Ebi ìkibem otunchit
26
Ikeyi ke edọmọ ebi ìkibem otunchit:Me etete ebi owot iman kè Kora: Meselemaya gwun̄ kè Kore, ene ge me lek bọn ebirieen̄ kè Asafu.
2 Bọn ebirieen̄ kè Meselemaya:
Jekaraya ore ogwu adasi,
Jediyayen, ogwu òso iba,
Jebadiya, ogwu òso ita,
Jatinien, ogwu òso ini,
3 Elam, ogwu ore òso go,
Jeyoyanan, ogwu òso gweregwen,
sà Elieyowenai ore ogwu òso jaaba.
4 Bọn ebirieen̄ kè Obedi-Edọm:
Semaya ore ogwu adasi,
Jeyosabadi, ogwu òso iba,
Jowa, ogwu òso ita,
Sakari, ogwu òso ini,
Netanen, ogwu òso go,
5 Amien, ogwu òso gweregwen,
Isaka, ogwu òso jaaba,
sà Pewuletai ore ogwu òso jeeta.
(Awaji îgbana Obedi-Edọm.)
6 Semaya ogwu gwun̄ îkaan̄ si bọn ebirieen̄, ema enikana ebi ibot me owot iman nte kiban̄, mije, ema ìre ebi usọ akọn̄. 7 Bọn ebirieen̄ kè Semaya: Otini, mè Refen, mè Obedi, mè Elijabadi. Eliyu mè Semakia ebi ngwan̄ kan̄ mîkaan̄ si efuuk. 8 Ebibi otutuuk ìre ebi owot iman kè Obedi-Edọm, ema mè ebi bọn mè ebi ngwan̄ ìre ebirieen̄ ìkaan̄ efuuk isasa irọ unye ikwaan̄. Me owot iman kè Obedi-Edọm, ema ìre akọp ene gweregwen mè iba.
9 Bọn ebirieen̄ kè Meselemaya, igbaalek ebi ngwan̄ kan̄, ìre akọp mè ene jeeta ebi ìkakaan̄ efuuk.
10 Bọn ebirieen̄ kè Osa ogwu owot iman kè Merari: Simiri ore ogwu adasi (ogwu ute ìmọnọ ọmọ kubọk ogwu adasi, ubọk geelek ìkare ọmọ ke edasi iman), 11 Ilikiya ogwu òso iba, mè Tebalia ogwu òso ita, mè Jekaraya ogwu òso ini. Otutuuk bọn ebirieen̄ kè Osa, igbaalek ebi ngwan̄ kan̄, ìre akọp mè ene ita.
12 Ebibi ere ọgbọn̄ ebi ìkibem otunchit, ema melek ebi ibot kiban̄ ekisi ikwaan̄ me emen Uwu Mbuban Okumugwem kubọk ebi ngwan̄ kiban̄, ebi otoko kè Libai, esibe. 13 Ekiroon̄ nriroon̄ isa igobo ebi ìbesi ikwaan̄ me otunchit geelek, me uwu me uwu, mè ìre ebi ijija mè ìre ebi ilile.
14 Me otunchit agan̄ mbum-ura, nriroon̄ ìrọn̄ inyi Selemeya.a Eneniroon̄ nriroon̄ inyi Jekaraya gwun̄ kan̄, ata ogwu nteme òriọọn̄ inu, otunchit agan̄ inyọn̄ orọrọn̄ inyi. 15 Nriroon̄ eyi otunchit agan̄ osiki orọn̄ inyi Obedi-Edọm, sà nriroon̄ eyi uwu isun̄-inu onirọn̄ inyi bọn ebirieen̄ kan̄. 16 Nriroon̄ echi otunchit agan̄ osiki mè otunchit Saleket me oniin̄ agan̄ inyọn̄ orọn̄ inyi Supim mè Osa. 17 Ekito ebi otoko kè Libai gweregwen egwe ge me agan̄ mbum-ura, ene ini egwe ge me agan̄ inyọn̄, ene ini egwe ge me agan̄ osiki, ene iba mgbọ ge me uwu isun̄-inu. 18 Me oyet egep agan̄ ichep-ura, eto ene ini me lek oniin̄, mè ito si ene iba me emen oyet egep ya me lek kan̄.
19 Ebibi ere ebi ọgbọn̄ ikwaan̄ ìkibem otunchit, ìrere ebi owot iman kè Kora mè ebi owot iman kè Merari.
Ebi ibot ikwaan̄ uwu isun̄-inu mè ofifi ebi ibot ikwaan̄
20 Me lek ebi otoko kè Libai kechilọ, Ayija ore ogwu ibot ikwaan̄ ere isun̄-inu echi òkup me emen Uwu Mbuban Awaji, melek otutuuk ere ekisun̄ inu efakabe itap me ubọk Awaji.
