3
Okumugwem ìtumu ibe ikeyi, “Ire enerieen̄ ijit ogwu nwa,ogwu enenwaan̄ ya onanan̄a isi ibat ofifi enerieen̄,
ìre ogwu enerieen̄ ya môkpọk
igwu ikom ifo lek ogwu enenwaan̄ ya si?
Ìre eya kporọ ibe otutuuk lek ijọn̄ ififila ni?
Ire, owu oluk ugwem òje oyet melek owuwa ugan.
Ìre owu môyaka igwu ikom
inu me lek n̄a mgbọ keyi ni?
2 Bene chieen̄ kpọ-nu inyọn̄ ogoon̄ ǹlak ibot cha,
ìre îkaan̄ ere ge òsisik eyi kpelaak owu me ere ya?
Owu òkikup me agba oniin̄ iban ebi ugan kwun̄,
kubọk ogwu Arabu okikup me
emen èwê ifum uji ekpirikpo.
Owu osa ukot òje oyet kwun̄ mè inu ikpak okirọ
ififila lek ijọn̄ yi isan̄a.
3 Eya orọ etetbe ibot ikaan̄,
ibot aya otu ura si, ìkarep.
Ire, isi kwun̄ ìkup kpọi kubọk isi ogwu òje oyet,
kpunu kubọk esip ge ikeyi.
4 Mgbọ yi, owu gwa òkigwen emi ibe,
‘Nte n̄a, ogwu une n̄a karake ijija n̄a,
5 ìre owu mônaan̄ ejit ire mgbọ geelek ni?
Ìre owu môtet unaan̄-ejit ikaan̄
isi ire mgbọ ikakaan̄ge itata ni?’
Ubọk otu kwun̄ okigwat ire eya,
ire, owu okekirọ otutuuk ijo inu geelek okọtbe.”
Ebi Juda mîgọọk ebi Ijeren irọ ijo inu
6 Me ukot mkpulu ogwu ubọọn̄ Josaya, Okumugwem îtumu inyi emi ibe, “Ìre omun̄ inu Ijeren ogwu òjijit emi itele orọbe? Ijeren ìnenene inyọn̄ orioon̄ geelek òbebene, mè inin̄ irak uti geelek òsasan agọọk, ikisi ije ugan. 7 Emi ǹkikeek ibe ke ọmọ isirọ otutuuk inu îrọbe cha isan̄a, ke môgwu ikom ika igọọk emi. Ire, ìkanu. Juda, ngwan̄ kan̄ enenwaan̄, ogwu ikagbege utoon̄-ejit si, omumun̄. 8 Juda îmun̄ si ibe ke njit Ijeren ogwu òjijit emi itele, mè itap Ijeren ikpa iyaak olom me ubọk, mè irieen̄ ọmọ isibi mije ugan-nwa kan̄. Ire, mmun̄ ibe ke Juda ngwan̄ kan̄ enenwaan̄ ya, ogwu ikagbege utoon̄-ejit, ìkatet ukpook. Isisibi si isi ikije ugan eyi kan̄. 9 Ijeren ìkasa barabat kan̄ ìgwen inu geege, eya orọ îbubatbe isi ikitọbọ ebum inyi ewuuk melek uti, mè isa me ikeya ififila lek ijọn̄ yi. 10 Me lek otutuuk inu kechi, Juda ngwan̄ kan̄ enenwaan̄ ogwu ikagbege utoon̄-ejit okekirọ inu ofiaan̄ ofiaan̄ me lek n̄a, ìkasa me otutuuk ejit kan̄ ìgwu ìkom ìgọọk emi. Emi Okumugwem ntumu.”
11 Okumugwem otutumu inyi emi ibe, “Ijeren ogwu òjijit emi itele îkaan̄ ata irọrọ igak Juda ogwu ikagbege utoon̄-ejit. 12 Je, si look etip keyi me agan̄ inyọn̄ ibe ke Okumugwem ìbe,
“Owu Ijeren, ogwu òjijit emi itele, gwu kom na,
ke emi m̀kpayaka ikpọk inaan̄ ejit inyi owu;
emi ìre ogwu ata ejit,
emi m̀kpanaan̄ ejit ire mgbọ ikakaan̄ge itata.
