Tukutuku mè kwulukwulu me linyọn̄
4
Nnenikpọk igwuun̄ chieen̄ ikpọ, mè imun̄ tukutuku ekitutuku ene me irak isi ura:Mmun̄ ito ebi ekitutuku ekito,
ire, ema kpekaan̄ ogwu ukarajit;
unye ìkup me ubọk ebi ìkitutuku ema,
ire, ema kpekaan̄ ogwu ukarajit.
2 Eya ke emi ntọn̄ ebi ìkwakwaan̄,
ebi ìwuwuuk lek ikwaan̄ iraka,
igak ebi ìkup me ògat ugwem,
ebi ìkiluluk ugwem mgbọ yi.
3 Ire, ogwu ònwọnwọn igak ema agan̄ iba
ìre ogwu kpemaman-nu,
ogwu ìkamumun̄-nu ijo inu
eyi ekirọ me irak isi ura.
4 Emi mmun̄ si ibe ke otutuuk ukwook mè otutuuk efuuk ene okitap me lek ikwaan̄ ìre bak me lek chieen̄ ile ene okaan̄be me lek ogwu melek kan̄. Eyi si ìre inu ikike, mè itetet efet.
5 Ogwu mbubut ìkikakat ubọk me lek,
mè ikitak lek ita inyi uraafiọọn̄.
6 Akpa ubọk inorie ge òje melek isiki-efuuk
înwọn igak akpa ubọk inorie iba
òje melek ogbogbo ukwook;
ogbogbo ukwook ìre itetet efet.
Ikakaan̄ ene me lek ore unye
7 Mmun̄ si ofifi inu ikike me irak isi ura:
8 Îkaan̄ ene ge òkup ọmọ gaalek,
ìkakaan̄ ofifi ene melek kan̄;
ìkakaan̄ gwun̄,
ìkakakaan̄ ngwan̄.
Ukwook îkikwook me lek ikwaan̄, ìkakaan̄ itata,
ire, inu ubọọn̄ kan̄ ìkakijot ọmọ chieen̄.
Inenido lek kan̄ ibe,
“Ukwook ikwaan̄ nkikwook, ìkup inyi ekene mọnọ?
Keke ke mbak me lek ikijit lek n̄a utop?”
Eyi si ìre inu ikike, mè tukutuku eyi ichep!
9 Iba înwọn igak ge,
mije, ema mêkaan̄ ata oruru me lek ikwaan̄ kiban̄:
10 Ire ene ge inan̄a irọn̄,
ogwulọ môbene igwuun̄.
Ire, môfieek inyi ogwu ibot ge ònanan̄a irọn̄,
ìkakaan̄ ogwu òbebene ọmọ igwuun̄!
11 Ikeya si, ire ene iba igbaan̄ ilaak, lek kiban̄ môyok ukan̄.
Ire, ogwu òlalaak ọmọ gaalek, lek kan̄ ìbojeje iyok ukan̄?
12 Ene môkọt inye lek igak ibot ene ge,
ire, ene iba mêkeke ida ọmọ, mè itim ikpan̄ ọmọ.
Ikeya si, olik mgbugbak ita,
ìkakigwat lek ìfieek.
Unye eyi mkpulu ìre inu ikike
13 Sọn̄ gwun̄ òrere ugbọọn̄ mè iriọọn̄ inu, înwọn igak ogwu ubọọn̄ mbubut òkakan, ìkakibọkọ nteme. 14 Sọn̄ gwun̄ ya môkọt inan̄a me mkpọn isibi inikeke ubọọn̄; môkọt ire ke eman ọmọ ugbọọri me ido ya ọmọ okikpulu. 15 Mmun̄ ibe ke otutuuk ebi ìkup me ugwem mè ikije me irak isi ura ekeke egbe egbe me udun̄ sọn̄ gwun̄ ya ònibọkọ irek ubọọn̄. 16 Ebi ọmọ okikpulu, mîwa ire lek kperiọọn̄ otu ifuk. Ire, ebi ìnu me udun̄ kpebele ejit me lek kan̄. Eyi si ìre inu ikike, mè itetet efet.