31
Mgbọ eriebe ijọk ya isan̄a, otutuuk ebi Ijeren ebi ìkup me ere ya, ejijibi inin̄ ama geelek òkup me Juda, mè ibak otutuuk ewuuk mfaka cha geelek igwook, mè isọp uti yọk Asera, mè igbugbọ otutuuk isi-ijọn̄ melek otutuuk ntook geelek isan̄a me otutuuk agan̄ ebi otoko kè Juda mè agan̄ ebi otoko kè Benjamin mè agan̄ ebi otoko kè Iferem mè agan̄ ebi otoko kè Manasi, kpetele geege. Mgbọ egwakbe otutuuk inu chi isan̄a, otutuuk ebi Ijeren enenigwu ikom ifon ama kiban̄, mè ijọn̄ ìrot kiban̄.2 Ejikaya onenidọmọ ebi ngwugwa mè ebi otoko kè Libai itap me ọgbọn̄ ikwaan̄ kiban̄, kpa ogwu mè irek ikwaan̄ kan̄, mè ìre ogwu ngwugwa mè ìre ogwu otoko kè Libai, inyi ekegwa ngwugwa ewọwọp iriọk, mè ngwugwa esuuk, mè ekesi ofifi chieen̄ ikwaan̄, mè eketọn̄ Okumugwem, mè ekebe ọmọ onirọ me otutuuk otunchit Uwu Mbuban. 3 Ogwu ubọọn̄ onenikinyi anam mè inu ngwugwa ewọwọp iriọk echi ewelegwe mè echi ikakwun̄, mè echi Usen Mbuban, mè echi ijọk Aya Onyan̄, mè echi ijọk ibot mgbọ geelek ike egebe me emen Ikan Okumugwem. 4 Ogwu ubọọn̄ oneninyi ebi Jeruselem ida ibe ekenyi uche inu ebi ngwugwa mè ebi otoko kè Libai, inyi ema ekọt ekesa otutuuk mgbọ kiban̄ ekerọ inu Ikan Okumugwem odobe. 5 Mgbọ yaage ebi Ijeren ebọkọbe etip ya, ema enenisa me ata ejit inyi ogbogbo adasi mfut me lek akpa, mè aya miin̄, mè aran̄, mè aran̄ akwọọk, mè otutuuk ofifi mfut uko kiban̄ geelek, mè inyi si irek ge me akọp irek me lek inu kiban̄ geelek. Inu ema esabe inu owawa enenen. 6 Ebi Ijeren mè ebi Juda ebi ìluk me ama ile geelek òkup me ido Juda enenisa irek ge me akọp irek me lek eriembuuk mè arọọn̄ mè ebot inu, mè irek ge me akọp irek me lek otutuuk inu geelek efakabe itap me ubọk Okumugwem Awaji kiban̄, mè inititiin̄ inu cha me èdọ me èdọ. 7 Ebene ikititiin̄ inu cha me èdọ me èdọ me òso onyan̄ ita, mè ititiin̄ isan̄a me òso onyan̄ jaaba. 8 Ejikaya mè ebi ibot ikwaan̄ kan̄ enunu, mè inimun̄ inyinyi cha etitiin̄be me èdọ me èdọ, mè itọn̄ Okumugwem, mè itọn̄ ebi kan̄, ebi Ijeren.
9 Ejikaya onenido ebi ngwugwa mè ebi otoko kè Libai inu ofolek èdọ inyinyi cha. 10 Ajariya ogwu ibot ebi ngwugwa, ogwu owot iman kè Jadọk, onenifọọk ibe, “Karake ebi ene ebenebe ikisa inyinyi kiban̄ inu me Uwu Mbuban Okumugwem, eji mîkaan̄ inorie irie ijot, mè isik owuwa, mije, Okumugwem îgbana ebi kan̄ enenen! Kpọ-nu ogbogbo inorie òyayaka isik!”
