Awaji îgwen Asaya
6
Me emen acha ogwu ubọọn̄ Ujaya okwube, mmun̄ Ogwukaan̄-ene okweekbe irek me inyọn̄ ubene ubene ogboon̄ ubọọn̄ eyi ejibibe ibene ifo inyọn̄, edim ofọnti kan̄ owewele ichit emen Uwu Mbuban. 2 Ebi osat serafu ekekiwulu igba iyak me inyọn̄ me ibot kan̄, ema geelek ekaan̄ uwop gweregwen gweregwen. Uwop iba ke ema esa ichit isi kiban̄, mè isa iba ichit ukot kiban̄, mè ikisa iba iwulu. 3 Ema ekekitumu inyi lek kiban̄ ge ge ikibe,“Mbuban! Mbuban! Mbuban!
Okumugwem Ogwukaan̄ Inyọn̄ mè Ijọn̄ ìkup mbuban!
Ujamgbugbo kan̄ ìjojot
otutuuk linyọn̄!”
4 Okput ida kiban̄ okekisisik otutuuk ọdọ Uwu Mbuban melek inyọn̄ isotu geelek òkup me lek uwu ya, oduku okpọkpọ iduku ichit emen uwu ya.
5 Emi ntataan̄ ukpo ibe, “Jei! Nchep! Eyi n̄a îta! Mije, emi ìre ogwu ukpọk-otu ikatanage. Ǹkiluk si me etete ebi ukpọk-otu ikatanage. Eyi n̄a îta, mije, chieen̄ n̄a îrieen̄ me lek ogwu Ubọọn̄, Okumugwem Ogwukaan̄ Inyọn̄ mè Ijọn̄!”
6 Ge me lek ebi serafu cha owuwulu inu me lek n̄a, mè ikaan̄ mbubuk ukan̄ òreren̄e me ubọk. Ìsasa otu-ucha ilọbọ mbubuk ukan̄ ya me inyọn̄ ntook ngwugwa isa inu. 7 Inenisa mbubuk ukan̄ ya inichak me lek otu n̄a, mè ibe, “Kpọ, mbubuk ukan̄ keyi îchak me lek otu kwun̄, mîben nrọ-nlọ kwun̄ isan̄a, mè irọ esuuk me ibot ijo inu kwun̄.”
8 Nneninọ si ida Ogwukaan̄-ene okibe, “Ìre ekene ke mbaria? Sà ìre ekene obosi inyi eji?”
Emi mbebe, “Kpọ emi gwu! Ria emi!”
9 Inenitumu ibe, “Je si tumu nyi ife chi ibe,
“ ‘Ìkpọkpọ ìkinọ ikọ n̄a, ire, ikakigobo ìtet;
ìkpọkpọ ìkimọọn̄ inu nkirọ, ire, ikakiriọọn̄.’
10 Rọ inyi ejit ife chi inye,
mè utọn̄ kiban̄ ilobo, mè chieen̄ kiban̄ ichit;
inyi ema ekasa chieen̄ kiban̄ ìmọọn̄ inu,
mè ìsa utọn̄ kiban̄ ìnọ ikọ,
mè ìsa ejit kiban̄ ìgobo inu ìtet,
mè ìgwu ìkom,
inyi egwa ema ejomo.”
11 Emi nnenido ibe, “Ogwukaan̄-ene, ìre inu yi ìbokup ikeyi ire kpa mgbọ?”
Ifọfọọk emi ibe, “Mege ire mgbọ
ama geelek môyatbe ikana ukpọk ukpọk,
ene ge ikeyi ìkpoyakabe iluk me emen;
mgbọ uwu geege ìkpoyakabe ikaan̄ ene me emen,
mgbọ mêjijakabe otutuuk ijọn̄ uko geelek igwook,
12 mege Okumugwem môsan̄abe ebi ene isan̄a ijọn̄ọ ere,
ere eyatbe itele me lek ijọn̄ ya môneniwa.a
13 Ìrere irek ge me lek akọp irek
gaalek osik me lek ebi ife cha,
mêkpọk inu iniwọp ema iriọk.
Ìbokup kubọk uti terebint, mè ìyaka ire ilip,
eyi, isicho ito, ebon kan̄ îra isik me ijọn̄.
Ebon uti ya ore ukwuuk mbuban,
eyi môyakabe ikpọk itibi isibi.”