Jobu
Jobu ogwu ata ene
1
Îkaan̄ ene ge òluk me inyọn̄ ijọn̄ Usu, erieen̄ kan̄ ìre Jobu. Ọmọ ìre ogwu ìkarọ inu geege ìlọ, mè ire si ogwu òtatat me ugwem. Ọmọ îkaan̄ ukpook Awaji, mè isan̄a lek kan̄ me ijo inu. 2 Ọmọ ìkaan̄ bọn ebirieen̄ jaaba mè bọn ebibaan̄ ita. 3 Îkaan̄ obop arọọn̄ jaaba, mè obop aligọ ita, mè efit mgbugbak eriembuuk go, mè efit uman inyinya akpan go, mè ikaan̄ si ebi ikwaan̄ iwa enenen. Ọmọ omin ichit me lek otutuuk ebi agan̄ Mbum-ura.4 Bọn kan̄ ebirieen̄ mîkisi ijọk me uwu kiban̄ ge ge, ogwu ikup mè usen eyi kan̄. Isibesi ijọk, mîra ikigween̄ ebi ngwan̄ ebibaan̄ ita kiban̄ cha ibe enegọọk ema esi erie, mè enwọ. 5 Ugbọ ijọk ge isiraka, Jobu îra iria ibe egween̄ ebi bọn, mè ònogwọk ema lek. Otu ewelegwe, îra inan̄a ikeke inigwa ngwugwa ewọwọp iriọk me ibot kiban̄ ge ge. Jobu ìkibe, “Usini mgbọ, bọn ebirieen̄ n̄a chi mîra irọ ijo inu, mè isan̄a ejit me lek Awaji.” Ikeyi ke Jobu okirọ usen geelek.
Awaji îtọn̄ Jobu
6 Usen ge, ebi Osat Awaji enunu inikeke me isi Okumugwem. Setana si ogọgọọk ema inu. 7 Okumugwem onenibe Setan, “Owu ònan̄a me owa?”
Setan ofọfọọk Okumugwem ibe, “M̀gbugbugbaan̄ ikana me linyọn̄, mè ijijen̄e inyi isi mè udun̄, mè inan̄a ika inu.”
8 Okumugwem onenibe Setan, “Ìre omun̄ ubọk ogwu ikwaan̄ n̄a Jobu okupbe? Kpunu ene geege òbet lek kan̄ me linyọn̄. Ọmọ ìre ogwu ikarọge inu geege ìlọ, mè ogwu òtatat me ugwem, mè ikitet ukpook Awaji, mè isan̄a lek kan̄ me ijo inu.”
9 Setan ofọfọọk Okumugwem ibe, “Ìre me ikike ke Jobu okitet ukpook Awaji? 10 Ìre ìkare owu owak ogọ ikana ọmọ mè ebi uwu kan̄ mè otutuuk inu geelek îkaan̄be okokop? Owu ogbana ubọk ikwaan̄ kan̄! Urum anam kan̄ ìbabaan̄ ichit otutuuk ere me lek ijọn̄! 11 Nyana-nu ubọk kwun̄ chak me lek otutuuk inu cha geelek îkaan̄be, mè kpọ-nu, mè ìre ìkpogbo owu me isi kwun̄ gaalek.”
12 Okumugwem otutumu inyi Setan ibe: “Kpọ inu geelek îkaan̄be ere echa me ubọk kwun̄. Ire, akpalek kan̄, kachak ubọk me lek.”
Setan ojeje inan̄a me isi Okumugwem.
Adasi ntọ-mkpọ Setan otọbe Jobu ikpọ
13 Usen ge, mgbọ bọn kè Jobu, irieen̄ mè ibaan̄, ekupbe ikirie ijọk, mè ikinwọ miin̄, me uwu ngwan̄ kiban̄ ogwu òrere ugane ichit, 14 ogwu ikwaan̄ kan̄ ge onunu me lek kè Jobu inilook ibe: “Eji ekisa ebi kè eriembuuk ikibak ijọn̄ me uko, ebi kè uman inyinya akpan ekekitaka mbubet me mgbet mgbet ere. 15 Ebi Saba egwogwook ichit eji mgbọ yaage, mè ikpulu anam cha isan̄a isa ifon, mè isa oge akọn̄ ikpan̄ ebi ikwaan̄ isan̄a. Emi gaalek nlibi inwọnọ isa etip inilook owu!”
16 Ogwugwa òkitumu ikọ ya me otu, ofifi ogwu ikwaan̄ onunu, mè inibe: “Omumen inyọn̄ îmumen ukan̄ inan̄a me isinyọn̄ initaka arọọn̄ kwun̄ mè ebi ikwaan̄ kwun̄, mè iwọp ema itaka ikọọk. Emi gaalek nlibi inwọnọ isa etip inilook owu!”
17 Ogwugwa òkitutumu ikọ ya me otu, ofifi ogwu ikwaan̄ onunu, mè inibe: “Urum ebi Kalidia ita mîgwook inin̄ lek aligọ kwun̄, mè ikpulu otutuuk isa ifon, mè isa oge akọn̄ ikpan̄ ebi ikwaan̄ kwun̄ isan̄a. Emi gaalek nlibi inwọnọ isa etip inilook owu!”
18 Ogwugwa si òkitutumu ikọ me otu, ofifi ogwu ikwaan̄ onunu, mè inibe: “Bọn kwun̄, ebirieen̄ mè ebibaan̄, ekup ikirie ijọk, mè ikinwọ miin̄, me uwu ngwan̄ kiban̄ ogwu òrere ugane ichit. 19 Me ekakpọkpọge chieen̄, ikpele egwijo ojijibi inan̄a me emen èwê inu, mè initoon̄ me lek usọk ini uwu ya, uwu ogbugbugbọ ikeme ema, ema otutuuk ekwakwaan̄ isan̄a. Emi gaalek nlibi inwọnọ isa etip inilook owu!”
20 Ogwugwa ikpakpa eyi kan̄ isan̄a, Jobu onanan̄a ikeke jîp, mè isa me ufieejit itaba ofọnti àwurukù òkup ọmọ me lek igwak, mè ikwọkọ ijeek isan̄a me ibot, mè irọn̄ inyana me ijọn̄, mè itọbọ ebum, 21 mè itumu ibe:
“Njak ke nnan̄a isibi me owot nga n̄a,
njak si ke mbakwu inan̄a.
Okumugwem onyi, Okumugwem obọkọ;
itọn̄ ikup inyi erieen̄ Okumugwem.”
22 Me emen inu chi geelek, Jobu ìkarọ ijo inu, ìkatutumu si ijo ikọ geege ìkeme Awaji.