Jerimaya
1
Echichi ìre ikọ echi Jerimaya gwun̄ kè Ilikiya, ene ge me lek ebi ngwugwa ìkup me Anatọt me ijọn̄ ebi otoko kè Benjamin, otumube. 2 Okumugwem ìtumu ikọ inyi ọmọ me òso akọp mè acha ita me lek mkpulu kè Josaya gwun̄ kè Amọn ogwu ubọọn̄ Juda. 3 Okumugwem îtumu si ikọ inyi ọmọ otutuuk mgbọ Jioyakim gwun̄ kè Josaya orebe ubọọn̄ me Juda, inire òta onyan̄ go me òso akọp mè acha ge me lek mkpulu kè Jedikaya gwun̄ kè Josaya ogwu ubọọn̄ Juda, mgbọ ekpulube ebi Jeruselem me usun̄ akọn̄.Awaji îgwen Jerimaya
4 Mgbọ ya, Okumugwem onenitumu inyi emi ibe:
5 “Sabum nnibobot owu me emen akpa gwun̄ nga kwun̄,
nriọọn̄ owu isan̄a;
sabum enimaman owu,
nra isusun̄ owu me mbuban isan̄a;
ǹsasa owu irọ ogwu nriran
inyi ido geelek.”
6 Nnenifọọk ibe: “Jei Ogwukaan̄-ene Okumugwem, emi ǹkariọọn̄ ìtumu ikọ, emi ìre sọntitiik gwun̄.”
7 Ire, Okumugwem obebe emi, “Katumu ibe ke owu ìre sọntitiik gwun̄. Mije, ebi geelek mâriabe owu isi lek, lek kè ebiba ke owu obosi. Ikọ geelek mâtọbe ibe owu òtumu, eya ke owu obotumu. 8 Katet ukpook me isi kiban̄. Emi òwa melek kwun̄, mânyan̄a owu isibi. Emi Okumugwem ntumu.”
9 Okumugwem oneninyana ubọk kan̄ ichak emi me otu, mè ibe emi, “Kpọ, nra itap ikọ n̄a me otu kwun̄. 10 Cherekeyi, ngobo owu ito me otuchieen̄ ido geelek mè ama ubọọn̄ geelek, ibe owu òjibi òto, mè ògbugbọ ògwook; ibe owu ògwak, mè òjijaka òsan̄a, mè ònama, mè òwop.”
11 Okumugwem onenido emi ibe: “Jerimaya, keke ke omun̄?”
Mfọfọọk ibe, “Mmun̄ otu agọọk uti alimọn ge.”
12 Okumugwem otutumu inyi emi ibe, “Owu omun̄ itat, mije, emi ǹgwọgwọk chieen̄ ikikpọa ikọ n̄a ibe irọ iso.”
13 Okumugwem okpọkpọk ido emi òso mgbọ iba ibe: “Keke ke omun̄?”
Mfọfọọk ibe, “Mmun̄ otin̄ ge òkirariak, òkọkọọn̄ isi inan̄a me agan̄ inyọn̄.”
14 Okumugwem obebe emi: “Ùrioon̄ mônan̄a me agan̄ inyọn̄ igbuku igwook me lek otutuuk ebi ìluk me lek ijọn̄ yi. 15 Kpọ, emi mânigween̄ otutuuk ebi ama ubọọn̄ agan̄ inyọn̄ cha ibe enu. Emi Okumugwem ntumu.
“Ebi ubọọn̄ kiban̄ cha mênu iniyiyik ogboon̄ ubọọn̄ kiban̄
me otu isotu otunchit geelek me Jeruselem;
ema mêgban ikana mgban ama ya okokop,
mè igban si ikana otutuuk ama geelek me ido Juda.
16 Mâfieek oyerebet n̄a inyi ebi n̄a
ofolek otutuuk inu ikpak geelek ema erọbe,
mije ema ejitbe emi,
mè isi ikiwọp nsensi inyi ebi kè ofifi awaji,
mè ikitọbọ ebum inyi inu ubọk kiban̄ orombe.
17 “Tobo ekwut nye me ebon, mè nan̄a keke! Inu geelek ntọbe inyi owu, tumu nyi ema. Kafieek owot me isi kiban̄, inyi nkarọ owot ifieek owu me isi kiban̄. 18 Cherekeyi, nrọ owu òkana òre ama mgban ònyenye, mè atà okwukwut, mè mgban ekwe, inyi owu òkeke òda otutuuk lek ijọn̄ yi, mè ebi ubọọn̄ Juda, mè ebi ibot, mè ebi ngwugwa, mè otutuuk ebi lek ijọn̄ yi. 19 Ema mêtim owu akọn̄ me lek, ire, kpebenye lek igak owu, mije, emi òwa melek kwun̄, mânyan̄a owu isibi. Emi Okumugwem ntumu.”