Aya ebi ìluk me Jeruselem
11
Me ike mgbọ yi, ebi ibot ido eneniluk me Jeruselem. Otutuuk ebi Ijeren kechilọ eneniroon̄ nriroon̄ isa igobo ene ge me akọp ene, inyi enegọọk eluk me Jeruselem ama mbuban ya. Ene onaan̄ge kechilọ mêbabia me ama kiban̄. 2 Ebi ido eneniriaak Awaji ibe igbana otutuuk ebi ìchechieek ibe ema mêluk me Jeruselem.3 Ebi ibot mkpulu me agan̄ me agan̄ ere ebi ìluk me emen Jeruselem. Îkaan̄ usini ebi Ijeren, ebi ngwugwa, mè ebi otoko kè Libai, mè bọn ikwaan̄ Uwu Mbuban, mè owot ebi usun̄ kè Solomọn ìluk me owuwa ama òkup me Juda, kpa ogwu me inyọn̄ ijọn̄ kan̄ me ama kan̄. 4 Usini ebi otoko kè Juda mè ebi otoko kè Benjamin ìluk me Jeruselem ire echi:
Ebi otoko kè Juda:
Ataya gwun̄ kè Ujaya, gwun̄ kè Jekaraya, gwun̄ kè Amariya, gwun̄ kè Sefatiya, gwun̄ kè Mayalalen ogwu owot iman kè Pereji; 5 mè Maseya gwun̄ kè Baruk, gwun̄ kè Kolo-Oje, gwun̄ kè Yajaya, gwun̄ kè Adaya, gwun̄ kè Jioyaribu, gwun̄ kè Jekaraya gwun̄ ogwu Silon. 6 Otu ifuk ebi owot iman kè Pereji ìluk me Jeruselem ìsibi efit ene ini, mè akọp gweregwen mè jeeta, otutuuk kiban̄ ebi ìkaan̄ efuuk.
7 Ebi otoko kè Benjamin:
Salu gwun̄ kè Mesulam, gwun̄ kè Jowedi, gwun̄ kè Pedaya, gwun̄ kè Kolaya, gwun̄ kè Maseya, gwun̄ kè Itien, gwun̄ kè Jesaya, 8 mè ebi melek kan̄, Gabai mè Selai, ema otutuuk esibi efit ene onaan̄ge, mè akọp iba mè jeeta. 9 Juwen gwun̄ kè Jikiri ore ogwu ibot ikwaan̄, sà Juda gwun̄ kè Asenuwa ore ogwu ibot ikwaan̄ òmimin igọọk me emen ama.
10 Owot iman ebi ngwugwa:
Jedaya gwun̄ kè Jioyaribu, mè Jakin; 11 mè Seraya gwun̄ kè Ilikiya, gwun̄ kè Mesulam, gwun̄ kè Jadọk, gwun̄ kè Merayot, gwun̄ kè Ayitubu ogwu ibot ikwaan̄ me uwu Awaji, 12 mè ebi melek kiban̄, ebi ìkisa ikwaan̄ uwu Awaji ije inyi isi, ema otutuuk esibi efit ene jeeta mè akọp iba mè iba; mè Adaya gwun̄ kè Jeroyam, gwun̄ kè Pelalia, gwun̄ kè Amiji, gwun̄ kè Jekaraya, gwun̄ kè Pasuru, gwun̄ kè Malikija, 13 mè ebi melek kan̄ ebi ìrere ibot me owot iman kiban̄, ema esibi efit ene iba mè akọp ini mè iba; mè Amasisai gwun̄ kè Ajaren, gwun̄ kè Ayijai, gwun̄ kè Mesilemot, gwun̄ kè Imeri, 14 mè ebi melek kiban̄, otutuuk kiban̄ ebi ìkakaan̄ efuuk, ema esibi efit mè akọp ene iba mè jeeta. Ogwu ibot kiban̄ ìre Jabidien gwun̄ kè Agedolim.
