Awaji ebi Babilọn ìre mkpọmfaka ikike
46
Belu îkana ikwuun̄, Nebo înwun ituun̄,mkpọmfaka awaji chi,
ekitoon̄ me inyọn̄ anam òbeme akpan;
inu chi enyi ebi Babilọn ekibeme ikana ere
ìre ulobo akpan inyi anam chi
efuuk otabe isan̄a me owot.
2 Ebi kè awaji chi mîgbaan̄ inwun ituun̄,
mè ikana ikwuun̄ ikeya,
kpekọt ibọkọ ukwook ebi ìkibeme ema ibeme;
ema me lek kiban̄ si, mîkpulu ema me usun̄ akọn̄.
3 “Ìgban̄ utọn̄, enyi ebi uwu kè Jekọp,
otutuuk kinyi ebi ìsisik me uwu kè Ijeren,
emi mbeme enyi karake emen owot,
mè ibeme enyi karake emanbe enyi.
4 Mege enyi èkan, emi nre ene ya;
mege isọọn̄ ogbaka enyi me ibot,
emi mbakiben enyi ije.
Emi nrom enyi, emi si mbakibeme enyi ije;
emi mâben enyi ikaan̄,
mè inyan̄a enyi isibi.
5 “Ekene ke enyi ebesa emi itọ me lek,
mè ifuk emi ìkike melek kan̄?
Ekene ke enyi mêbe emi mbet lek,
mè igbaan̄ emi mè ọmọ itọ ìkike?
6 Usini ene ekana alata araran̄ me emen akpa kiban̄ igwook,
mè isa okwukwut itọ-inu itọ alata okuket igwook,
mè ibọkọ ogwu usọ alata araran̄ me ọkọ,
ibe isa itọkọ awaji inyi ema,
mè ikigele igwook ikitọbọ ebum inyi awaji cha.
7 Ema mîra ibene awaji cha itoon̄ me oguga, mè iben,
mè isa isi iyik me irek kan̄, îra ikeke ibia.
Ìkpokọt ije inan̄a me akpat ere îkekebe.
Ene môtaan̄ ukpo inyi igak, ìkpofọọk otu;
ìkpokọkọt si inyan̄a ene ya isibi me emen ufialek kan̄.
8 “Ìkeek inu chi, ìtet ìkaan̄ me ibot,
ìtap me ekiket, enyi ebi ìkikpaka ibot.
9 Ìkeek inu òrọrọ iraka mgbọ òjọjọn̄ọ.
Emi nre Awaji, kpunu ofifi;
emi nre Awaji, kpunu inu òbet lek n̄a.
10 Me ibebene ke ntumu inu òborọ me òta;
karake ukot ikaan̄ ke mkpa inu òkinu me isi.
Emi m̀be: Inu ndọmọbe ìborọrọ;
otutuuk inu geelek òneneme emi, m̀barọrọ.
11 Nra igwen unọn òtaka unọn me agan̄ mbum-ura;
me ido òjọjọn̄ọ ere ke ngwen
ogwu òbonirọ inu ndọmọbe iso.
Nra itumu isibi, mârọ si iso ubọk ntumube;
nra idọmọ isan̄a, mârọ si iso ike ndọmọbe.
12 Ìgban̄ utọn̄, enyi ebi unye-ibot,
enyi ebi ìjọjọn̄ọ ere me lek ata irọrọ.
13 Nra itaba ata irọrọ n̄a igbet, ìkpoyaka ijọn̄ọ ere;
unyan̄a n̄a ìkpofiat mgbọ inunu.
Mânyi ebi Sayọn unyan̄a,
mè inyi ebi Ijeren umin n̄a.