Debit îtim akọn̄ ibọkọ ama Raba
20
Me mgbọ aya otu ibot, mgbọ ebi ubọọn̄ ekisibi isi akọn̄, Jowabu osasa ebi akọn̄ Ijeren isibi isi akọn̄, mè itim akọn̄ ijijaka inyọn̄ ijọn̄ ebi Amọn, mè isa akọn̄ isi Raba, ama ibot ebi Amọn, mè ijijaka ama ya igwook. Ire, Debit obabia me Jeruselem. 2 Debit osasan̄a okpibot ubọọn̄ me ibot ogwu ubọọn̄ kiban̄.a Esa akọp kilo alata araran̄ ita mè go irom okpibot ubọọn̄ ya, mè isa owuwa ewuuk unye otu ewe inwunwan̄ me lek. Eneniben okpibot ya ikwuun̄ Debit me ibot. Debit îkpulu si owuwa inu efumbe me akọn̄ me ama ya isa igbaalek ika. 3 Debit okpukpulu ebi ama ya otutuuk isa inigwook me ido kan̄, inyi ema ekesi unye ikwaan̄ ojijọọk, mè orọk okwukwut, mè otuban. Ikeya si ke îrọ me otutuuk ama ile ebi Amọn geelek îbọkọbe. Debit melek otutuuk ebi akọn̄ Ijeren enenigwu ikom ika inu Jeruselem.Ebi Ijeren mîtim owuwa akọn̄ me lek ebi Filisia
4 Ike mgbọ okije, akọn̄ onenisibi inyi ebi Filisia melek ebi Ijeren me Gejeri. Me emen akọn̄ keyi, Sibekai ogwu Usa okpakpan̄ Safu, ene ge me lek ebi owot iman ebi Rafa. Ebi Filisia enenikana usun̄ inyi ebi Ijeren.
5 Me emen ofifi akọn̄ ebi Ijeren etimbe me lek ebi Filisia, îre Eliyanan gwun̄ kè Jairi okpan̄ Lami ngwan̄ kè Golayat ogwu Gat, ogwu ukot otunwa kan̄ ominbe ikup kubọk uti ilọk-ekwut.
6 Me ofifi akọn̄ etimbe me Gat, îkaan̄ ene ge òmimin, mè ijọn̄ọ itet inyọn̄, mè ikaan̄ otubọk gweregwen gweregwen me ubọk agan̄ ge, mè ikaan̄ si otukot gweregwen gweregwen me ukot agan̄ ge. Otutuuk otubọk kan̄ mè otukot kan̄ onenisibi akọp iba mè ini. Ọmọ si ìre ogwu owot iman kè Rafa. 7 Mgbọ ene yi okigigam ebi Ijeren, Jonatan gwun̄ kè Simeya ngwan̄ kè Debit, okpakpan̄ ọmọ ifiin̄.
8 Ebi ife chi ìre ebi owot iman kè Rafa me Gat. Debit mè ebi akọn̄ kan̄ ekpakpan̄ ema isan̄a.