21 Ladan ìre ene ge me lek bọn kè Gasiọn. Bọn owot iman kan̄, ebi ìrere ebi ibot ototun̄ ukan̄ kiban̄ me owot iman kè Gasiọn, ìre Jeyieli, 22 mè bọn kè Jeyieli, ìrere Jetam mè Juwen ogwu ngwan̄. Îre ema ekikpọ chieen̄ me lek uwu isun̄-inu geelek me Uwu Mbuban Okumugwem.
23 Me etete ebi owot iman kè Amiram, ebi owot iman kè Ijiyari, mè owot iman kè Eburọn, mè ebi owot iman kè Ujiyen:
24 Sebuyen ogwu owot iman kè Gesiọm gwun̄ kè Mosis, ore ogwu ibot ebi ìkikpọ chieen̄ me lek ere isun̄-inu geelek. 25 Ebi ngwan̄ kan̄, ìrere bọn owot iman kè Elieja: Reyabia gwun̄ kè Elieja, mè Jesaya gwun̄ kè Reyabia, mè Joram gwun̄ kè Jesaya, mè Jikiri gwun̄ kè Joram, mè Selomit gwun̄ kè Jikiri. 26 Selomit mè ebi ngwan̄ ekikpọ chieen̄ me lek otutuuk ere isun̄-inu ere ekisun̄ inu òkup mbuban echi ogwu ubọọn̄ Debit osan̄abe isun̄ esese inyi Awaji, melek echi òje me ubọk ebi ibot owot iman ebi ìkikpulu obop obop ebi ene, mè ebi ìkikpulu efit efit ebi ene, mè echi òje me ubọk ebi ibot akọn̄ geelek. 27 Usini inu ekpulube me akọn̄ isa ika, esusun̄ mbuban inyi isasa isi ikwaan̄ me lek Uwu Mbuban Okumugwem. 28 Selomit mè ebi ngwan̄ ekikpọ chieen̄ me lek otutuuk inu geelek Samien ogwu òmọọn̄ inu ofakabe itap me ubọk Awaji si, mè otutuuk inu geelek efakabe itap me ubọk Awaji echi òje me ubọk ogwu ubọọn̄ Sọọlu gwun̄ kè Kis, mè echi òje me ubọk kè Abina gwun̄ kè Neri, mè echi òje me ubọk kè Jowabu, ogwu ogwu uga orebe Seruya, mè otutuuk ofifi inu geelek esun̄be mbuban.
29 Me owot iman kè Ijiyari: Kenaniya mè ebi bọn ke kpenyi ikwaan̄ me emen Uwu Mbuban. Eto ema kubọk ebi ibot ikwaan̄ mè ebi ìkisibi oyerebet inyi ebi Ijeren.
30 Me etete ebi owot iman kè Eburọn: Asabiya melek ebi ngwan̄ ke eto me ido Ijeren agan̄ ichep-ura okwaan̄ Jodan, ibe ekekpọ chieen̄ me lek ikwaan̄ geelek ògbaan̄ me lek irariaak Okumugwem mè echi ògbaan̄ me lek mkpulu ogwu ubọọn̄. Ema ìre obop ene mè efit ene jaaba, ebi ìkaan̄ efuuk. 31 Me etete ebi owot iman kè Eburọn, Jeriya ore ogwu ibot, igọọk me mfufuk owot iman kiban̄ egebe me ikpa kiban̄ me uwu me uwu. Me òso akọp acha ini me lek mkpulu kè Debit, eneniwọlọ emen ikpa mfufuk owot iman kè Eburọn ikpọ, mè iniweek imun̄ ibe ke îkaan̄ atalek ebi usọ akọn̄ ebi owot iman yi ebi ìluk me Jajeri eyi òkup me Giliadi. 32 Jeriya îkaan̄ bọn ulọk, obop iba mè efit jaaba, ebi ìkakaan̄ efuuk, mè ire si ebi ibot me owot iman kiban̄. Ogwu ubọọn̄ Debit onenisa ema irọ ebi ibot inyi ebi otoko kè Ruben, mè ebi otoko kè Gadi, mè ìkike iba ebi otoko kè Manasi, ibe ekekpọ chieen̄ me lek ikwaan̄ geelek ògbaan̄ me lek irariaak Awaji, mè echi ògbaan̄ me lek ogwu ubọọn̄.