Sofari îtumu ikọ òso mgbọ iba inyi Jobu
20
Sofari ogwu Nayama onenibọkọ otu ibe:2 Me atikọ, ekiket n̄a òkisisaak emi ibe emi m̀bọkọ otu,
mije, ìkup emi me lek ifi ifi.
3 Ikan̄-inu kwun̄ nnọbe ìre unyechieen̄ inyi emi,
ekwukwu eyi ngobo-ntet n̄a orọ inyi m̀bọkọ otu.
4 “Me atikọ, owu oriọọn̄ ibe, bene me ukot ikaan̄,
akarake etobe ene me linyọn̄,
5 ke unwọọn̄ ogwu ikpak ìkakikup ìfiin̄,
ubelejit ogwu ikariọọn̄ge Awaji ìkire mgbidim.
6 Ìrere ọmọ ìjọjọn̄ọ itet akpabin inyọn̄,
ibot kan̄ ochachak me lek oduku inyọn̄,
7 ọmọ ìbochechep ire mgbọ geelek,
kubọk ifin kan̄ olak me ijọn̄;
ebi ìwuwuuk lek imun̄ ọmọ mêkekido ibe, ‘Sà ọmọ ye?’
8 Môwulu ichep kubọk mun̄umun̄ ilaak,
kpebeyaka imun̄ ọmọ;
môniniin̄ ichep kubọk ilaak ọkpọchieen̄
emun̄be me eririeen̄.
9 Chieen̄ òmumun̄ ọmọ, ìkpoyaka imun̄ ọmọ ofifi,
ebi ere ọmọ okiluk kpebeyaka irieen̄ ọmọ chieen̄ me lek.
10 Bọn kan̄ mêyaka inu îbọkọbe ebi ugbọọn̄ inyi,
ọmọ si môsa ubọk kan̄ ikpulu inu ubọọn̄ kan̄
iyaka inyi ebikaan̄.
11 Ukwuuk kan̄ cha unye osobe me lek
kubọk ukwuuk nsabọn irieen̄,
môgọọk ọmọ ilaak me emen achiaan̄.
12 “Ubọk geelek ijo inu okinin̄i ọmọ me otu kubọk uchọk,
ọmọ okekitap ijo inu me irak alọm kan̄ ilet ikaan̄;
13 ubọk geelek îtetbe ikaan̄ me otu kan̄ ikinọ utop,
mè ichit isun̄, ìkaweek ikwukwut ifiin̄;
14 ire, inorie kan̄ ìbokana ujat me emen owot kan̄,
mè okana iwot asawọ me emen kan̄.
15 Ọmọ môgọkọ inu ubọọn̄ cha îmeen̄be;
Awaji môrọ inyi ọmọ igbọ inu cha isibi me owot.
16 Ọmọ môfip iwot asawọ imen,
ijo ulu môtọtọk ọmọ ikpan̄.
17 Ìkpoluk isoon̄ nnwọn inu
òbokigbuk inu kubọk ibot mun̄,
mè aran̄ akwọọk melek mun̄ ebe akakam
òbokibaak inu kubọk okwaan̄.
18 Môyaka inu îkwukwulube ikaan̄ igwook, ìkpore ọmọ otu,
oruru îkaan̄be me lek ewe înyambe,
ìkporie utop ònan̄a me lek.
19 Mije, ọmọ îtutuku ebi ugbọọn̄, mè itọp ema ito;
îtet uwu echi ikarege ọmọ onama
ibọkọ me ubọk unye.
20 “Mije ọmọ orebe ogwu ebek,
ìkakọt ìsun̄ inu ubọọn̄ îkaan̄be.
21 Îrie, mè irie inọọn̄, inu geege ìkayaka ìsik,
eya orọ, ata irek kan̄ ìkpokup ifiin̄.
22 Mgbọ ubọk kan̄ môjotbe ke ufialek kan̄ obomin,
ukwook mônenikeme ọmọ ikpukpuku.
23 Mgbọ owot kan̄ isijot,
Awaji mônenigbuku uyok uyok unaan̄-ejit kan̄
igwook ọmọ me lek,
mè irọ ufialek ifan̄a ichit ọmọ
kubọk ibot me lek inorie kan̄ ya.
24 Ire ọmọ ilibi inwọnọ nroon̄ akọn̄ okwukwut,
oraan̄ ekwe otu mônin̄ ọmọ lek igwọt itibi.
25 Môtaba oraan̄ ya iwọọk isibi me udun̄ kan̄,
otu oraan̄ ya òkimumumen
môwọwọọk isibi me ejit kan̄,
uga ukpook môtetet ọmọ.
26 Uga ekpuk udun ìkukup ikikpọ inu ubọọn̄ kan̄,
ukan̄ ekasọsọkge môtaka ọmọ iriọk,
mè itaka inu geelek òsisik me uwu kan̄ ikọọk.
27 Akpabin inyọn̄ môchili nrọ-nlọ kan̄ ibook;
linyọn̄ mônan̄a ikeke ikeke ata-ikọ ikeme ọmọ.
28 Me usen unaan̄-ejit Awaji, agbugbuk môjibi uwu kan̄,
ukot mun̄ môkwọkwọọk inu geelek îkaan̄be isa ije.
29 Eyiyi ore inu òkukup inyi ogwu ikpak
inan̄a me ubọk Awaji,
òrere ìrot eyi Awaji osun̄be inyi ọmọ.”