Ikpa kè Jobu ìre mfufuk ogwu ata ene, ogwu òmumun̄ ikpele ujaralek. Me usen ge yaage, otutuuk bọn ogwu ata ene keyi okaan̄be ekwakwaan̄ isan̄a kpai, otutuuk inu îkaan̄be, ọmọ ogwu òbọbọọn̄ ubọọn̄ enenen, ojijijaka isan̄a kpai. Me mgburudun̄, ijo orukan̄ njijọ inya, eyi kpekọt igwa, ojijibi ọmọ ito me ijọn̄ me emen ntọn̄. Ire, me emen otutuuk ujaralek chi, Jobu ìkatumu Awaji ìlọ, ìkarọ si ijo inu (1:22). Ogwu ebilene geege ìkariọọn̄ ibe ke ujaralek yi ìnu, mije Awaji okiweek ijejeen̄ Yọk ibe ke ichechieek kè Jobu ìre eyi atata.

Ebi unene kè Jobu mînu iniweek ikakat Jobu ejit. Ire, mije ema ekween̄be ibe ke Awaji ìkikpe ene ata mkpukpe me lek ata inu geelek ene orọbe, mè ikisulu ene osusut me lek ijo inu geelek ene orọbe, ema emọmọnọ ibe ke Jobu îra irọ ijo inu, ke îre eya orọ Awaji okisulu ọmọ osusut. Jobu si, bak me lek îkirọ ata inu, ìkakọt ìchieek ibe ke Awaji môsulu ogwu ata ene osusut. Mije keya, itata ukpook me lek ikido Awaji ikọ òfo me lek unen oyerebet Awaji.

Awaji ìkafọọk ikọ kè Jobu, ire, mije ichechieek kè Jobu onyebe me lek kan̄, îtumu owuwa ikọ inyi Jobu, isa ijeen̄ Jobu ibe ke ebilene kpebekọt igobo owuwa inu ọmọ okirọ itet, kpebekọkọt si irọ inu ọmọ Awaji okirọ. Me mgburudun̄, Awaji okpọkpọk inyi Jobu ubọọn̄ kan̄, mè inyi isaba iraka. Awaji okakan̄ inu inyi ebi unene kè Jobu cha, mije ema ekakọtge ìriọọn̄ inu òrọrọ Jobu okibọkọ ujaralek. Jobu gaalek oriọọn̄ ibe ke Awaji îmin igak ubọk ebilene ekikeek.