Debit îdọmọ ikwaan̄ inyi ebi ibot akọn̄
27
Erieen̄ ebi Ijeren, ebi ibot owot iman geelek, òrere ebi ibot akọn̄ ìkikpulu obop obop ene mè ebi ìkikpulu efit efit ene, mè ebi ibot kiban̄ ebi ìkisi ikwaan̄ inyi ogwu ubọọn̄ me lek inu geelek ògbaan̄ me lek urum ebi akọn̄ ebi ìkisi ikwaan̄ me onyan̄ me onyan̄ me acha geelek ire echi. Ọgbọn̄ kiban̄ geelek ìre akọp obop ene iba mè obop ini.2 Ogwu ibot adasi ọgbọn̄, me adasi onyan̄, ìre Jasobeyam gwun̄ kè Jabidien. Akọp obop ene iba mè obop ini ekup me ọgbọn̄ kan̄. 3 Jasobeyam yi ìre ogwu owot iman kè Pereji, mè ire si ogwu ibot me lek otutuuk ebi ibot akọn̄ me adasi onyan̄.
4 Ogwu ibot ọgbọn̄ eyi òkup me ikwaan̄ me òso onyan̄ iba ìre Dodai ogwu owot iman kè Ayoyi. Mikilot ore ogwu òkitap ubọk inyi ọmọ. Akọp obop ene iba mè obop ini ekup me ọgbọn̄ kan̄.
5 Ogwu ibot ọgbọn̄ ebi akọn̄ òso ita, eyi òkup me ikwaan̄ me òso onyan̄ ita ìre Benaya gwun̄ kè Jeyoyada ogwu ngwugwa. Ọmọ ore ogwu ibot me etete kiban̄. Akọp obop ene iba mè obop ini ekup me ọgbọn̄ kan̄. 6 Benaya keyi ore ogwu usọ akọn̄ ya òrọriọọn̄ ukot akọn̄ ichit me etete Akọp Ebi Usọ Akọn̄ Ita, mè inire si ibot me lek Akọp Ebi Usọ Akọn̄ Ita cha. Gwun̄ kan̄, Amijabadi, ore ogwu ibot me lek ebi ọgbọn̄ kan̄.
7 Ogwu ibot òso ọgbọn̄ ini eyi òkup inyi òso onyan̄ ini ìre Asayen ngwan̄ kè Jowabu. Jebadiya ogwu gwun̄ obọkọ irek kan̄. Akọp obop ene iba mè obop ini ekup me ọgbọn̄ kan̄.
8 Ogwu ibot òso ọgbọn̄ go eyi òkup inyi òso onyan̄ go ìre Samiyut ogwu owot iman kè Ijira. Akọp obop ene iba mè obop ini ekup me ọgbọn̄ kan̄.
9 Ogwu ibot òso ọgbọn̄ gweregwen eyi òkup inyi òso onyan̄ gweregwen ìre Ira gwun̄ kè Ikes ogwu Tekowa. Akọp obop ene iba mè obop ini ekup me ọgbọn̄ kan̄.
10 Ogwu ibot òso ọgbọn̄ jaaba eyi òkup inyi òso onyan̄ jaaba ìre Eles ogwu Pelon, ogwu otoko kè Iferem. Akọp obop ene iba mè obop ini ekup me ọgbọn̄ kan̄.
11 Ogwu ibot òso ọgbọn̄ jeeta eyi òkup inyi òso onyan̄ jeeta ìre Sibekai ogwu Usa, ogwu owot iman kè Jera. Akọp obop ene iba mè obop ini ekup me ọgbọn̄ kan̄.
12 Ogwu ibot òso ọgbọn̄ onaan̄ge eyi òkup inyi òso onyan̄ onaan̄ge ìre Abieja ogwu Anatọt, ogwu otoko kè Benjamin. Akọp obop ene iba mè obop ini ekup me ọgbọn̄ kan̄.
13 Ogwu ibot òso akọp ọgbọn̄ eyi òkup inyi òso akọp onyan̄ ìre Mayarai ogwu Netofa, ogwu owot iman kè Jera. Akọp obop ene iba mè obop ini ekup me ọgbọn̄ kan̄.
14 Ogwu ibot òso akọp mè ọgbọn̄ ge eyi òkup inyi òso akọp mè onyan̄ ge ìre Benaya ogwu Piraton, ònan̄a me otoko kè Iferem. Akọp obop ene iba mè obop ini ekup me ọgbọn̄ kan̄.
15 Ogwu ibot òso akọp mè ọgbọn̄ iba eyi òkup inyi òso akọp mè onyan̄ iba ìre Elidai ogwu Netofa, ogwu owot iman kè Otinien. Akọp obop ene iba mè obop ini ekup me ọgbọn̄ kan̄.
