Ejira îka inu Jeruselem
7
Mgbọ owuwa acha orakabe me lek inu chi òmọmọnọ irek, me ukot mkpulu kè Atejakisis ogwu ubọọn̄ Pesia, îkaan̄ ene ge ekigwen Ejira. Ejira ìre gwun̄ kè Seraya, gwun̄ kè Ajariya, gwun̄ kè Ilikiya, 2 gwun̄ kè Salum, gwun̄ kè Jadọk, gwun̄ kè Ayitubu, 3 gwun̄ kè Amariya, gwun̄ kè Ajariya, gwun̄ kè Merayot, 4 gwun̄ kè Jeraya, gwun̄ kè Uji, gwun̄ kè Buki, 5 gwun̄ kè Abisuwa, gwun̄ kè Fineyas, gwun̄ kè Elieja, gwun̄ kè Erọn ogwu òban Awaji. 6 Ejira yi oneninan̄a me Babilọn ika inu Jeruselem. Ejira ìre ogwu usọ Ikan kè Mosis eyi Okumugwem, Awaji ebi Ijeren, onyibe. Mije unye Okumugwem Awaji kan̄ okupbe melek kan̄, ogwu ubọọn̄ Atejakisis onyinyi ọmọ inu geelek îbeekbe me ubọk ogwu ubọọn̄. 7 Me òso acha jaaba me lek mkpulu kè Atejakisis ogwu ubọọn̄, usini ebi Ijeren, ebi ngwugwa, mè ebi otoko kè Libai, mè ebi ìkọt okwa, mè ebi ìkibem otunchit, mè bọn ikwaan̄ Uwu Mbuban enenigọọk Ejira inan̄a me Babilọn ika inu Jeruselem.8 Ejira ìnire Jeruselem me onyan̄ go me òso acha jaaba me lek mkpulu ogwu ubọọn̄ Atejakisis. 9 Ìbene ije kan̄ me Babilọn me adasi usen me adasi onyan̄, mè inire Jeruselem me adasi usen me onyan̄ go, mije, Awaji kan̄ îsa ubọk ichit ọmọ me oniin̄ ije ubọk ònwọnwọn. 10 Mije, Ejira ìsasa otutuuk ejit kan̄ inyi ikwekween̄ Ikan Okumugwem, mè ikirọ si, mè ikijeen̄ otutuuk ebi Ijeren orọmijọn̄ Awaji mè Ikan Awaji.
Ikpa ogwu ubọọn̄ Atejakisis ogebe inyi Ejira
11 Eyi ìre ikpa ogwu ubọọn̄ Atejakisis ogebe inyi Ejira ogwu ngwugwa mè ogwu uti ikpa ogwu òrọriọọn̄ ikọ Okumugwem otọbe melek orọmijọn̄ kan̄ echi înyibe ebi Ijeren, mè iriọọn̄ si ikijeen̄:
12 “Emi Atejakisis, ubọọn̄ ebi ubọọn̄, nkige ikpa keyi ijet owu, Ejira ogwu ngwugwa, mè ogwu uti ikpa òkijeen̄ Ikan Awaji òkup me inyọn̄.
“Ntọp owu amọn.
13 “Ǹkinyi ikan ibe, ogwu Ijeren geelek òkup me ido n̄a, mè ìre ogwu ngwugwa, mè ìre ogwu otoko kè Libai, òweweek igọgọọk owu isi Jeruselem, môkọt igọọk owu isi. 14 Emi ogwu ubọọn̄ mè ebi nteme jaaba n̄a ekiria owu isi Jeruselem mè Juda ibe owu òsi òkpọ ubọk inu okupbe me ere ya òfo me lek Ikan Awaji kwun̄ eyi òkup owu me ubọk. 15 Ògak ge, kpulu ikpoko alata okuket mè alata araran̄ cha, echi ogwu ubọọn̄ mè ebi nteme kan̄ esabe me ata ejit iche inyi Awaji ebi Ijeren, ogwu ere nluk kan̄ okupbe me Jeruselem, kaan̄ me ubọk. 16 Kpulu si otutuuk alata okuket mè alata araran̄ geelek owu môkọtbe ikaan̄ inan̄a me agan̄ Babilọn, melek inyinyi ata ejit geelek ebi ene mè ebi ngwugwa enyibe ibe esa esi ikwaan̄ me Uwu Mbuban Awaji kiban̄ òkup me Jeruselem, sa gbaalek. 17 Mun̄ ibe ke osa ikpoko chi ilep ebi kè eriembuuk, mè orie arọọn̄, mè bọn orie arọọn̄, mè akpa mêsabe igwa ngwugwa akpa, mè miin̄ mêsabe igwa ngwugwa miin̄ egwogwook òje me lek, mè sa inu chi gwa ngwugwa me inyọn̄ ntook òkup me Uwu Mbuban Awaji kwun̄ me Jeruselem.
