2 Ogwu ubọọn̄ Debit onanan̄a ikeke ikeke me ukot me isi otutuuk ene, mè inibe ema, “Enyi ebi ngwan̄ n̄a mè ebi n̄a, ìgban̄ utọn̄. Emi mben me ejit inanama uwu ere isiki-efuuk isa inyi okop inyan̄a-ibot Okumugwem, mè inu ibene ukot isa inyi Awaji kiji, mè ibem lek inanama uwu ya. 3 Ire, Awaji onenitumu inyi emi ibe, ‘Ìkare owu obonama uwu inyi Erieen̄ n̄a, mije, owu ìre ene akọn̄, owu ofiat eje ene iwa enenen.’

4 “Ire, îre Okumugwem, Awaji ebi Ijeren ogobo emi me etete otutuuk ebi owot iman kè nte n̄a isa ito ubọọn̄ me otutuuk Ijeren isi ire mgbọ geelek. Ìdasi igobo Juda kubọk ogwu ibot, mè inigobo owot iman kè nte n̄a me otoko kè Juda. Inenineme ọmọ imọmọnọ emi, me etete bọn ebirieen̄ nte n̄a okaan̄be, isa ito ubọọn̄ me otutuuk Ijeren. 5 Okumugwem înyi emi nsabọn iwa. Me etete otutuuk nsabọn n̄a, Okumugwem onenigobo Solomọn gwun̄ n̄a ibe inikweek irek me inyọn̄ ogboon̄ ubọọn̄ eyi ijọn̄ ama ubọọn̄ Awaji, òrere ido Ijeren, ikikpulu. 6 Îtumu si inyi emi ibe, ‘Solomọn gwun̄ kwun̄ ore ogwu òbonama uwu n̄a, mè inama si oyet egep inyi emi, mije, ǹgogobo ọmọ ibe inire gwun̄ inyi emi, emi si mâre ute inyi ọmọ. 7 Mârọ inyi mkpulu kan̄ ikeke inye ire mgbọ ikakaan̄ge itata, ire ọmọ ikeke inye ikirọ ikọ ntọbe, mè ikisun̄ ikan n̄a, kubọk îkirọ cherekeyi.’

8 “Eya orọ, mgbọ keyi, emi ǹkeke me isi kinyi otutuuk ebi Ijeren, enyi ebi eyi Okumugwem, mè ikitumu inyi enyi ibe: Ìgbala chieen̄ ìkisun̄ otutuuk ikọ geelek Okumugwem Awaji kinyi otọbe, mè ìkirọ otutuuk ìso, inyi enyi mêbọkọ ata ijọn̄ yi me ìrot, mè ikana isa inyi bọn kinyi mege isi ire mgbọ geelek. Awaji înọ inu yi nkitumu inyi enyi.

9 “Owu Solomọn gwun̄ n̄a, riọọn̄ Awaji kè nte kwun̄, mè sa otutuuk ejit kwun̄ mè otutuuk ugwem kwun̄ si ikwaan̄ nyi ọmọ, me ikarege etetet owu me òbọp. Mije, Okumugwem ìkiwọwọlọ otutuuk emen ejit ene, mè ikiriọọn̄ si otutuuk nkeek geelek ene okaan̄be me ejit me emen inu geelek ene orọbe. Ire oweek ọmọ, owu môweek ọmọ imun̄. Ire, ire ojit ọmọ itele, ọmọ si môjit owu itele isi ire mgbọ geelek. 10 Mgbọ keyi, kpọ, Okumugwem îra igobo owu, ibe owu ònama uwu eyi òbore Uwu Mbuban. Tet lek nye, mè rọ ikwaan̄ yi.”

