Mîweek ikan Sarọs otapbe imun̄
6
Ogwu ubọọn̄ Dariọs oneninyi ida, ebi ene esisi iwọlọ emen uwu isun̄ ikpa mfufuk ogwu ubọọn̄ me Babilọn ikpọ. 2 Eweweek ikpa ekakat ge imun̄ me uwu mgban akọn̄ òkup me ama Ekibatana me agan̄ Midia. Inu egebe me lek ikpa ya ìre ikeyi:“Ikpa Ulook:
3 “Me adasi acha me lek mkpulu kè Sarọs, ogwu ubọọn̄ Sarọs îtap ikan ibak Uwu Mbuban Awaji òkup me Jeruselem ibe:
“Ekpọk enama Uwu Mbuban ya, ere ebekigwa ngwugwa, mè etọbọ ọdọ uwu ya. Ubene uwu ya ìbore akọp mè ejit go, uwele kan̄ si ìbore akọp mè ejit go. 4 Me akpalek uwu ya, isitoon̄ ukpa ikpele ewuuk ita, mênenitoon̄ ukpa ogbugboon̄ ge, mè esa ikeya esi ere ebek uwu ya. Mêsan̄a ikpoko me uwu ikpoko ogwu ubọọn̄ isa ikpe ewe otutuuk ikwaan̄ yi. 5 Ofifi si, otutuuk nroon̄ ikwaan̄ Uwu Mbuban, echi alata araran̄ mè echi alata okuket cha, echi Nebukadineja okpulube me Uwu Mbuban me Jeruselem isa ika inu Babilọn, mêsa ema igwu ikom isi isun̄ me irek kiban̄, me emen Uwu Mbuban Awaji ya, me Jeruselem.”
6 Eya orọ, ogwu ubọọn̄ Dariọs oneniria ufọọk-otu keyi ibe:
“Emi nria ikpa keyi ijet owu Tatenai ogwu ibot mkpulu usaba okwaan̄ Yuferetis, mè Seta-Bojenai, enyi mè ebi ibot ikwaan̄ kinyi me usaba okwaan̄ Yuferetis.
“Ìda lek ìbọkọ me ere ya. 7 Ikatap ufialek geege me lek ikwaan̄ Uwu Mbuban Awaji yi. Ìtele mè ogwu ibot mkpulu ebi Ju mè ebi ugane ebi Ju ekpọk enama Uwu Mbuban Awaji yi me inyọn̄ ǹrioon̄ kan̄. 8 Ògak ge, ǹkinyi enyi ida mgbọ keyi òfo me lek inu enyi eberọ inyi ebi ugane ebi Ju me lek ikwaan̄ Uwu Mbuban Awaji yi eyi ema ekirọ:
“Otutuuk ikpoko geelek ebi ife chi eweekbe me lek ikwaan̄ yi, ìmọnọ ikpoko me lek ikpoko geelek ònan̄a me usaba okwaan̄ Yuferetis inu inyi ogwu ubọọn̄ ìsa ìnyi, inyi ikwaan̄ ya ikayaka ìkeke. 9 Ìmun̄ ibe ke enyi mînyi ema otutuuk inu geelek òkup ema me uyọt, kubọk orie bọn eriembuuk, mè orie arọọn̄, mè bọn orie arọọn̄ echi ebesa ikigwa ngwugwa ewọwọp iriọk inyi Awaji òkup me inyọn̄, mè akpa wit, mè uchi, mè miin̄, mè aran̄ olifu, ike ebi ngwugwa ìkup me Jeruselem mêdobe. Ìkinyi ema inu chi usen geelek, ikalọlọ, 10 inyi ema mêkisa igwa ngwugwa echi òkibele ejit Awaji òkup me inyọn̄, mè ikiriaak uriaak me ibot ogwu ubọọn̄ melek bọn ebirieen̄ kan̄.