13 Gaalek, riọọn̄ ibe ke owu orọ ijo inu,
riọọn̄ ibe ke owu orọ
Okumugwem Awaji kwun̄ ilọ;
ke owu òkisi ima awaji ebi ofifi
ife me irak uti geelek òsasan agọọk;
riọọn̄ ibe ke owu òkagban̄ ida n̄a.
Emi Okumugwem ntumu.
14 “Enyi ebi ìjijit emi itele, emi Okumugwem ǹkitumu inyi enyi ibe, ‘Ìgwu ìkom, mije, emi nre nlom kinyi. Mâgobo enyi ene ge me ama ge, mè ene iba me otoko ge, mè isa enyi ika inu Sayọn. 15 Mânyi enyi ebi mkpulu ebi ejit n̄a okupbe me lek. Ema mêsa ifuk-ibot mè ngobo-ntet ikikpulu enyi. 16 Usen cha isire, mgbọ enyi isimumana, mè iwa enenen me inyọn̄ ijọn̄ yi, ebi ene kpebeyaka ikitumu ikọ ibak okop inyan̄a-ibot Okumugwem mgbọ ukot ikaan̄ ya. Ìkponinin̄ ema me ejit, ema kpebekekeek si inu ofolek, kpebeweweek si, kpeberorom si ofifi. Emi Okumugwem ntumu. 17 Mgbọ ya, mêkigwen Jeruselem, Ogboon̄ Ubọọn̄ Okumugwem. Otutuuk ebi ido geelek mênu inititiin̄ me Jeruselem ikimin erieen̄ Okumugwem. Ema kpebeyaka igọọk unye-ibot ya eyi ejit ijo inu kiban̄ okitọ inyi ema. 18 Me mgbọ cha, ebi uwu kè Juda me ebi uwu kè Ijeren mêgbaan̄ inan̄a me lek ijọn̄ agan̄ inyọn̄ ika inu me lek ijọn̄ nnyibe ebi nte nte kinyi me ìrot.’
19 “Emi me lek n̄a ntumu ibe,
“ ‘Me atikọ, mâmọnọ enyi kubọk bọn ebirieen̄ n̄a,
mè inyi enyi ijọn̄ òkilọk ene ya,
òrere ìrot òjajaan̄ ichit me
lek ìrot ebi ido geelek ekaan̄be.’
Emi ǹkikeek ibe ke enyi mêgwen emi nte kinyi,
ke enyi kpebeyaka igwu ikom inan̄a itele emi.
20 Ire, enyi ebi uwu kè Ijeren, enyi mîjit emi itele,
kubọk enenwaan̄ barabat
ikagwuun̄ge isi me lek ogwu olom.
Emi Okumugwem ntumu.
21 Ida ito ebi Ijeren òkitaan̄ me
inyọn̄ ogoon̄ ǹlak ibot cha,
ema mêkito ito, mè ikiriaak emi,
mije, ema mîje ilọ oniin̄,
mè iwuuk Okumugwem Awaji kiban̄.
22 “Ìgwu ìkom, enyi ebi ìjijit emi itele;
mâgwa enyi, inyi enyi ekayaka ìjit emi ìtele.”
Ema efọfọọk ibe, “Iin̄, eji ba mêkinu me lek kwun̄,
mije, owu ore Okumugwem Awaji kiji.
23 Me atikọ, ebum eji ekitọbọ me inyọn̄ orioon̄ cha ìre ikike,
okput eji ekikput me inyọn̄
ogoon̄ cha ìre ofiaan̄ ofiaan̄.
Me atikọ, unyan̄a ebi Ijeren
ìkup me ubọk Okumugwem Awaji kiji.
24 Bene me ijija kiji,
inu esip ya îrie otutuuk ubọk
ikwaan̄ ebi nte nte kiji isan̄a kpai,
îrie urum eriembuuk mè urum arọọn̄ kiban̄,
mè irie si bọn kiban̄ ebirieen̄ mè ebibaan̄.
25 Kè eji esiki elaak me emen esip kiji,
mè esa esip cha ekana echit lek.
Eji mîrọ Okumugwem Awaji kiji ijo inu,
eji melek ebi nte nte kiji.
Bene me ijija kiji mege inire chereyi,
eji kpegban̄ utọn̄ inyi Okumugwem Awaji kiji.”