11 Ejikaya oneninyi ida ibe enama owuwa agwut ere isun̄-inu me emen Uwu Mbuban Okumugwem, enanama. 12 Ema egwugwuun̄ chieen̄ ikpulu inyinyi cha, mè irek ge me akọp irek cha, mè inu cha geelek efakabe itap me ubọk Okumugwem itap me emen agwut ere isun̄-inu cha, geege ìkanan̄a me lek. Enenisa Konaniya ogwu otoko kè Libai ito me ibot, mè ito Simei ogwu ngwan̄ igba ọmọ, ibe ekekpọ chieen̄ me lek inu cha geelek. 13 Enenigobo Jeyen, mè Ajajiya, mè Nayat, mè Asayen, mè Jerimot, mè Josabadi, mè Elien, mè Isimakiya, mè Mayat, mè Benaya ito me irak kè Konaniya mè Simei ogwu ngwan̄, ibe ekekpọ chieen̄ me lek ikwaan̄. Îre Ejikaya ogwu ubọọn̄ mè Ajariya ogwu ibot ikwaan̄ me Uwu Mbuban Awaji egobo ife chi.
14 Kore gwun̄ kè Imina ogwu otoko kè Libai, ogwu òkibem otunchit Agan̄ Mbum-ura, okikpọ chieen̄ me lek inyinyi ata ejit geelek ekisa inu ininyi Awaji. Ọmọ si okidọmọ inyinyi enyibe Okumugwem inyi ebi ngwugwa mè ebi otoko kè Libai, igbaalek uche inu geelek efakabe itap me ubọk Awaji. 15 Eden, mè Miniamin, mè Jesuwa, mè Semaya, mè Amariya, mè Sekanaya ekitap ubọk inyi Kore. Ema ekup me ama ebi ngwugwa ikibọkọ inyinyi cha iche inyi ebi ngwugwa ogbo kiban̄, ebi ugane melek ebi ijija, me oniin̄ ògbegbe utoon̄-ejit, igọọk me ọgbọn̄ ikwaan̄ kiban̄.
16 Ema mîkiche inyinyi cha si ire lek ebirieen̄ geelek, bene me lek ebi acha ita fo inyọn̄, ebi egebe erieen̄ kiban̄ me emen ikpa mfufuk owot iman kiban̄, òrere ebi ìbekọt inin̄ emen Uwu Mbuban Okumugwem ikisi irọ ikwaan̄ ekirọ me usen me usen, igọọk me ikwaan̄ edọmọbe inyi ema, mè ọgbọn̄ ebi ngwugwa ema ekupbe me lek. 17 Ema mîkiche si inyinyi cha ire lek ebi ngwugwa egebe erieen̄ kiban̄ me emen ikpa mfufuk owot iman kiban̄ igọọk me owot iman kiban̄, melek ebi otoko kè Libai bene me lek ebi akọp acha iba fo inyọn̄, igọọk me ikwaan̄ edọmọbe inyi ema, mè ọgbọn̄ kiban̄. 18 Ema mîkiche si inyinyi cha ire lek otutuuk asasa nsabọn kiban̄, mè ebi nwa kiban̄, mè bọn ebirieen̄ kiban̄, mè bọn ebibaan̄ kiban̄ ìkup me otutuuk ama egobe me emen ikpa mfufuk owot iman geelek. Mije, ema otutuuk mîgbe utoon̄-ejit me isusun̄ lek kiban̄ me mbuban.
19 Me lek ebi ngwugwa ebi owot iman kè Erọn ebi ìluk me emen uko kiban̄, òkukup ikana ama ile kiban̄ mè ofifi ama òkukup igbet ema lek, mîgobo usini ebirieen̄ me erieen̄ me erieen̄ ito ibe ekeche inyinyi cha enyi ebirieen̄ geelek me etete kiban̄, mè ebi geelek egebe erieen̄ kiban̄ me emen ikpa mfufuk owot iman ebi otoko kè Libai.
20 Ikeyi ke Ejikaya orọ me otutuuk ido Juda. Îrọ inu ònwọnwọn, mè itat, mè igbe utoon̄ ejit me chieen̄ Okumugwem Awaji kan̄. 21 Me emen inu geelek Ejikaya orọbe me lek ikwaan̄ Uwu Mbuban Awaji, mè inu ofolek Ikan, mè ida Awaji onyibe, ìkiweweek Awaji kan̄ me otutuuk ejit kan̄. Mije keyi, inu geelek îrọbe ojeje ijaan̄.