Ikpa Asaya ìre ikpa ikọ nriran echi Okumugwem otumube inan̄a me otu ikpele ogwu nriran Asaya inyi ebi Juda, me ukot ebi ubọọn̄ ini, ìrere Ujaya, mè Jotam, mè Ayaji, mè Ejikaya. Esa erieen̄ kè Asaya, eyi òsisibi, “Okumugwem ore unyan̄a,” igwen erieen̄ ikpa yi.

Etip òkup me emen ikpa yi ìkup irek ita. Adasi irek (ibot 1-39), ìtumu ikọ ofolek mgbọ ebi Asiria ebenitim akọn̄ ibọkọ ido Juda. Asaya otataba ubọk me utọn̄ ebi Juda mè ebi ubọọn̄ kiban̄, ibe eluk ugwem me ata irọrọ mè unen oyerebet, ire ìkare ikeya ke Awaji môsa ùrioon̄ inikeme ema.

Me emen adasi irek ikpa yi si, Asaya îben nriran ofolek mgbọ ònu me isi, mgbọ mêmanbe gwun̄ ge, me owot iman kè Debit, ogwu òbonire ogwu ubọọn̄, mè ikikpulu otutuuk linyọn̄ me esuuk melek ata irọrọ. Nriran yi îrọ iso me lek Okaan̄-ene, Jisọs Karais.

Òso irek iba (ibot 40-55), ìtumu ikọ ofolek mgbọ owuwa ebi Juda ekupbe me usun̄ akọn̄ me Babilọn, kpeyaka ikaan̄ ikpọchieen̄ geege. Asaya obeben nriran inyi ema ibe ke Okumugwem môsan̄a ema isibi me usun̄ akọn̄, mè isa ema ika inu Jeruselem, inyi ema enebene eluk ayaya ugwem. Ge me lek ikpele ibot ikọ òkup me ere yi ìre ke inu ge me emen nkeek Awaji okaan̄be inyi ebi kan̄ ebi Ijeren ìre ke otutuuk ebi linyọn̄ mêkaan̄ ugbana inan̄a me lek ebi Ijeren.

Me emen òso irek iba yi si, Asaya îben nriran òfo me lek Gwun̄ Ikwaan̄ Okumugwem, ogwu òbonibọkọ ukwook me ibot otutuuk ebi linyọn̄. Nriran keyi si îrọ iso me lek Okaan̄-ene, Jisọs Karais.

Òso irek ita (ibot 56-66), ìtumu ikọ ofolek mgbọ ebi Juda enan̄abe me usun̄ akọn̄ ika inu me ido kiban̄ melek ama Jeruselem, mè ikiweek ukarajit ibe Awaji môrọ otutuuk use îchieekbe ido kiban̄ iso. Asaya îtaba ema ubọk me utọn̄ ofolek irọrọ ata irọrọ, mè unen oyerebet, mè isusun̄ Usen Mbuban, mè igwagwa ngwugwa, mè irariaak uriaak. Okumugwem ochechieek use ibe ke inu môje ijaan̄ me mgbọ ònu me isi me lek ebi geelek ìgbegbe utoon̄-ejit me lek kan̄, me lek ebi Ijeren, mè lek ebi ofifi ido.

Ere ge me lek ere òkirọ ikọ yi inye ìre ibot 61:1-2, eyi Okaan̄-ene Jisọs osabe itumu ikọ me Najeret me ibebene ikwaan̄ kan̄.