Ebi Ijeren mîjit Awaji
“ ‘Nkeek ata eru kwun̄ mgbọ orebe nsabọn ibaan̄,
ubọk owu omabe emi mgbọ orebe aya nwa,
mè igọọk emi ije itibi emen èwê,
ije itibi ijọn̄ ya eyi kpewop inu geege.
3 Ebi Ijeren ekup me mbuban inyi Okumugwem,
ema ere adasi mfut uko kan̄;
oyerebet îtip otutuuk ebi ìkiloon̄ ema igwak,
ùrioon̄ îtoon̄ me ibot kiban̄.
Emi Okumugwem ntumu.’ ”
4 Enyi ebi uwu kè Jekọp, otutuuk otoko uwu kè Ijeren,
ìgban̄ ikọ Okumugwem.
5 Okumugwem ìtumu ibe ikeyi:
“Kpasi nrọ-nlọ ke ebi nte nte kinyi emun̄ me emen n̄a,
eyi ema ebakbe me lek ije ijọn̄ọ emi ere me lek?
Ema enan̄a igọọk mkpọmfaka ikike,
mè ikana ebi ikike me lek kiban̄.
6 Ema kpedodo ibe, ‘Mọmọ Okumugwem ya,
ogwu òsasan̄a eji isibi me Ijipiti,
ogwu òsasa eji ije itibi emen èwê,
itibi lek ijọn̄ òchachat mè ikup udọn̄ udọn̄,
ijọn̄ una mun̄ melek udun mkpa,
ijọn̄ eyi ene geege ìkajeje ìtibi,
ere ene geege ìkaluk?’
7 Nsa enyi inigwook me lek ata ijọn̄ uko,
ibe enyi erie mfut kan̄ mè ata inu kan̄ geelek.
Ire, enyi enunu inififila ijọn̄ n̄a,
mè ichaka mbuban me lek ìrot n̄a.
8 Ebi ngwugwa kpedodo ibe,
‘Mọmọ Okumugwem?’
Ebi ibot ikan kperiọọn̄ emi;
ebi ibot kiban̄ ekijeje ikeme emi.
Ebi nriran ekekisa Baali iben nriran,
mè ikana ikigọọk inu ikakaan̄ge oruru.
9 “Eya orọ, mâtoon̄ enyi uraamọn,
mè itoon̄ si ire lek bọn bọn kinyi igbaalek.
Emi Okumugwem ntumu.
10 Ìsaba ìtoon̄ me agba ijọn̄ achọ Kitima ìsi ìkpọ-nu,
mè ìria ene ìsi Keda, inyi esi eruk chieen̄ ekpọ,
mè emun̄-nu mè ìre ojelek inu òkup ikeyi îrarak irọ:
11 Ìre îkaan̄ ido òrarak inwene awaji kiban̄,
ubọk geelek ibe ke awaji cha kperere awaji geege?
Ire, ebi n̄a mîsa Awaji kiban̄ òkakaan̄ ujamgbugbo
inwene inu ikakaan̄ge oruru.
12 Jei akpabin inyọn̄, kè inu keyi iriki owu lek,
mè itet owu ikpele ukpook,
mè igwook owu mbiribọ me lek.
Emi Okumugwem ntumu.
13 Ebi n̄a mîrọ ijo inu iba:
Ema mîtọp emi ito,
emi ogwu òrere ibot mun̄ ugwem;
ema mîsi irọkọ udọn̄ mun̄ echi ubọk kiban̄,
udọn̄ mun̄ òbabak,
echi ìkpokọt itet mun̄ geege ikaan̄.
Inu ijo inu osabe ijet ebi Ijeren
14 “Ìre Ijeren ìre usun̄? Ìre eman ọmọ me uwu usun̄?
Keke orọ îkanabe ogwu ekifufum inu kan̄?
15 Bọn egbe àtat mêkigbin igọọk ọmọ,
mêkigọt me lek kan̄.
Ebi ochicha chi mîjijaka ijọn̄ kan̄ ikana èwê;
mîwọp ama kan̄ geelek iriọk, ama cha oyayat ita kpai.
16 Ofifi kan̄, ebi Memfisb mè ebi Tapenes
mîkwọkọ owu eden̄ ibot irọt.
17 Îre owu gaalek orọ lek kwun̄;
mije ojitbe Okumugwem Awaji kwun̄
mgbọ îkisa owu ije me oniin̄.
18 Mgbọ keyi òsi keke me Ijipiti?
Ìre òbosi inwọ mun̄ ònan̄a me okolo Siyọ?c
Òsi keke me Asiria?
Ìre òbosi inwọ mun̄ ònan̄a me okwaan̄ Yuferetis?
19 Inu ikpak orọbe obosut owu osusut;
ijijit emi itele môkan̄ inu inyi owu.
Eya orọ, riọọn̄ ubọk keek, mè tet ibot:
ibe ke owu itọtọp Okumugwem Awaji kwun̄ ito,
mè okakaan̄ge ukpook kan̄ me emen kwun̄,
ìre atalek ijo inu, mè ire si inu òjajat.
Emi Okumugwem Ogwukaan̄ Inyọn̄ mè Ijọn̄ ntumu.
20 Akarake ujọn̄ọ mgbọ òraraka, owu ofan̄a ọgbọn kwun̄,
mè ifieek mkpọn nsabe igọbọ owu iriaak me lek n̄a.
Owu otumu inyi emi be, ‘Emi m̀kpasi ikwaan̄ inyi owu!’
