Asaya
1
Ilaak ọkpọchieen̄ eyi Asaya gwun̄ kè Amọs omun̄be ofolek Juda mè Jeruselem me ukot mkpulu kè Ujaya, mè Jotam, mè Ayaji, mè Ejikaya, ebi ubọọn̄ ido Juda.Awaji îkan̄ inu inyi ebi kan̄ ìtetele ọmọ
2 Akpabin inyọn̄, nọ! Linyọn̄, gban̄!
Mije, Okumugwem îtumu ikọ. Ìtumu ibe ikeyi:
“Emi mbọọk nsabọn imiin̄, mè ikpukpo ema isibi,
ire, ema efefieek inan̄a ikisi irọ ikeme emi.
3 Eriembuuk îriọọn̄ ogwukaan̄ kan̄;
inyinya akpan îriọọn̄ okwa anam ogwukaan̄ kan̄;
ire, ebi Ijeren kperiọọn̄ inu emi nkirọ inyi ema;
ebi n̄a kpegobo itet.”
4 Jei, ido ebi ijo irọrọ,
ebi nrọ-nlọ otutọmọbe me ibot;
owot iman ebi ìrọ ijo inu,
nsabọn ìfafiat isan̄a kpai!
Ema mîjit Okumugwem itele;
mîkpọ Ogwu Mbuban ebi Ijeren ilọ chieen̄,
mè igba udun̄ kiban̄ ifit ọmọ.
5 Keke orọ mêkpọkbe isulu enyi osusut?
Keke orọ enyi ekpọkpọ ikifo isi ikije ikeme emi?
Ìkpọ, otutuuk ibot kinyi, unan unan,
otutuuk ejit kinyi, ufiak ufiak.
6 Bene me akajit ukot kinyi si re ibot kinyi,
kpunu ere geege òkup me utelelek,
otutuuk ere, unan mè nlilip mè inya òkidun̄u olu ojot,
kpegwọk, kpebọp,
kpegwogwook si aran̄ me lek, inyi isuuk ufiak.
7 Ido kinyi îyat isan̄a kpai,
ama kinyi îtaka ita me ukan̄;
me ofọọk-chieen̄ kinyi,
ebi ofifi ife mêkitet enyi ijọn̄ uko
kinyi ibọkọ isan̄a me ubọk,
mè ijijaka isan̄a,
kubọk ama ebi ichen etimbe akọn̄ igbugbọ igwook.
8 Sa me ikeya, ama Sayọna ìyaka inikup ikeya,
kubọk atanga òkeke me uko gerep,
mè ikup kubọk uwu nlak òkup me emen uko obọkọbọk,
mè ikup si kubọk ama ekpabe mbin akọn̄ ikana.
9 Mebe Okumugwem Ogwukaan̄ Inyọn̄ mè Ijọn̄
ìkatele ibe ene inen mè inen ekwaan̄ esik enyi eji,
kè eji ekana ekup kubọk Sodọm,
mè èkup si kubọk Gomora.
10 Ìnọ ikọ Okumugwem,
enyi ebi mkpulu Sodọm!
Ìgban̄ Ikan Awaji kiji,
enyi ebi Gomora!
11 Okumugwem ìbe, “Ogbogbo ngwugwa kinyi cha,
ìre ìkup me lek keke inyi emi ni?
Ǹkayaka ìdo ngwugwa ewọwọp iriọk kinyi cha,
mè ìre echi orie arọọn̄
mè echi okpọn̄ anam egwookbe imiin̄ ufuk cha.
Eje ebi kè eriembuuk mè orie arọọn̄ mè ebot cha,
ìkayaka ìneme emi ofifi.
12 Mgbọ enyi ekinu me isi n̄a inikeke,
ìre ekene okibe enyi enu?
Sà ìre ekene obe enyi
enekejak ukot me oyet egep n̄a?
13 Ikayaka ìkpọk ìsasa ngwugwa kinyi cha
ikasibige inu geege ìnu me isi n̄a!
Nsensi kinyi cha ìre filafila inu me lek n̄a.
Ijọk Aya Onyan̄ kinyi, mè Usen Mbuban,
mè ntitiin̄ mbuban enyi ekinin̄ me usen ijọk cha,
emi ǹkayaka ìdo.
Otutuuk ntitiin̄ mbuban kinyi cha geelek,
ere enyi ekikup ikirọ ijo inu,
emi m̀kpayaka ikọt ibọkọ itap ofifi.
14 Ijọk Aya Onyan̄ mè otutuuk
esese chieen̄ ijọk kinyi cha geelek,
îjọ emi ejit.