18 “Ikaan̄ ikpoko alata okuket mè alata araran̄ geelek òsisik, owu melek ebi Ju ogbo kwun̄ mêkọt isa irọ inu òneme enyi, ike Awaji kinyi otọbe inyi enyi. 19 Mun̄ ibe ke owu osa otutuuk nroon̄ ikwaan̄ Uwu Mbuban cha eyakabe inyi owu isa inyi Awaji òkup me Jeruselem. 20 Ire iyaka ikaan̄ ofifi inu geelek mêweekbe me Uwu Mbuban Awaji kwun̄, bọkọ ikpoko me uwu ikpoko ogwu ubọọn̄ sa kpe.
21 “Emi ogwu ubọọn̄ Atejakisis nnyi ikan ibe otutuuk ebi ìkikpọ chieen̄ me uwu ikpoko me agan̄ usaba okwaan̄ Yuferetis emun̄ ibe ke ema mînyi Ejira inu geelek îdobe, ọmọ ìre ogwu ngwugwa, mè ogwu òjeen̄ Ikan Awaji òkup me inyọn̄. 22 Inu eyi mênyibe ọmọ ìkpowa iraka obop kilo alata okuket ita mè efit kilo ini, mè akọp obop kilo akpa ekọkọk, mè obop iko miin̄ iba, mè obop iko aran̄ olifu iba, mè ìnyi ema uchi ubọk geelek ema mêweekbe. 23 Inu geelek Awaji òkup me inyọn̄ môdobe, ìmun̄ ibe ke enyi mînyi otutuuk iso, inyi mêsabe ifaka mfaka me Uwu Mbuban kan̄, inyi Awaji ikanaan̄ ejit ìnyi ogwu ubọọn̄ mè bọn ebirieen̄ kan̄. 24 Ìriọọn̄ ibe ke mîgban enyi ibe enyi ekabọkọ otitip ido, mè otitip mkpulu, mè ikpoko ikwaan̄ geege me ubọk ebi nriran, mè ebi otoko kè Libai, mè ebi ìkọt okwa, mè ebi ìkibem otunchit, mè bọn ikwaan̄ Uwu Mbuban, mè otutuuk ebi ofifi ene geelek ìkisi ikwaan̄ me Uwu Mbuban Awaji yi.
25 “Owu Ejira, sa me iriọọn̄-inu eyi Awaji kwun̄ onyibe owu, gobo ebi ibot oyerebet, mè ebi ìbekineen̄ asabọn oyerebet, inyi ekesibi unen oyerebet enyi otutuuk ebi ìrọriọọn̄ Ikan Awaji kwun̄ me agan̄ usaba okwaan̄ Yuferetis. Ire ikaan̄ ebi kperiọọn̄ Ikan Awaji ijaan̄ me etete kiban̄, owu jeen̄ ebiba ikan cha, inyi eriọọn̄. 26 Ene geelek òjijit isisiki ibot inyi Ikan Awaji kwun̄, ìkasiki si ibot ìnyi ikan ogwu ubọọn̄, esulu ogwu òkup ikeya osusut ògbegbe: mêkọt ikpan̄ ọmọ, mè ìre irieen̄ ọmọ isibi me ido, mè ìre ibọkọ otutuuk inu îkaan̄be, mè ìre itet ọmọ itap me mkpọn.”
Ejira îtọn̄ Awaji
27 Ejira onenitumu ibe, “Itọn̄ ikup inyi Okumugwem Awaji ebi nte nte kiji, ogwu òtatap me ejit ogwu ubọọn̄ Atejakisis ibe isa ikpele umin òkup ikeyi inyi Uwu Mbuban Okumugwem òkup me Jeruselem. 28 Itọn̄ ikup si inyi ọmọ ogwu òrọrọ inyi ǹkaan̄ nnwọn-isi me isi ogwu ubọọn̄ mè ebi nteme kan̄, mè isi ebi ibot ikwaan̄ kan̄ ebi ìkaan̄ unye. Mije unye Okumugwem Awaji n̄a okupbe melek n̄a, ntetet lek inye, mè ititiin̄ usini ebi isi me Ijeren isa igbaalek ika inu Jeruselem.”