11 Debit onenikana ngwugwat uwu ya, ike egwookbe, itap me ubọk kè Solomọn ogwu gwun̄: irak oyet, mè otutuuk uwu cha geelek, mè uwu isun̄-inu geelek, mè agwut echi òkup me agan̄ inyọn̄, mè agwut òkup me agan̄ emen emen, mè Ere Òkup Mbuban Ichit, ere ekirọ esuuk. 12 Înyi Solomọn ngwugwat otutuuk inu cha echi Ekwukwu Awaji otapbe ọmọ me ejit ike ebesa inama oyet egep Uwu Mbuban Okumugwem, mè otutuuk agwut geelek òkukup ikana oyet egep ya, mè ere isun̄-inu Uwu Mbuban Awaji, mè ere ebekisun̄ inu geelek efakabe itap me ubọk Awaji.

13 Îteme si Solomọn nteme ofolek ike esabe idọmọ ebi ngwugwa mè ebi otoko kè Libai itap me irek ikwaan̄, mè otutuuk ikwaan̄ geelek ema ebekirọ me Uwu Mbuban Okumugwem, mè inyi si ọmọ nteme ofolek otutuuk nroon̄ ikwaan̄ geelek ebekisa isi ikwaan̄ me Uwu Mbuban Okumugwem.

14 Îjeen̄ si Solomọn ulobo alata araran̄ ebekitọ isa irom nroon̄ ikwaan̄ alata araran̄ geelek ebekisa isi chieen̄ ikwaan̄ geelek, mè ulobo alata okuket ebekitọ isa irom nroon̄ ikwaan̄ alata okuket geelek ebekisa isi chieen̄ ikwaan̄ geelek me Uwu Mbuban: 15 ulobo alata araran̄ eberoon̄ isa irom ngugọọn̄ alata araran̄ geelek mè otitọn̄ òje me lek, mè ulobo alata okuket eberoon̄ isa irom ngugọọn̄ alata okuket geelek mè otitọn̄ òje me lek, mè inyi si ulobo ngugọọn̄ cha geelek melek ulobo otitọn̄ echi òje me lek, ikpọ me lek ikwaan̄ ebekisa ngugọọn̄ cha geelek irọ; 16 mè ulobo alata araran̄ ebetọ isa irom ikasi fituru mbuban echi alata araran̄ geelek, mè ulobo alata okuket ebetọ isa irom ikasi fituru mbuban echi alata okuket geelek; 17 mè ulobo atalek alata araran̄ ebetọ isa irom ebi kè ochichim, mè ewop inyan eje, mè ekpen̄ òje me lek; mè ulobo alata araran̄ ebesa irom alala alata araran̄; mè ulobo alata okuket ebesa irom alala alata okuket; 18 mè ulobo atalek alata araran̄ ebesa irom ntook nsensi. Înyi si ọmọ ngwugwat ike egwookbe me ikpa ofolek ochichit okop inyan̄a-ibot, òrere ebi mbem emen inyọn̄ esabe alata araran̄ irom cha, ebi ìwewele uwop kiban̄ isa ikana ichit okop inyan̄a-ibot Okumugwem.

19 Debit onenitumu inyi Solomọn ibe, “Okumugwem ìjejeen̄ emi otutuuk inu chi geelek mgbọ unye kan̄ okanabe ichit emi, mè inyi emi ngobo-ntet òfo me lek sọkọsọkọ inu geelek eberọ me lek uwu ya, ngege itap me ikpa.”

20 Debit onenitumu inyi Solomọn ogwu gwun̄ ibe, “Tet lek nye, mè kat ejit, mè rọ ikwaan̄ uwu yi. Katet ukpook, mè kasisik si ejit, mije, Okumugwem Awaji, òrere Awaji n̄a, òwa melek kwun̄. Ìkposan̄a owu chieen̄ me lek, ìkpojijit si owu itele mege ire mgbọ owu môrọbe otutuuk ikwaan̄ Uwu Mbuban Okumugwem ya isan̄a. 21 Kpọ, ọgbọn̄ ebi ngwugwa mè ebi otoko kè Libai mîbem lek isisi otutuuk ikwaan̄ me Uwu Mbuban Okumugwem. Ebi chieen̄ ikwaan̄ ubọk geelek mîbem si lek itatap ubọk inyi owu. Ebi ibot mkpulu mè otutuuk ebi ene mêgban̄ utọn̄, mè isiki ibot irọ inu geelek onyibe ida ibe erọ.”