2 Debit oneninyi ida ibe etitiin̄ otutuuk ebi ichen ìkiluk me Ijeren, mè inikpọ me etete kiban̄ igobo ebi ìkifieek ewuuk, inyi enefieek ewuuk mêsabe inama uwu Awaji. 3 Debit onyinyi okwukwut iwa enenen, inyi esa erọ omimin mêsabe igon afọn̄ itaak me otutuuk otunchit, mè esa erom si otutuuk mgba geelek ebesa isi ikwaan̄. Înyi si ekwe iwa enenen iraka ike ebekọt itọ. 4 Debit înyi si uti olik iwa iraka inu mêkọtbe ifuk, mije, uti olik ebi Sidọn mè ebi Taya esabe ijet ọmọ îwa enenen.

5 Debit onenitumu ibe, “Gwun̄ n̄a Solomọn ìre sọntiik gwun̄, ìkariọọn̄ inu geege. Ire, uwu ìbonama inyi Okumugwem ìbore uwu òkakaan̄ ikpele umin, mè ikitaan̄ etip, mè ijaan̄ uja me chieen̄ otutuuk ebi ido geelek. Eya orọ, mâbene ikinen̄e inu geelek isun̄ mgbọ keyi.” Debit onenisa ata mgbọ ineen̄ otutuuk inu ebesa inama uwu ya isun̄ me irek sabum înikwu.

6 Debit onenigwen Solomọn ogwu gwun̄, mè inyi ida ibe inama uwu inyi Okumugwem, Awaji ebi Ijeren. 7 Debit otutumu inyi Solomọn ibe: “Gwun̄ n̄a, kpọ, emi mben me ejit inanama uwu inyi Erieen̄ Okumugwem Awaji n̄a. 8 Ire, Okumugwem onenitumu inyi emi ibe: ‘Ubọk kwun̄ îfiin̄ eje iwa enenen, owu otim akọn̄ si iwa. Me chieen̄ n̄a, ubọk kwun̄ îfiin̄ eje iwa enenen me ijọn̄ yi. Eya orọ, ìkare owu obonama uwu inyi Erieen̄ n̄a. 9 Ire, owu môkaan̄ gwun̄ enerieen̄ ge, ọmọ môre ogwu òkup me utelelek. Emi mârọ mè ebi ochicha kan̄ ekasisaak ọmọ, inyi ọmọ ikaan̄ utelelek me agan̄ geelek. Erieen̄ kan̄ ìbore Solomọn.^a Mânyi ebi Ijeren esuuk mè utelelek me ukot mkpulu kan̄. 10 Îre ọmọ oboninama uwu inyi Erieen̄ n̄a. Ọmọ mônire gwun̄ inyi emi, emi si mâre ute inyi ọmọ. Mârọ inyi mkpulu kan̄ me Ijeren ikeke inye isi ire mgbọ geelek.’

11 “Mgbọ yi, kè Okumugwem ikup melek kwun̄, gwun̄ n̄a, kè inu ije ijaan̄ me lek kwun̄, inyi owu mônama uwu inyi Okumugwem Awaji kwun̄, kubọk îtumube ibe ke owu mônama. 12 Kè Okumugwem inyi owu ujọn̄ọ ifuk-ibot, mè ngobo-ntet, mgbọ ọmọ isito owu me ibot mkpulu me Ijeren, inyi owu òkosun̄ Ikan Okumugwem Awaji kwun̄. 13 Ire osiki ibot ikisun̄ otutuuk orọmijọn̄ mè otutuuk ikan echi Okumugwem onyibe Mosis ibe otutuuk ebi Ijeren ekesun̄, mgbọ ya inu môkije ijaan̄ owu me lek. Gaalek, tet lek nye, mè kat ejit. Katet ukpook, mè kasisik si ejit.

14 “Ofolek inanama Uwu Mbuban Okumugwem, nra ikwukwulu enenen, mè ititiin̄ owuwa inu isun̄: alata araran̄ îraka efie kilo ita mè efit obop kilo ini, alata okuket îraka akọp efie kilo ita mè efie ini. Ekwe mè okwukwut, kpebekọt itọ. Ntitiin̄ si uti mè ewuuk òwawa enenen. Ire otutuuk kechi ìkaso, owu môkọt itap isọkọ. 15 Ndọmọ si owuwa ebi ikwaan̄ ubọk isun̄ iban ikwaan̄ uwu ya: ebi ìkifieek ewuuk, mè ebi ìkinama mgban, mè ebi usọ ikwaan̄ uti, mè ebi usọ ikwaan̄ ubọk òkup esese esese, 16 ebi ikwaan̄ alata araran̄, mè alata okuket, mè ekwe, mè okwukwut, ema mîwa iraka ifuk. Bene kirọ ikwaan̄ uwu ya mgbọ keyi. Kè Okumugwem ikup melek kwun̄.”

17 Debit oneninyi otutuuk ebi ibot mkpulu me Ijeren ida ibe etap ubọk enyi Solomọn gwun̄ kan̄, 18 mè initumu inyi ema ibe, “Ìkpọ, Okumugwem Awaji kinyi òwa melek kinyi. Înyi enyi utelelek me agan̄ geelek, mije, îkana otutuuk ebi ìluk me lek ijọn̄ yi itap emi me ubọk. Ijọn̄ yi îkana eyi Okumugwem, mè ikana si eyi kinyi ebi kan̄. 19 Mgbọ keyi, ìsa otutuuk ejit kinyi mè ekwukwu kinyi ìsi ikwaan̄ ìnyi Okumugwem Awaji kinyi, mè ìbene ìnama Uwu Mbuban Okumugwem Awaji, mè ìsa okop inyan̄a-ibot mè otutuuk nroon̄ ikwaan̄ Awaji òkup mbuban cha ìnitap me emen uwu ya eyi ebenama inyi Erieen̄ Okumugwem.”