Debit îfuk otu ifuk ebi akọn̄ Ijeren
21
Setan onenije ikeme ebi Ijeren, mè inirọ inyi Debit ifuk otu ifuk ebi Ijeren. 2 Debit onenitumu inyi Jowabu mè ebi ibot akọn̄ ibe, “Ìsi ìfuk otutuuk ebi Ijeren ibene me Bieseba isi ire Dan, mè ìsa ìnikpa ìnyi emi, inyi ǹriọọn̄ otu ifuk kiban̄.”3 Ire, Jowabu ofọfọọk ibe, “Kè Okumugwem imumana otu ifuk ebi kan̄, ebi Ijeren, efit mgbọ! Ogwu ubọọn̄, ogwukaan̄ n̄a, ìre otutuuk ife chi kpefat ire ebi ikwaan̄ inyi owu? Keke orọ owu oweekbe irọrọ inu yi? Ìre òkafat ìriọọn̄ ibe ke inu yi môsa awọ itet ebi Ijeren?”
4 Ubọk geelek si, ikọ ogwu ubọọn̄ okeke inye. Jowabu onanan̄a isibi, mè isi ijijen̄e ikana otutuuk ido Ijeren, mè igwu ikom ika inu Jeruselem, 5 mè inisa otu ifuk ebi akọn̄ îfukbe inikpa inyi Debit. Me otutuuk Ijeren, otu ifuk ebi ìbekọt iben oge akọn̄ ìre efie ebirieen̄ mè efit obop. Me Juda, otu ifuk ebi ìkup ikecha ìre efit obop ini mè akọp obop jaaba.
6 Ire, Jowabu ìkafuk ebi otoko kè Libai mè ebi otoko kè Benjamin ìgbaalek, mije ida ya ogwu ubọọn̄ onyibe ìkatat me lek kan̄. 7 Ida ya ogwu ubọọn̄ onyibe ofefieek si me isi Awaji. Eya orọ, Awaji osusulu ebi Ijeren osusut.
8 Debit onenitumu inyi Awaji ibe, “Emi nrọ owu ilọ enenen mije inu yi nrọbe. Soso ben nrọ-nlọ yi san̄a emi ogwu ikwaan̄ kwun̄ me ibot. Me atikọ, inu yi nrọbe ìre ikpele burubut inu.”
9 Okumugwem onenitumu inyi Gadi, ogwu òkiben nriran inyi Debit, ibe, 10 “Si tumu nyi Debit ibe ke Okumugwem ìbe ikeyi: ‘Inu ita ke mbanyi owu. Kpọ ge gobo. Geelek ogobobe, eya ke mbarọ owu.’ ”
11 Gadi onenije isi lek kè Debit, mè itumu inyi ibe, “Okumugwem ìtumu ibe ikeyi: ‘Kpọ ge me etete inu chi gobo: 12 akan̄ ininin̄ ido kwun̄ acha ita; mè ebi ochicha kwun̄ irerieen̄ owu isibi, mè ikisa oge akọn̄ kiban̄ ililaba owu ikana ere onyan̄ ita; mè oge akọn̄ Okumugwem ininin̄ me inyọn̄ ijọn̄ kwun̄ usen ita, òrere ijo orukan̄ igwogwook ichit lek ebi ido kwun̄. Ogwu osat Okumugwem obokisa ijo orukan̄ ya ijijaka ene me otutuuk ijọn̄ ido Ijeren.’ Mgbọ keyi fọọk, inyi ǹriọọn̄ inu mâsabe isi ilook ogwu òraria emi.”
13 Debit onenisa me uga ufieejit itumu inyi Gadi ibe, “Inu yi îyọt emi me lek enenen. Tele mè ǹrọn̄ ǹnin̄ me ubọk Okumugwem, mije, ejit nsan kan̄ îmin enenen. Kachieek ibe emi ǹrọn̄ ǹnin̄ me ubọk ebilene.”
14 Okumugwem oraria ijo orukan̄ itap me Ijeren. Akọp obop ene jaaba ekwakwaan̄ me Ijeren. 15 Awaji oraria ogwu osat kan̄ ibe isi ijijaka Jeruselem. Ire, mgbọ Okumugwem omun̄be ike ogwu osat ya okijijaka ama ya, ifefieek ọmọ me lek, itutumu inyi ogwu osat òkikpan̄ ene me ama ya ibe, “Îkem! Tet ubọk kaan̄!” Me ike mgbọ ya, ogwu osat Okumugwem ìkeke me ere igen̄ akpa kè Arawunaa ogwu Jebus.