Ema mîkana ufialek inyi emi,
efuuk îta emi me owot ibebeme ema.
15 Enyi isikiwele ubọk kinyi ikiriaak uriaak,
m̀bakidadaan̄ chieen̄ n̄a isan̄a enyi me lek;
ikerere enyi erariaak uriaak ijot ijọn̄ gbodoi,
emi m̀kpabanọ.
Otutuuk ubọk kinyi, eje ene eje ene ojot.
16 Ìgwọk lek kinyi, ìrọ inyi lek kinyi itana!
Ìben ijo irọrọ kinyi ìsan̄a emi me chieen̄!
Ìtele nlilọ inu;
17 ìkween̄ irọrọ ata inu!
Ìweek unen oyerebet,
mè ìgana ikọ ìnyi ogwu òkitutuku ene!
Ìgbini unen ebi kpà-nte,
mè ìtumu ikọ ibot ebi nwakpa.”
18 Okumugwem ìbe, “Ìna ma, inyi eji enegbaan̄ ibot esọk,
ikerere ibe ke ijo kinyi ìnin̄ ikup eje eje,
mêgwọk ema itana okuket kubọk abalara;
ikerere ema eninin̄ ikup araran̄,
ema mêtana ikup kubọk okuket inwọọn̄ anam.
19 Ire enyi ichieek, mè isiki ibot,
enyi mêrie ata inu ijọn̄ yi môsan̄abe isibi.
20 Ire, ire enyi ijit, mè inye ibot,
oge akọn̄ môrie enyi isi ichak.
Emi Okumugwem nsa otu n̄a gaalek itumu.”
21 Kpọ ubọk ama etoon̄be ejit me lek oyakabe inikana ikup,
kubọk enenwaan̄ òje oyet!
Me adasi mgbọ, unen oyerebet ìjojot emen kan̄,
ata irọrọ si oluluk me emen kan̄;
ire, me mgbọ keyi, ebi ìkpan̄ ene ebi ìkpan̄ ene ekiluk.
22 Alata okuket kinyi îkana ifin,
ata utop miin̄ kinyi cha, mîsa mun̄ iwọlọ ikpan̄.
23 Ebi ibot kinyi mîfieek inan̄a ikisi irọ ikeme emi,
mè ikana isi inin̄ ogbo melek ebi inọ;
ema otutuuk ene ekima ikpoko udun̄,
mè ikilibi igọọk mkpukpe.
Ema kpeyaka ikigbini unen ebi kpà-nte;
ikọ ibot ebi nwakpa ìkayaka ìkinu me isi kiban̄.
24 Eya orọ, Ogwukaan̄-ene
Okumugwem Ogwukaan̄ Inyọn̄ mè Ijọn̄,
Ogwu Unye ebi Ijeren ìtumu ibe,
“Emi mânisiki efuuk me ubọk ebi oriara n̄a,
mânirọ ebi ochicha n̄a useen̄ inu ema erọbe emi.
25 Emi mâyaka ubọk n̄a igwook enyi me lek,
mâchimi enyi isibi ifin me owot kubọk ekikala oporolo,
mè isan̄a otutuuk okpa òkup enyi me lek isan̄a.
26 Mâyaka ebi oyerebet kinyi
inyi enyi kubọk îkupbe me adasi,
mè iyaka si ebi nteme kinyi
inyi enyi ubọk îkupbe me ibebene.
Me mgburudun̄, mênenikigwen owu Ama Ata Irọrọ,
mè Ama Etoon̄be Ejit me lek.”
27 Sa me unen oyerebet ke mêfaka Sayọn isibi;
sa me ata irọrọ ke mêfaka ebi kan̄ ìgwugwu ikom isibi.
28 Mêgbaan̄ ebi ikpak mè ebi ijo irọrọ
ikpukpuku isan̄a mgbọ ge,
ebi geelek ìtetele Okumugwem mêkwaan̄ ita kpai.
29 “Uti ilip mbuban kinyi cha enyi ekinwọọn̄,
môkana inu esip inyi enyi;
emen àwa cha òkitop enyi me lek,
môkigwook enyi esip ichit isi.
30 Enyi mêkup kubọk uti ilip inwan̄ ochiaakbe ita me ibot,
mè uko ikakaan̄ge mun̄ me ijọn̄.
31 Ogwu unye oguga môkana mfurufu,
ubọk ikwaan̄ kan̄ môkana alọm ukan̄,
ọmọ melek ubọk ikwaan̄ kan̄
mêgbaan̄ itaka iriọk me ukan̄,
eyi kpunu ogwu òbokọt iniin̄.”