4
Okumugwem onenibe, “Enyi ebi Ijeren, ire enyi ibegwu ikom inu,ìgwu ìkom ìna me lek n̄a.
Ire enyi isan̄a mkpọmfaka òchichaka inu
kinyi cha isan̄a me chieen̄ n̄a,
mè kpeyaka ije ilọ emi ukot,
2 ire enyi isa me atikọ mè unen
mè ata irọrọ inyan̄a ibot ibe,
‘Kè lek ugwem Okumugwem,’
ebi ofifi ido mêkaan̄ ugbana inan̄a me lek n̄a,
mè isa emi ibaan̄ alọm.”
3 Okumugwem ìtumu inyi ebi Juda mè ebi Jeruselem ibe ikeyi:
“Ìgbọ ijọn̄ uko kinyi echi kpegbọ-nu cha,
mè ikayaka ìwop inu me emen ukpak.
4 Enyi ebi Juda mè ebi Jeruselem,
ìsun̄ inyan̄a-ibot kinyi melek n̄a,
Okumugwem Awaji kinyi,
mè ìsan̄a unye-ejit òkup enyi me ejit ìsan̄a,
inyi uyok uyok unaan̄-ejit n̄a ikada ìgwook enyi me lek,
mè ìsak kubọk ukan̄,
eyi kpunube ogwu òbokọt iniin̄,
mije ijo inu enyi erọbe.
Ùrioon̄ òkinan̄a me agan̄ inyọn̄ inu
5 “Ìtumu ìsibi me Juda, mè ìlook me Jeruselem ibe:
‘Ìwut otita ìkana ìso otutuuk inyọn̄ ijọn̄!’
Ìtaan̄ ukpo ìtumu ibe:
‘Ìgbaan̄ lek kinyi ìtitiin̄!
Ìna mè eji elibi efon ama echi òkakaan̄ mgban akọn̄!’
6 Ìbene egop ulook ìnyi otutuuk ene ibe eje efon Sayọn!
Ìlibi ìsi ìlet lek, ikafiat mgbọ!
Mije, emi gwa ǹkisa ùrioon̄ me agan̄ inyọn̄ inu,
òrere mfufiat òmimin enenen.”
7 Egbe àtat îsibi me okpot kan̄ inu;
ogwu òkichep ido îjibi ije.
Înan̄a me ama kan̄ ikinu,
ìbonijijaka ijọn̄ kinyi igwook.
Môjijaka ama kinyi ikana ǹrioon̄,
ene geege ìkpoyaka iluk me emen.
8 Eya orọ, ìtap ofọnti ufieejit,
ìfieek ejit, mè ito ito,
mije, uyok uyok unaan̄-ejit Okumugwem,
ìkanan̄a-nu ìtele eji.
9 Okumugwem ìbe, “Me usen ya,
ejit ogwu ubọọn̄ mè ejit ebi ibot ìkpoyaka inye;
ukpook môtap ebi ngwugwa utọọk igak emen,
mbiribọ môgwogwook ebi nriran me lek.”
10 Emi nnenitumu ibe: “A-a! Ogwukaan̄-ene Okumugwem, kpọ ubọk owu ofiaan̄be ife chi, mè ifiaan̄ si Jeruselem isan̄a kpai. Owu òtumu inyi ema ibe, ‘Enyi mêkaan̄ esuuk.’ Ire, oge akọn̄ oyaka ininin̄ imeen̄ ema ire ebek.”
11 Me ike mgbọ ya, mênenitumu inyi ife chi, mè itumu si inyi ebi Jeruselem ibe: “Uyok efet mônan̄a me inyọn̄ ǹlak ibot ogoon̄ me emen èwê iwut igwook me lek ebi n̄a. Ìkabore ata efet òkiniwut mfufe isan̄a me lek akpa, mè ikirọ inyi lek akpa itana. 12 Efet keyi ònan̄a me ubọk n̄a înye enenen igak eya. Mgbọ yi, nra ifieek oyerebet itip ema.”
13 Ìkpọ, ogwu ochicha òkijibi inu kubọk oduku inyọn̄;
ogbogbo uji akọn̄ kan̄ mêkinu kubọk ogbolodom;
inyinya kan̄ cha îgwat igak igo.
Jei, môfieek inyi eji! Eyi kiji îta!
14 Jei Jeruselem, gwọk inu ikpak san̄a me ejit kwun̄,
inyi enyan̄a owu.
Mgbọ owa ke owu oboben ijo ekiket me ejit ire ni?
15 Ida ge òkitaan̄ me Dan,
ìkup me inyọn̄ ogoon̄ Iferem ikilook etip ufialek.
