4 Ogwu ibot isi akọn̄ ya onenibe ema, “Ìsi ìtumu ìnyi Ejikaya ibe, ‘Ogwu ubọọn̄ ilile ya, ogwu ubọọn̄ Asiria, ìkido owu ibe ikeyi: Keke ke owu osa itoon̄ ejit, mè ikinye ejit ikeyi? 5 Ìre òkikeek ibe ke ifuk-ibot akọn̄ mè unye isasa itim akọn̄ ìre ukpọk ukpọk ikọ otu ikike? Ìre ekene ke obieen̄ ejit me lek, eyi owu okikpaka ibot inyi emi? 6 Kpọ, òkibieen̄ ejit me lek ebi Ijipiti, mkpat òyiyip òbubum ya, eyi ogwu ibieen̄ ubọk me lek, òchim ene ya akajit ubọk otap unan. Ikeya ke Fero ogwu ubọọn̄ Ijipiti okup me lek ebi geelek ìbebieen̄ ọmọ lek me lek. 7 Ire otumu inyi emi ibe, “Eji etoon̄ ejit me lek Okumugwem Awaji kiji,” ìre ìkare isi-ijọn̄ kan̄ mè ntook kan̄ ke owu Ejikaya ogbugbọ igwook, mè itumu inyi ebi Juda mè ebi Jeruselem ibe, “Îre isi ntook keyi ke enyi ebekitọbọ ebum”?

8 “ ‘Mgbọ yi, na gọọk nte uwu n̄a, ogwu ubọọn̄ Asiria, fieek ubọk-nu, mè ǹnyi owu obop inyinya iba, mè ekpọ-nu mè ìre owu môkọt ikaan̄ ene iso, ebi ìbekọp inyinya cha. 9 Ire owu òkakọt ìrọ sọntiik inu òkup ikeya, owu òbojeje ikọt irieen̄ ogwu ibot akọn̄ ge me etete ebi ìsisip ichit me lek ebi ibot akọn̄ ogwu nte uwu n̄a ikpebe, ubọk geelek ibe ke owu òtoon̄ ejit ibe ke ogwu ubọọn̄ Ijipiti mônyi owu owuwa uji akọn̄ mè ebi ìkikọkọp? 10 Isan̄a me ikeya, ìre owu òkikeek ibe ke ǹnu inenijijaka ido yi, me Okumugwem ikariọọn̄ge? Îre Okumugwem me lek kan̄ obe emi ǹjibi akọn̄ ǹnu me lek ido yi, mè ǹjijaka ǹgwook.’ ”

11 Eliakim mè Sebina melek kè Jowa enenitumu inyi ogwu ibot isi akọn̄ ya ibe, “Soso, sa usem Aram tumu ikọ nyi eji ebi ikwaan̄ kwun̄, mije, eji mîkinọ usem keya. Kayaka ìsa usem Iburu ìtumu ikọ melek kiji, mije, ebi ìkup me inyọn̄ mgban yi mêkinọ inu okitumu.”

12 Ire, ogwu ibot isi akọn̄ ya ofọfọọk ibe, “Ìre nte uwu kinyi melek kinyi gaalek ke nte uwu n̄a oria emi ibe ǹnentumu ikọ chi ǹnyi? Ìre ìkare si ebi ìkup me inyọn̄ mgban yi, ebi ìberie si ifin kiban̄ mè inwọ anaan̄ kiban̄ kubọk enyi eberie mè inwọ echi kinyi, ke îbe emi ǹtumu si ǹnyi m̀gbaalek?”

13 Ogwu ibot isi akọn̄ ya onanan̄a ikeke, mè isa usem Iburu itaan̄ ukpo itumu ibe, “Ìgban̄ ikọ ogwu ubọọn̄ ilile ya, òrere ogwu ubọọn̄ Asiria, otumube! 14 Ogwu ubọọn̄ ya ìtumu ibe ikeyi: Ikachieek ibe Ejikaya ifiaan̄ enyi ifiin̄. Ejikaya ìkpokọt inyan̄a enyi isibi! 15 Ikachieek ibe Ejikaya irọ ibe enyi etoon̄ ejit me lek Okumugwem, mè itumu inyi enyi ibe, ‘Okumugwem ìkpolọlọ inyanyan̄a eji. Ama keyi ìkponin̄ me ubọk ogwu ubọọn̄ Asiria.’

16 “Ikagban̄ utọn̄ me lek kè Ejikaya. Ogwu ubọọn̄ Asiria ìtumu ibe ikeyi: Ìrọ mgbaan̄-nchieek melek n̄a, mè ìsibi ìna me lek n̄a, ke enyi ene geelek môrie mfut uti gerep kan̄ mè mfut uti figi kan̄, mè inwọ mun̄ ònan̄a me emen udọn̄ mun̄ kan̄, 17 mege ire mgbọ mânube inisak enyi ifo lek ijọn̄ òbet lek ijọn̄ kinyi, ijọn̄ akpa mè aya miin̄, ijọn̄ inorie mè uko gerep.

18 “Ikachieek ibe Ejikaya itumu ikọ inwene enyi ejit ibe, ‘Okumugwem môtaba eji isibi.’ Ǹdo enyi nu, ìre îkaan̄ awaji ebi ido ge òrarak inyan̄a ebi ido kan̄ isibi me ubọk ogwu ubọọn̄ Asiria? 19 Mọmọ awaji ebi Amat mè echi ebi Aripadi cha? Mọmọ awaji ebi Sefarifayim? Ìre awaji kecha îkọt inyan̄a ebi Sameria isibi me ubọk n̄a? 20 Ìre awaji eyi owa me lek otutuuk awaji ebi ido chi okọt inyan̄a ido kan̄ isibi emi me ubọk? Enyi ejeje ikikeek ibe ke Okumugwem môkọt inyan̄a Jeruselem isibi emi me ubọk?”

21 Ire, ema, ebi îkitumu ikọ cha inyi, ekpọkpọ iriaan̄ otu, kpefọọk ọmọ ikọ geege, mije, ogwu ubọọn̄ Ejikaya înyi ema ida ibe ekabọkọ ọmọ otu geege.

22 Mgbọ ya, Eliakim gwun̄ kè Ilikiya òrere ogwu ibot ikwaan̄ me uwu ogwu ubọọn̄, mè Sebina ogwu uti ikpa melek kè Jowa gwun̄ kè Asafu ogwu òkige mfufuk, egwagwak ofọnti me lek kiban̄, mè isi ikpa inu ogwu ibot isi akọn̄ ya otumube inyi Ejikaya.