Ebi ibot ikwaan̄ me otoko me otoko
16 Ebi ibot otoko ebi Ijeren ìre:
otoko kè Ruben, Elieja gwun̄ kè Jikiri;
otoko kè Simiọn, Sefatiya gwun̄ kè Maaka;
17 otoko kè Libai, Asabiya gwun̄ kè Kemuwen;
otoko kè Erọn, Jadọk;
18 otoko kè Juda, Eliyu ngwan̄ kè Debit;
otoko kè Isaka, Omiri gwun̄ kè Maiken;
19 otoko kè Jebulọn, Isimaya gwun̄ kè Obidaya;
otoko kè Nafitali, Jerimot gwun̄ kè Ajirien;
20 otoko kè Iferem, Osiya gwun̄ kè Ajajiya;
ìkike iba otoko kè Manasi, Juwen gwun̄ kè Pedaya;
21 ìkike iba otoko kè Manasi òkup me Giliadi, Ido gwun̄ kè Jekaraya;
otoko kè Benjamin, Jayasien gwun̄ kè Abina;
22 otoko kè Dan, Ajaren gwun̄ kè Jeroyam.
Ebibi ere ebi ibot mkpulu me otutuuk otoko ebi Ijeren.
23 Ebirieen̄ ebi ìrere bene me akọp acha iba sibi ijọn̄, Debit ìkafuk ìgbaalek, mije, Okumugwem îwuuk lek ichieek use ibe ke ọmọ môrọ inyi Ijeren ewa me otu ifuk kubọk ntoronyan̄ akpabin inyọn̄. 24 Jowabu, ogwu ogwu uga orebe Seruya, onenibene ikifuk otu ifuk ene. Ire, ìkafufuk ìsan̄a, Awaji onanaan̄ ejit inyi ebi Ijeren mije ifuk ene ya. Mije keyi, kpege otu ifuk ene îfukbe ya itap me emen ikpa mfufuk ogwu ubọọn̄ Debit.
Ebi ìkikpọ chieen̄ me lek inu ogwu ubọọn̄ okaan̄be
25 Ajimabet gwun̄ kè Adien okikpọ chieen̄ me lek otutuuk uwu isun̄-inu ogwu ubọọn̄.
Jonatan gwun̄ kè Ujaya okikpọ chieen̄ me lek otutuuk uwu isun̄-inu òkup me otutuuk agan̄, mè echi òkup me otutuuk ama ile, mè asabọn ama, mè echi òkup me uwu-oket ere ibem ere.
26 Ejiri gwun̄ kè Kelup okikpọ chieen̄ me lek otutuuk ebi ìkiwop uko inyi ogwu ubọọn̄.
27 Simei ogwu Ramat okikpọ chieen̄ me lek otutuuk uko gerep, sà Jabidi ogwu Sifim okikpọ chieen̄ me lek inu geelek òsibi me uko gerep, mè ikisun̄ miin̄ erọbe.
28 Baali-Anan ogwu Gederi okikpọ chieen̄ me lek uti olifu mè uti sikamọ echi òkup me lek orioon̄ isi ogoon̄ me agan̄ ichep-ura, sà Jowas okikpọ chieen̄ me lek isusun̄ aran̄ olifu.
29 Sitirai ogwu Sarọn okikpọ chieen̄ me lek ebi kè eriembuuk ìkirie urie me òla ijọn̄ me Sarọn.
Sà Safat gwun̄ kè Adilai okikpọ chieen̄ me lek ebi kè eriembuuk ìkirie urie me otutuuk iteke òkup me agan̄ ya.
30 Obin ogwu owot iman kè Isimen okikpọ chieen̄ me lek ebi kè aligọ, sà Jedeya ogwu agan̄ Meronot okikpọ chieen̄ me lek ebi kè inyinya akpan.
31 Jajiji ogwu owot iman kè Aga okikpọ chieen̄ me lek ebi kè arọọn̄ mè ebot.
Ebibi otutuuk ere ebi ibot ikwaan̄ ìkikpọ chieen̄ me lek inu geelek ogwu ubọọn̄ Debit okaan̄be.
32 Jonatan ngwan̄ nte kè Debit ìre ene ge me lek ebi nteme, ọmọ ìre ogwu òriọọn̄ inu mè ikaan̄ nden̄, ọmọ si ìre ogwu uti ikpa. Jeyen gwun̄ kè Akimoni okikpọ chieen̄ me lek bọn ebirieen̄ ogwu ubọọn̄.
33 Ayitofen ore ogwu nteme inyi ogwu ubọọn̄.
Usai ogwu owot iman kè Arak ore unene ogwu ubọọn̄. 34 Mgbọ Ayitofen onan̄abe, Jeyoyada gwun̄ kè Benaya mè Abiata eneniyaka ibọkọ irek kan̄.
Jowabu ore ogwu ibot ebi akọn̄ ogwu ubọọn̄.