Jerimaya ìre ikpele ogwu nriran òtataba ebi kiban̄, ebi Juda, ubọk me utọn̄, òfo me lek jakajaka mè ùrioon̄ òbonan̄a me agan̄ inyọn̄ inu inikeme ema, mije itọtọbọ ebum inyi mkpọmfaka melek esese chieen̄ ijo inu ema ekirọ. Jerimaya ìben nriran me ukot ebi ubọọn̄ Juda go, ìrere Josaya, mè Jeyowayaji, mè Jioyakim, mè Jioyakin, mè Jedikaya. Ebibi ere òta ebi ubọọn̄ ìkpukpulu ido Juda sabum ebi Babilọn enitim akọn̄ ikpan̄ ebi Juda, mè igbugbọ Jeruselem igwook.

Jerimaya îmun̄ ukwook me lek ikwaan̄ îsibe inyi Okumugwem. Îma Okumugwem enenen, eya orọ, ìkakọt ìjit itutumu ikọ geelek îbe ọmọ itumu inyi ebi kiban̄. Ikọ Okumugwem ìkisak Jerimaya me ejit kubọk ukan̄, ire, ìkakikọt ìtet ìkaan̄. Îma si ebi kiban̄ enenen, eya orọ ìkama ikekiben nriran inyi ema òfo me lek osusut eyi Okumugwem obosulu ema, mije ijo inu kiban̄. Ire, ebi kiban̄, yaka nwene, kpenwene.

Mije etip Okumugwem eyi Jerimaya okilook ebi kiban̄, mîsulu ọmọ me njijan̄, mè itap me mkpọn, mè itọp ọmọ itap me udọn̄ mun̄ utek ogakbe emen, mè itet ọmọ me unye isa igbaalek ifo Ijipiti, ere Okumugwem otumube ibe ema ekasi. Ebi ugbalek kan̄, mè ebi uwu kiban̄, mè ebi ngwugwa ofiaan̄ mè ebi nriran ataak, mè ebi unene kan̄, mè ebi ìkigban̄ ikọ kan̄, mè ebi ubọọn̄, mîjit ọmọ. Jerimaya ìkeke ọmọ gaalek, mè ikito ito, mije una mgban̄-utọn̄ ebi kiban̄, melek ùrioon̄ òkirọn̄ ikeme ema bak me lek una mgban̄-utọn̄ kiban̄.

Ikpa Jerimaya ìkup irek go. Adasi irek (ibot 1), ìre ike Okumugwem ogwenbe Jerimaya. Òso irek iba (ibot 2-25), ìre etip Okumugwem olookbe ebi ido Juda me ukot ebi ubọọn̄ Josaya, mè Jioyakim, mè Jioyakin, mè Jedikaya. Òso irek ita (ibot 26-45), ìre mfufuk echi Baruk, ogwu uti ikpa kè Jerimaya ogebe, mè owuwa ikọ nriran, mè ikpele inu òrọrọ me ugwem kè Jerimaya. Òso irek ini (ibot 46-51), ìre etip Okumugwem olookbe òfo me lek owuwa ofifi ido. Òso go (ibot 52), ore mfufuk ubọk ebi Babilọn ejijakabe ama Jeruselem, mè ikpulu ebi Juda me usun̄ akọn̄ ifo Babilọn.