16 Debit onenibene chieen̄, mè imun̄ ogwu osat Okumugwem ya okekebe me lek efet me etete inyọn̄ mè ijọn̄, melek oge akọn̄ îwọọkbe ikaan̄ me ubọk, mè inyana ida Jeruselem. Debit mè ebi ugane ido, egegele igwook me ijọn̄, melek ofọnti ufieejit me lek, mè ikana isi ichit.
17 Debit otutumu inyi Awaji ibe, “Ìre ìkafat ìre emi nnyi ida ibe efuk ebi ìkitim akọn̄? Îre emi nrọ ijo inu, mè irọ inu ikatatge. Ife chi ìre arọọn̄ ikike! Ìre keke ke ema erọ ni? Jei Okumugwem, sulu emi osusut, mè sulu si ebi uwu nte n̄a gaalek. Katele ibe ijo orukan̄ yi ijijaka ebi kwun̄, soso!”
18 Ogwu osat Okumugwem onenitumu inyi Gadi ibe isi itumu inyi Debit ibe ije isi inama ntook ngwugwa inyi Okumugwem me ere igen̄ akpa kè Arawuna ogwu Jebus. 19 Debit ogbagban̄ utọn̄ me lek ikọ ya Gadi otumube inyi ọmọ me erieen̄ Okumugwem, mè inan̄a ije isi ere igen̄ akpa kè Arawuna.
20 Mgbọ Arawuna okigen̄ akpa wit kan̄, ikakana chieen̄, mè imun̄ ogwu osat Okumugwem ya. Bọn ebirieen̄ ini kan̄ ebi melek kan̄ ekupbe me ere ya elilim isi ilet. 21 Debit onenije igbet, Arawuna oraraan̄ chieen̄ mè imun̄ ọmọ, mè inan̄a me ere igen̄ akpa ya ije isi igele igwook me ijọn̄ me isi kè Debit, mè ikana isi ikwuun̄.
22 Debit onenitumu inyi ọmọ ibe, “Nyam ijọn̄ ere igen̄ akpa kwun̄ nyi emi, inyi ǹsa ǹnama ntook ngwugwa ǹnyi Okumugwem, inyi ijo orukan̄ yi ita ebi ene me lek. Nyam ijọn̄ yi nyi emi me òjot òjot otu ewe kan̄.”
23 Arawuna obebe Debit, “Ogwukaan̄ n̄a, ogwu ubọọn̄, mọnọ! Inu geelek òneneme owu irọrọ, rọ! Kpọ, nnyi owu orie eriembuuk chi si, inyi owu òsa ògwa ngwugwa ewọwọp iriọk, mè inyi owu uti ekisa igọ akpa cha, inyi owu môsabe irọ iye, mè inyi owu si akpa wit chi, inyi owu môsabe igwa ngwugwa akpa. Otutuuk inu chi ke nsa inyi owu.”
24 Ire, ogwu ubọọn̄ Debit ofọfọọk Arawuna ibe, “In̄-in̄, m̀balelep inu chi me ubọk kwun̄, mè ikpe ewe. Emi m̀kpabọkọ inu òrere eyi kwun̄ isa inyi Okumugwem, m̀kpagwagwa si ngwugwa ewọwọp iriọk eyi nkafiatge ikpoko geege me lek.”
25 Debit okpekpe efit ikpoko alata araran̄ gweregwen inyi Arawuna me ibot ijọn̄ ya. 26 Debit oneninama ntook inyi Okumugwem me ere ya, mè igwa ngwugwa ewọwọp iriọk mè ngwugwa esuuk me ere ya, mè iniriaak uriaak igwen Okumugwem. Okumugwem oraria ukan̄ inan̄a me inyọn̄ initaka ngwugwa cha me inyọn̄ ntook ya, mè isa me ikeya ifọọk ọmọ otu.
27 Okumugwem onyinyi ogwu osat ya ida, iyayaka oge akọn̄ kan̄ itap me emen ogan. 28 Mgbọ Debit omun̄be ibe ke Okumugwem îchieek uriaak kan̄ me ere igen̄ akpa kè Arawuna ogwu Jebus, ikekigwa ngwugwa me ere ya. 29 Me ike mgbọ ya, Akpatan̄ Mbuban Okumugwem eyi Mosis orọbe me emen èwê, melek ntook ngwugwa ewọwọp, ìkup me ere mbuban me Gibiọn. 30 Ire, Debit ìkakọt ìsi ere ya ìsi ìdo ida Awaji, mije, ìkifieek owot me lek oge akọn̄ ogwu osat Okumugwem ya.