Debit îdọmọ ikwaan̄ inyi ebi ngwugwa
24
Ọgbọn̄ bọn kè Erọn ìre ikeyi:Bọn kè Erọn ìre Nadabu, mè Abiyu, mè Elieja, mè Itama. 2 Ire, Nadabu mè Abiyu mîkwaan̄ inan̄a sabum nte kiban̄ onikwu, ema kpekaan̄ bọn sabum enikwaan̄. Eya orọ, Elieja mè Itama enenikana ebi ngwugwa. 3 Debit oneniche bọn kè Erọn itap me irek, mè idọmọ ikwaan̄ kiban̄ inyi ema. Jadọk ogwu owot iman kè Elieja, mè Ayimelek ogwu owot iman kè Itama etatap ubọk inyi Debit me lek idọdọmọ ikwaan̄ inyi bọn kè Erọn.
4 Mîweek imun̄ ibe ke ebi ìsibi isi mîwa me owot iman kè Elieja igak owot iman kè Itama, enenidọmọ ema itap me irek: Me owot iman kè Elieja, akọp mè ebi ibot ototun̄ ukan̄ gweregwen; me owot iman kè Itama, ebi ibot ototun̄ ukan̄ jeeta. 5 Eroroon̄ nriroon̄ isa idọmọ ema itap me irek ikwaan̄, kpekpọ ene isi, mije, ema agan̄ iba, ebi owot iman kè Elieja mè ebi owot iman kè Itama, mîkaan̄ ebi ibot ikwaan̄ Uwu Mbuban mè ebi ibot esese chieen̄ ikwaan̄ Awaji me etete kiban̄.
6 Semaya ogwu uti ikpa, gwun̄ kè Netanen ogwu otoko kè Libai, oge erieen̄ kiban̄ itap me ikpa me isi ogwu ubọọn̄ Debit melek ebi ikwaan̄ kan̄, mè Jadọk ogwu ngwugwa, mè Ayimelek gwun̄ kè Abiata, mè ebi ibot owot iman ebi ngwugwa, mè ebi ibot owot iman ebi otoko kè Libai. Isimọnọ ototun̄ ukan̄ ge me owot iman kè Itama, mîra imọnọ ototun̄ ukan̄ ibaa me owot iman kè Elieja.
7 Adasi nriroon̄ ìrọn̄ inyi Jioyaribu,
òso iba orọn̄ inyi Jedaya,
8 òso ita orọn̄ inyi Arim,
òso ini orọn̄ inyi Seyorim,
9 òso go orọn̄ inyi Malikija,
òso gweregwen orọn̄ inyi Mijamin,
10 òso jaaba orọn̄ inyi Akoji,
òso jeeta orọn̄ inyi Abija,
11 òso onaan̄ge orọn̄ inyi Jesuwa,
òso akọp orọn̄ inyi Sekanaya,
12 òso akọp mè ge orọn̄ inyi Eliasibu,
òso akọp mè iba orọn̄ inyi Jakim,
13 òso akọp mè ita orọn̄ inyi Upa,
òso akọp mè ini orọn̄ inyi Jesebeyabu,
14 òso akọp mè go orọn̄ inyi Biliga,
òso akọp mè gweregwen orọn̄ inyi Imeri,
15 òso akọp mè jaaba orọn̄ inyi Ejiri,
òso akọp mè jeeta orọn̄ inyi Apijeji,
16 òso akọp mè onaan̄ge orọn̄ inyi Petaya,
òso akọp iba orọn̄ inyi Jeyejiken,
17 òso akọp iba mè ge orọn̄ inyi Jakin,
òso akọp iba mè iba orọn̄ inyi Gamun,
18 òso akọp iba mè ita orọn̄ inyi Delaya,
òso akọp iba mè ini orọn̄ inyi Mayajiya.
19 Onineen̄ keyi ke ema ekigọọk mgbọ geelek ema ebeninin̄ emen Uwu Mbuban Okumugwem isi irọ ikwaan̄, igọọk me ike nte nte kiban̄ Erọn odọmọbe isun̄ inyi ema, ike Okumugwem, Awaji ebi Ijeren, onyibe Erọn ida.
Ebi otoko kè Libai kechilọ
20 Ikeyi ke edọmọ ebi otoko kè Libai kechilọ:
Me etete bọn kè Amiram, emọnọ Subayen;
me etete bọn kè Subayen, Jedeya.
21 Me etete bọn kè Reyabia:
Isiya ore ogwu ibot.
22 Me etete ebi owot iman kè Ijiyari, Selomot;
me etete bọn kè Selomot, Jayat.
23 Bọn ebirieen̄ kè Eburọn: Jeriya ore adasi, Amariya ore òso iba, Jayajien ore òso ita, Jekameyam ore òso ini.
24 Gwun̄ enerieen̄ kè Ujiyen: Maika;
me etete bọn kè Maika, Samiri.
25 Ngwan̄ kè Maika: Isiya;
me etete bọn kè Isiya, Jekaraya.
26 Bọn ebirieen̄ kè Merari: Mali mè Musi.
Gwun̄ kè Jayajia: Beno.
27 Bọn ebirieen̄ kè Merari:
me owot iman kè Jayajia: Beno, mè Soyam, mè Jakuru, mè Ibiri.
28 Me owot iman kè Mali: Elieja. Elieja ìkakaan̄ gwun̄ geege.
29 Me owot iman kè Kis, Jerameli.
30 Bọn ebirieen̄ kè Musi: Mali, mè Ederi, mè Jerimot.
Ebibi ere ebi otoko kè Libai, igọọk me owot iman kiban̄. 31 Eroroon̄ nriroon̄ isa idọmọ ema itap me irek ikwaan̄ kiban̄ kubọk ebi ngwan̄ kiban̄ ebi owot iman kè Erọn erọbe. Eroon̄ nriroon̄ ya me isi ogwu ubọọn̄ Debit, mè Jadọk, mè Ayimelek, mè ebi ibot owot iman ebi ngwugwa, mè ebi ibot owot iman ebi otoko kè Libai. Ike erọbe me owot iman ogwu òrere ugane ichit, ikeya si ke erọ me owot iman ogwu òrere ijija ichit.