15 Ebi otoko kè Libai:
Semaya gwun̄ kè Asubu, gwun̄ kè Ajirikam, gwun̄ kè Asabiya gwun̄ kè Buni; 16 mè Sabetai mè Josabadi, ene iba me lek ebi ibot otoko kè Libai, ebi ìkikpọ chieen̄ me lek ikwaan̄ Uwu Mbuban echi ikarege me emen uwu; 17 mè Mataniya gwun̄ kè Mika, gwun̄ kè Jabidi, gwun̄ kè Asafu, ogwu ibot ogwu òkibene okwa itọn̄ melek uriaak; mè Bakubukia òrere ogwu ibot òso iba; mè Abida gwun̄ kè Samuwa, gwun̄ kè Galan, gwun̄ kè Jedutun. 18 Otu ifuk otutuuk ebi otoko kè Libai ìluk me emen ama mbuban ya ìre efit ene iba mè akọp jeeta mè ini.
19 Ebi ìkibem otunchit:
Akubu, mè Talimon, mè ebi melek kiban̄, ebi ìkibem otunchit geelek, otu ifuk kiban̄ ìre efit ene mè akọp jaaba mè iba.
20 Ebi ngwugwa mè ebi otoko kè Libai, mè otutuuk ebi Ijeren kechilọ eluk me otutuuk ama ido Juda, kpa ogwu me inyọn̄ ijọn̄ ebi nte nte kan̄ etelebe inyi ọmọ.
21 Bọn ikwaan̄ Uwu Mbuban eluk me inyọn̄ orioon̄ Ofen. Jiya mè Gisipa ere ebi ibot kiban̄.
22 Ogwu ibot otutuuk ebi otoko kè Libai ìluk mè Jeruselem ìre Uji, gwun̄ kè Bani, gwun̄ kè Asabiya, gwun̄ kè Mataniya, gwun̄ kè Mika. Uji ìre ene ge me lek ebi owot iman kè Asafu, ebi ìkọt okwa ìkikpọ chieen̄ me lek itọtọbọ ebum me uwu Awaji. 23 Îre ogwu ubọọn̄ okikpọ chieen̄ me lek ebi ìkọt okwa chi, mè ikitọ inu ema eberọ me usen me usen.
24 Petaya gwun̄ kè Mesejaben, ogwu owot iman kè Jera gwun̄ kè Juda ore ogwu otuchieen̄ ogwu ubọọn̄ me inu geelek ògbaan̄ me lek ebi Ijeren.
25 Ebi Juda eluk me ama ògbet lek uko kiban̄. Usini kiban̄ eluk me Kiriat Ariba, mè asabọn ama òkup ikana, mè Dibọn mè asabọn ama òkup ikana, mè Jekabijeen mè asabọn ama òkup ikana, 26 mè iluk me Jesuwa, mè Molada, mè Bet Pelet, 27 mè iluk mè Asari Suwali, mè Bieseba mè asabọn ama òkup ikana, 28 mè Sikilagi, mè Mekona mè asabọn ama òkup ikana, 29 mè En Rimọn, mè Sora, mè Jarimut, 30 mè Janowa, mè Adulam mè asabọn ama òkup ikana, mè Lakis mè ijọn̄ uko òkup ikana, mè Ajeka me asabọn ama òkup ikana. Ikeya ke ema eluk ibene me Bieseba isi igwook me iteke Inọm.
31 Ebi otoko kè Benjamin ìnan̄a me Geba eluk me Mikimas mè Ayija, mè Beten mè asabọn ama òkup ikana, 32 mè Anatọt, mè Nọbu, mè Ananiya, 33 mè Asọru, mè Rama, mè Gitayim, 34 mè Adidi, mè Jeboyim, mè Nebalat, 35 mè Lodi, mè Ono, mè iluk si me emen iteke ebi Usọ Ikwaan̄ Ubọk.
36 Usini ọgbọn̄ ebi otoko kè Libai ìluk me ido Juda ke eria ibe esi eluk me ido Benjamin.