16 “Ìkpa ìnyi ebi ido geelek,
mè ìlook me Jeruselem ìbe ikeyi:
‘Ebi akọn̄ ìkikpa mbin akọn̄
mêkinan̄a me ujọn̄ọ ere inu,
mêkitaan̄ ukpo itiki akọn̄
ikeme ama ebi Juda geelek.
17 Ema mîkeke ikana Jeruselem
okokop kubọk ebi ìkibem uko,
mije, ebi n̄a mînye ibot inyi emi.
Emi Okumugwem ntumu.’
18 Oniin̄ ugwem kwun̄, mè ubọk irọ-inu kwun̄
osa inu keyi ijet owu.
Osusut kwun̄ ire eyiyi.
Îjat enenen!
Îchim owu itibi ire lek ekpọọk ejit!”
19 Jei, unan! Unan!
Owot òkiyọọk emi!
Ufiak îmin emi me emen ejit enenen.
M̀kpakọt iriaan̄ ere,
mije, nnọ ida otita akọn̄,
mè ida okput akọn̄ okitaan̄.
20 Mfufiat ge ìkigọọk ge;
mîjijaka otutuuk lek ijọn̄ isan̄a kpai.
Chieen̄ chieen̄, mîgwak uwu ọfọ n̄a igwook,
mè ifiat atanga n̄a mgbọ yaage.
21 Kpa mgbọ ke mbamun̄ egop akọn̄ ire,
sà ìre kpa mgbọ ke mbanọ ida otita akọn̄ iyaka?
22 “Ebi n̄a ìre mbubut;
ema kperiọọn̄ emi.
Ema ìre nsabọn tuntun;
kpekaan̄ ngobo-ntet.
Iriọọn̄-inu kiban̄ ìre gaalek eyi ekisa irọ ijo inu,
ema kperiọọn̄ ubọk ekirọ ata inu.”
23 Nkana chieen̄ ikpọ linyọn̄,
ìkup ukpọk ukpọk, ìkabet lek inu geege;
mbene chieen̄ ikpọ isinyọn̄,
utoon̄ òkikup me akpa isinyọn̄, kpunu.
24 Nraan̄ chieen̄ ikpọ ebi kè ogoon̄,
otutuuk kiban̄ mêkisisik;
otutuuk orioon̄ geelek mêkinyinyọn̄ọ.
25 Mkpọ ikana, ǹkamun̄ ebilene geege;
otutuuk unọn òwulu me inyọn̄ îwulu inan̄a isan̄a kpai.
26 Nsiki chieen̄ ikpọ lek ijọn̄, ata ijọn̄ uko ya îkana èwê,
otutuuk ama òkup me ere cha îjijaka igwook,
mije Okumugwem oyakabe isi ida ema,
mije unaan̄-ejit kan̄ okiyok me lek kiban̄.
27 Mije, Okumugwem ìtumu ibe ikeyi:
“Mâjijaka otutuuk lek ijọn̄ igwook,
ire, m̀kpajijaka isan̄a isi ge.
28 Eyi môtap ufieejit me lek ijọn̄,
mè irọ ibe akpa isinyọn̄ idun,
mije, nra itumu isan̄a, m̀kpanwene ejit;
nra itumu ifieek, m̀kpagwu ikom.”
29 Isinọnọ okput ebi akọn̄ inyọn̄
inyinya mè ebi ìsook oraan̄,
ebi ama geelek mêlililim ita kpai.
Usini ene mêlim ichieen̄ me ekpuk oron;
usini ene mênene ifo inyọn̄ ewuuk.
Otutuuk ama môyat ita kpai,
kpunu ene geege òboluk me emen kiban̄.
30 Owu Jeruselem ogwu ejijakabe, òkirọ keke?
Keke orọ osabe ekwut irio irio ibala lek,
mè isa asi alata araran̄ iken lek?
Keke orọ otapbe tori ikpan̄ chieen̄?
Mbala-lek kwun̄ ìchechep ikike.
Ebi òma kwun̄ ekikpọkpọ owu chieen̄ isiki;
ema ekiweweek ebek ugwem kwun̄.
31 Nnọ ida ukpo okitaan̄, kubọk ida enenwaan̄ uman okitet,
mè mfi òbet lek mfi ogwu
enenwaan̄ òkiman adasi gwun̄ kan̄.
Îre ida ama Jeruselem òkisa me lek ifufuuk efuuk,
mè ikinyinyan ubọk iba kan̄, ikibe,
“Efuuk îlet emi, mânigak iweek,
ebi ìkpan̄ ene mîkana emi okokop.”