìre ǹsi ǹtim akọn̄ me lek ebi Filisia, sà ìre nkasi? Ìre owu môyaka ema itap emi me ubọk?”

Okumugwem ofọfọọk ibe, “Si, ke m̀kpalọlọ iyayaka ebi Filisia cha itap owu me ubọk.”

20 Debit ojijibi akọn̄ isi ichichini ebi Filisia me Baali-Perajim, mè itim ikpan̄ ema me ere ya, mè itumu ibe, “Ike mun̄ okibum itibi igwook ichit ere, ikeya ke Okumugwem obum itibi igwook ichit ebi ochicha n̄a me isi n̄a.” Mije keya ke egwen ere ya Baali-Perajim.^a 21 Ebi Filisia elilim itele mkpọmfaka kiban̄ me ere ya. Debit mè ebi kan̄ esisi ikpulu mkpọmfaka cha isa ifo.

22 Ebi Filisia ekpọkpọk ijibi akọn̄ isibi inu me iteke Refayim, mè ikpọk iwele ichit ere ya. 23 Debit ododo ida Okumugwem. Okumugwem ofọfọọk ibe, “Kasibi ìsi isi mè isi. Je kana me agan̄ udun̄ kiban̄, mè jibi akọn̄ ya nin̄ ema lek me usaba agan̄ ere uti balisam okekebe cha. 24 Enyi isinọ ida ukot ebi akọn̄ ekije me ebek uti balisam cha, ìjibi akọn̄ ìnin̄ mgbọ yaage, mije, eya ìkijeen̄ ibe ke Okumugwem îra isibi inu inije me isi kinyi, ikinin̄ me emen orieen̄ akọn̄ ebi Filisia isisi itim akọn̄ me lek ebi Filisia.” 25 Debit orọrọ ubọk Okumugwem otumube, mè ililaba ebi Filisia, mè ikpan̄ ema mege inan̄a me Geba isi igwook me Gejeri.