11 “Ofifi si, nra inyi ikan ibe ire ikaan̄ ogwu inwene ikan yi, mè ìkarọ, esan̄a ogbugboon̄ ge me lek uwu ene ya esa erọ ọfọkọ egwuun̄, mè eben ene ya ejeen̄ ekpan̄ me otu ọfọkọ ya, mè egwak uwu ene ya egwook, inyi ikana èdọ mkpukput. 12 Kè Awaji ogwu òsusun̄ ibe ekemin erieen̄ kan̄ me ere ya, ijijaka ogwu ubọọn̄ geelek, mè ìre ido geelek òweweek inwenwene ikan yi, mè ìre igbugbugbọ Uwu Mbuban yi òkup me Jeruselem. Emi Dariọs nkinyi ida keyi. Ǹkiweek ibe esun̄ ikan yi òjot òjot, ekanwene inu geege me emen.”
13 Tatenai ogwu ibot mkpulu usaba okwaan̄ Yuferetis, mè Seta-Bojenai, mè ebi melek kiban̄ egbagbala chieen̄ irọ otutuuk inu cha ike ogwu ubọọn̄ onyibe me ikan. 14 Sa me ikeya, ebi ugane ebi Ju etetet lek inye ikinama Uwu Mbuban ya. Ebi nriran, Agai mè Jekaraya ogwu owot iman kè Ido, ekekiben nriran isa ikitap ema efuuk me emen. Ema enanama Uwu Mbuban ya isan̄a, ike Awaji ebi Ijeren onyibe ida, mè ike Sarọs mè Dariọs mè Atejakisis, ebi ubọọn̄ Pesia, enyibe ikan ibe erọ. 15 Enama Uwu Mbuban ya isan̄a me òso usen ita me onyan̄ Adaria me òso acha gweregwen me lek mkpulu kè Dariọs.
16 Otutuuk ebi Ijeren, mè ebi ngwugwa, mè ebi otoko kè Libai, mè otutuuk ebi ìnan̄a me usun̄ akọn̄ ika, enenito ijọk isasa igbana Uwu Mbuban ya, mè inwọọn̄ unwọọn̄. 17 Me ijọk igbagbana Uwu Mbuban Awaji yi, mîgwu efit eriembuuk, mè efit orie arọọn̄ iba, mè efit bọn orie arọọn̄ ini, mè igwu si akọp mè orie ebot iba isa igwa ngwugwa ijo inu me ibot otutuuk ebi Ijeren, ebot ge me ibot otoko ge. 18 Ema enenidọmọ ebi ngwugwa isun̄ me irek kiban̄, mè idọmọ si ebi otoko kè Libai isun̄ me ọgbọn̄ me ọgbọn̄, inyi ema ekesi ikwaan̄ enyi Awaji me Jeruselem, ike egebe me emen Ikpa kè Mosis.
Ijọk Iraraka
19 Me òso akọp mè usen ini me emen adasi onyan̄, ebi usun̄ akọn̄ cha ìkaka ererie ijọk Iraraka. 20 Me mgbọ ya, otutuuk ebi ngwugwa mè ebi otoko kè Libai mîgwọk lek, mbuban geege ìkayaka ìkup ema me lek. Ebi otoko kè Libai enenigwu arọọn̄ ijọk Iraraka me ibot otutuuk ebi ìnan̄a me usun̄ akọn̄ ika, mè ibot ebi ngwan̄ kiban̄ ebi ngwugwa, mè ibot kiban̄ si. 21 Otutuuk ebi Ijeren ìnan̄a me usun̄ akọn̄ ika ererie inorie ijọk Iraraka ya, ema mè otutuuk ebi ìsasan̄a lek kiban̄ isan̄a me lek mbuban orọmijọn̄ cha echi ebi kpere ebi Ju cha ìluluk igba ema ekirọ, inyi ema ekọt etọbọ ebum enyi Okumugwem, Awaji ebi Ijeren. 22 Ema esasa usen jaaba irie ijọk Fituru Kpunu Olat, mè inwọọn̄ unwọọn̄, mije, Okumugwem înwene ejit ogwu ubọọn̄ Asiria, inyi itap ubọk inyi ema me lek ikwaan̄ inanama Uwu Mbuban Awaji, òrere Awaji ebi Ijeren, mè isa me ikeya itap unwọọn̄ ijot ema ejit.