Oyerebet ibot Jeruselem mè Juda
3
Ìkpọ, Ogwukaan̄-ene Okumugwem Ogwukaan̄ Inyọn̄ mè Ijọn̄,mônibọkọ ebi ama Jeruselem mè ebi ido Juda
otutuuk uche geelek,
mè ntap-ubọk geelek ema ekisa ibene ibot,
isan̄a ema me ubọk;
môbọkọ ema otutuuk uche inorie,
mè otutuuk uche mudim ema ekisa iluk ugwem, isan̄a.
2 Môbọkọ ema si ebi unye kiban̄ melek ebi usọ akọn̄ kiban̄,
mè ebi oyerebet melek ebi nriran,
mè ebi ìtet ǹcha, melek ebi ugane,
3 mè ebi ibot urum akọn̄ akọp ene go,
melek ebi ilile ebi ekinyi umin,
mè ebi nteme, melek ebi usọ ikwaan̄ ubọk,
mè atalek ebi usọ ifit ibọk.
4 Okumugwem mônenisa nsabọn irieen̄
irọ ebi ibot inyi ema;
ebi ìkup me otu ebe mênenikikpulu ema.
5 Ebi ene mêkekitutuku lek kiban̄;
enerieen̄ môtutuku enerieen̄ ogbo kan̄,
ogwu mbuuruk môtutuku ogwu mbuuruk kan̄.
Nsabọn mêkinye chieen̄ inyi ebi ugane,
ebi kpekup me lek inu
mêkinye chieen̄ inyi ebi ilile.
6 Ene ge môtet ogwu ngwan̄ me emen uwu ogwu ute,
mè ibe, “Owu okaan̄ ofọnti.
Owu môkana ogwu mkpulu inyi eji;
ido yi, òkakana èdọ inu òjijijaka itọm ibene,
owu obokpọ chieen̄ me lek!”
7 Ene ya môjijit, mè initumu, me usen yaage, ibe,
“Emi m̀kpakana ogwu òkibọp chieen̄ inya,
kpunu inorie me uwu n̄a, kpukpunu si ofọnti.
Ikasa emi ìrọ ogwu ibot ìnyi ebi ene.”
8 Ama Jeruselem òkisisik,
ido Juda înan̄a irọn̄,
mije, ikọ ema ekitumu mè inu ema ekirọ,
ekirọ ikeme Okumugwem;
ema kpetet ukpook ibe
ke chieen̄ mgbugbo kan̄ òwa me lek kiban̄.
9 Ukpook òkup ema me inyọn̄ isi
gaalek okisibi ata-ikọ ikeme ema,
ema erọrọ ijo inu kiban̄ ikpọk
mbum kubọk ebi Sodọm, kpelelet.
Môfieek enenen inyi ema!
Mije, ema gaalek etitiin̄
uyọrọlek itoon̄ me ibot kiban̄.
10 Tumu nyi ebi ata irọrọ ibe ke mônwọn inyi ema,
mije, ema mêrie mfut ubọk ikwaan̄ kiban̄.
11 Môfieek inyi ogwu ikpak!
Ìkpomun̄ nnwọn!
Mije, inu ọmọ okirọ ebi ofifi ene,
eya ke eberọ ọmọ.
12 Nsabọn ekitutuku ebi n̄a,
ebibaan̄ ekekikpulu ema.
Jei, ebi n̄a! Ebi ìkijeen̄ enyi oniin̄ ekisasa enyi ije ilọ oniin̄,
ema mîwuwọlọ oniin̄ kinyi.
13 Okumugwem îmọnọ irek kan̄ me ere oyerebet,
îbem lek isisibi oyerebet me ibot ebi kan̄.
14 Okumugwem ìbonin̄ oyerebet melek ebi ugane ebi kan̄,
melek ebi ìkikpulu ema.
Ogwukaan̄-ene Okumugwem Ogwukaan̄
Inyọn̄ mè Ijọn̄ ìkitoon̄ ema ikọ ibe,
“Îre enyi ejijaka uko gerep n̄a isan̄a kpai!
Inu ebi ugbọọn̄ cha enyi efumbe, ọmọ òwa me uwu kinyi okupbe.
15 Keke orọ enyi ekpukpukube ebi n̄a igwook,
mè itet isi ebi ugbọọn̄ ikwuk me ijọn̄?”
16 Okumugwem ìbe,
“Ebibaan̄ Sayọn ekigumu lek,
mè ikinyana ebek ije ije,
mè ikinin̄i chieen̄,
mè ikije, mè ikiteek,
ekwe ebek ukot kiban̄
okekisan̄a amọn nyak nyak nyak.
17 Eya orọ, Ogwukaan̄-ene môrọ inyi mfem
itaka eden̄ ibot ebibaan̄ Sayọn igwak;
Okumugwem ìbochichili njak kiban̄ ijeen̄ oyet.”
18 Me usen ya, Ogwukaan̄-ene môsan̄a inu mbala-lek kiban̄ cha isan̄a ema me lek. Môsan̄a asi ebek ukot cha òkisan̄a amọn, mè echi ekikwaan̄ me inyọn̄ isi, mè echi òkigọbọ kubọk aya onyan̄, 19 mè mkputọn̄, mè asi ebek ubọk, mè ekwut ekisa ifiaka ichit isi, 20 mè akisi ekisa ifiaka ibot, mè akọlọ ekisa ibala ebek ukot, mè ujuja fanti kiban̄ cha, mè aran̄ òkibubaan̄ olu, mè igba kiban̄ cha, 21 mè mkpọtubọk, mè asi inwọm, 22 mè ujọn̄ọ ofọnti kiban̄, mè ofọnti ekijejeen̄ me lek, mè ofọnti inyọn̄, mè akpa ubọk, 23 mè umọọn̄, mè ofọnti lilin̄, mè ekwut igọbọ ibot, mè ekwut ekitoon̄ me oguga cha.
24 Kpan̄asi aran̄ utop olu,
ema ebeyaka inikidun̄u njijọ olu;
kpan̄asi uja fanti ekisa ikana me ebon,
ìboyaka inire olik;
kpan̄asi ijeek ekpabe ijaan̄,
ìboyaka inire ǹlak ibot;
kpan̄asi uja ekwut ebon,
ìboyaka inire ekwut ufieejit;
kpan̄asi uja, ìboyaka inire iman̄ òriọọn̄
ebi usun̄ esabe okwukwut òreren̄e itap.
25 Ebirieen̄ kinyi mêkwaan̄ me otu oge akọn̄,
ebi unye kinyi mêchieen̄ ita me akọn̄.
26 Otunchit ama Sayọn môkup me uga ufieejit mè ito,
ama Sayọn me lek kan̄ môlaak ukpọk,
mè isiki ikweek irek me ukpọk ijọn̄.