Ire, me inyọn̄ ogoon̄ geelek òbebene,
mè irak uti geelek òsasan agọọk,
owu gwa òkilaak ikana kubọk ogwu òje oyet.
21 M̀wowop owu kubọk atalek olik gerep,
ònan̄a me lek ukwuuk gerep òrere atata ichit.
Keke orọ okupbe nkwaan̄ nkwaan̄ me isi n̄a
kubọk gerep oron?
22 Ikerere òsasa akanwen̄ ikwuk lek,
mè isa owuwa ìsabi igwọk lek,
akpat ijo inu kwun̄ ọmọ òwa si me isi n̄a.
Emi Ogwukaan̄-ene Okumugwem ntumu.
23 Òjeje ikitumu ibe, ‘Emi ǹkafifila lek n̄a;
ǹkasisi lek ebi kè Baali cha’?
Kpọ ijo ugwem olukbe me emen iteke,
mè sa eya keek inu orọbe.
Owu òbet lek uman aligọ òfefet ukot,
eyi òkilibi ikana ere;
24 mè ibet lek uman inyinya akpan
oron òluluk me emen èwê ibọkọ lek,
eyi òkigween̄ efet igban̄ olu orie, mgbọ ulọk isibene me lek.
Mgbọ ulọk iweweek orie isinin̄ me chieen̄,
kpunu ogwu òbokọt ikeke ikwek.
Mgbọ òkup ikeya, orie geelek
òweweek ọmọ, ikasisaak lek;
mgbọ itotoon̄ lek kiban̄ isire, mômun̄ lek kan̄.
25 M̀be owu, ‘Kalibi ekot ìgwak
ikpukot ìsan̄a me ukot ìgọọk mkpọmfaka,
kararak si ebek ìkup ìkigọọk mkpọmfaka.’
Ire, owu obebe, ‘Kpunu ibot!
Mma ofifi awaji cha,
echicha ke mbagọọk.’
26 “Ike esip okitet ogwu inọ mgbọ etetbe,
ikeya ke esip otet ebi uwu kè Ijeren;
ema mè ebi ubọọn̄ kiban̄ mè ebi ibot kiban̄,
mè ebi ngwugwa kiban̄ mè ebi nriran kiban̄.
27 Ema ekitumu inyi uti ibe, ‘Owu ore nte n̄a,’
mè ikitumu inyi ewuuk ibe, ‘Owu oman emi.’
Ema ejijit emi itele,
kpeyaka isi ida emi;
ire, ufialek isitet ema, ema mîra ibe emi,
‘Na na nyan̄a eji!’
28 Awaji cha enyi erombe inyi lek kinyi ìsi owa?
Ema enan̄a ekeke ma enenyan̄a enyi,
ire ema ikọt!
Enyi ebi Juda, otu ifuk awaji enyi ekaan̄be
ìre ìkike melek otu ifuk ama kinyi.
29 “Keke orọ enyi ekitoon̄ emi ikọ?
Otutuuk kinyi mîfieek inan̄a emi me lek.
Emi Okumugwem ntumu.
30 Osusut nsutbe bọn kinyi ìchechep,
ema kpechieek ibe enen̄e ema esun̄ etat.
Oge akọn̄ kinyi îrie ebi nriran kinyi isan̄a,
kubọk egbe àtat ogwak anam iche.
31 “Enyi ebi ukot keyi, ìgban̄ ikọ Okumugwem ma!
“Ìre èwê ke emi nkana me isi kinyi ebi Ijeren ni?
Sà ìre ijọn̄ ikpele udun onin̄be ke emi nkana?
Keke orọ ebi n̄a ekibe, ‘Eji mêkọt inin̄ ere òneme eji;
eji kpebeyaka inu me lek kwun̄ ofifi?’
32 Ìre gwun̄ nsabọn ibaan̄ môkọt iwuuk inu mbala-lek kan̄?
Sà ìre aya nwa môkọt iwuuk ofọnti ido-nwa kan̄?
Ire, ebi n̄a mîwuuk emi,
mè iwuuk emi ijọn̄ọ mgbọ enenen.
33 Enyi mîriọọn̄ chieen̄ iweweek ugan;
ikerere ebibaan̄ ìfefieek ichit, mêkọt ikween̄ inu me ubọk kinyi.
34 Eje ebi ugbọọn̄ ebi ekalọge inu geege
ìjojot me lek ofọnti kinyi,
ubọk geelek ibe ke enyi kpetetet ema
mgbọ ekibum inin̄ uwu ichiin̄ inu.
Ire, me lek inu chi geelek,
35 enyi ekitumu ibe, ‘Kpunu eyi eji erọbe ilọ,
Awaji ìkayaka ìnaan̄ ejit ìnyi eji.’
Kpọ, mânigwen enyi oyerebet,
mije enyi ekitumu ibe, ‘Eji kperọ ijo inu geege.’
36 Keke ke enyi ekinya ikana ikeyi ikiweek ntap-ubọk,
mè ikisiki irek kinyi?
Ebi Ijipiti mêtọbọ enyi ilọ,
ike ebi Asiria etọbọbe enyi ilọ.
37 Enyi mêyaka si ubọk iba itoon̄ me ibot,
mè isa isi esip igwu ikom isibi me ere ya,
mije, emi Okumugwem njit ebi enyi esabe itoon̄ ejit cha;
kpunu ata inu geege enyi ebekaan̄ me ubọk kiban̄.”