Akọn̄ osisibi me etete kè Abija melek Jerobuwam. 3 Abija osasa efit obop ebi akọn̄ ini ìrọriọọn̄ ukot akọn̄ isi akọn̄ ya, sà Jerobuwam osa efit obop ebi akọn̄ jeeta ìrọriọọn̄ ukot akọn̄ isi si akọn̄ ya.

4 Abija oneninene inyọn̄ ogoon̄ Semarayim me inyọn̄ ijọn̄ ogoon̄ ogoon̄ ebi otoko kè Iferem, mè itaan̄ ukpo itumu ibe, “Owu Jerobuwam, mè otutuuk ebi Ijeren, ìgban̄ utọn̄! 5 Ìre enyi kperiọọn̄ ibe ke Okumugwem, Awaji ebi Ijeren ìsa ogboon̄ ubọọn̄ otutuuk ido Ijeren inyi Debit ire mgbọ geelek? Îre Debit melek ebi bọn ke Okumugwem osa inyan̄a-ibot eyi uchi, òrere inyan̄a-ibot eyi òbokup ire mgbọ geelek, ichieek use yi inyi. 6 Ire, Jerobuwam gwun̄ kè Nebat, ogwu ikwaan̄ kè Solomọn gwun̄ kè Debit, onenikpaka ibot inyi ogwu nte uwu, 7 mè inikpulu ebi ikpak ebi kpekup me lek inu geege iwak ikana lek kan̄, mè ikije ikeme Reyobuwam gwun̄ kè Solomọn mgbọ îrebe sọntiik gwun̄ ikariọọn̄ge inu ìborọ, ìkakaan̄ si efuuk ìbosa ikeke ida ife cha.

8 “Mgbọ keyi, enyi ekitọt ititim akọn̄ ikeme mkpulu Okumugwem, eyi îdọmọbe itap me ubọk bọn owot iman kè Debit. Me atikọ, ebi akọn̄ kinyi mîwa enenen, enyi mîkaan̄ si owuwa mkpọmfaka eriembuuk alata araran̄ echi Jerobuwam orọbe inyi enyi kubọk awaji. 9 Ìre ìkare enyi erieen̄ ebi ngwugwa Okumugwem, ìrere bọn kè Erọn mè ebi otoko kè Libai isan̄a, mè iyaka inigobo ebi ngwugwa eyi kinyi ito kubọk ebi ofifi ido ekirọ? Ene geelek òkọkọt ikaan̄ gwun̄ eriembuuk ge mè arọọn̄ jaaba isa inu ibe enyi enefaka ikwaan̄ etap ọmọ me ubọk, enyi mîra isa irọ ogwu ngwugwa, inyi ikisi ikwaan̄ kubọk ogwu ngwugwa inyi inu cha ikarege awaji geege.

10 “Eyi kiji, Okumugwem ore Awaji kiji, eji kpejit ọmọ! Bọn owot iman kè Erọn ere ebi ngwugwa ìkisi ikwaan̄ inyi Okumugwem, ebi otoko kè Libai ere ebi ìkitap ubọk inyi ema. 11 Ema ekiwọp ngwugwa ewọwọp iriọk ewelegwe mè ikakwun̄ usen geelek inyi Okumugwem, mè ikiwọp si nsensi òkidun̄u utop olu igbaalek. Ema ekidọdọmọ Fituru Isi Okumugwem itoon̄ me inyọn̄ ikasi inorie ikakaan̄ge mbuban me lek, mè ikimin si ebi kè otitọn̄ òkup me lek ngugọọn̄ alata araran̄, inyi ema eketoon̄ ikakwun̄ usen geelek. Mije, eji ekirọrọ inu geelek Okumugwem Awaji kiji obe eji erọ. Ire, enyi mîjit ọmọ itele. 12 Awaji òwa melek kiji, ọmọ ore ogwu ibot kiji. Mgbọ isikem, ebi ngwugwa kan̄ mêwut otita akọn̄ isa igwen akọn̄ inu me lek kinyi. Ebi Ijeren, ikatim akọn̄ me lek Okumugwem Awaji ebi nte nte kinyi, mije, enyi kpebekọt itim ikpan̄.”

13 Mgbọ Abija okitumu ikọ chi, Jerobuwam oraria ebi akọn̄ kan̄ ilileek ikana me agan̄ udun̄ ebi Juda. Sa me ikeya, mgbọ owuwa ebi akọn̄ ebi Ijeren ekupbe me agan̄ isi ebi Juda, usini kiban̄ mîlileek ikana me agan̄ udun̄ ebi Juda. 14 Mgbọ ebi Juda ekanabe isi, eyaka inimun̄ ibe ke akọn̄ îben ema me agan̄ isi mè agan̄ udun̄. Ema etataan̄ ukpo igwen Okumugwem, ebi ngwugwa ewuwut otita akọn̄ kiban̄, 15 ebi akọn̄ Juda etitiki akọn̄. Mgbọ ebi Juda ekitiki akọn̄, Awaji okpukpulu Jerobuwam mè otutuuk ebi akọn̄ Ijeren iwook me isi kè Abija melek ebi Juda. 16 Ebi Ijeren elililim inan̄a me isi ebi Juda, Awaji okakana ebi Ijeren itap me ubọk ebi Juda. 17 Abija mè ebi akọn̄ kan̄ ekpakpan̄ ebi Ijeren igwook nsebe nsebe, ire lek efit obop ene go me lek ebi akọn̄ ebi Ijeren, ebi ìrọriọọn̄ ukot akọn̄, ekwaan̄be irurọn̄ọ. 18 Sa me ikeya, ebi akọn̄ Juda etitim ikpan̄ ebi akọn̄ Ijeren me mgbọ ya. Ebi Juda etim ikpan̄ me akọn̄ ya, mije ema esabe Okumugwem Awaji ebi nte nte kiban̄ itoon̄ ejit.

19 Abija ogọgọọk Jerobuwam, mè ibọkọ ọmọ ama Beten, mè Jesana, mè Efurọn, melek asabọn ama òkukup ikana ama cha geelek. 20 Me ukot kè Abija, Jerobuwam ìkayaka ìkọt ìkaan̄ unye kubọk mgbọ adasi. Okumugwem onenisulu Jerobuwam ito, ikwukwu.

21 Ire, Abija okpọkpọ ikimin, mè inye lek. Abija ìdo akọp mè nwa ini, mè ibon akọp ibot bọn ebirieen̄ iba mè iba, mè akọp mè ibot bọn ebibaan̄ gweregwen.

22 Otutuuk ofifi inu òrọrọ me ukot mkpulu kè Abija, mè inu îrọbe melek ikọ îtumube, mîge otutuuk itap me emen ikpa mfufuk kè Ido ogwu nriran.